'ആരാധകരടക്കം എല്ലാവരും എന്റെ കഴിവുകളെ ചേച്ചി ശിൽപയുമായി താരതമ്യപ്പെടുത്തും'; ഒരുപാട് പഠിച്ചുവെന്ന് ഷമിത ഷെട്ടി

സീ 5 ന്റെ വെബ് സീരീസായ ബ്ലാക്ക് വിഡോയിലും ദി ടെനന്റിലും ഷമിത അഭിനയിച്ചിരുന്നു. ഷമിത വളരെക്കാലമായി സിനിമയിൽ നിന്ന് വിട്ടുനിൽക്കുന്നുവെങ്കിലും താരം സമ്പാദിക്കുന്നത് കോടിക്കണക്കിന് രൂപയാണ്. ഒരു അഭിനയത്രിയെന്നതിലുപരി അവർ ഒരു ഇന്റീരിയർ ഡിസൈനർ കൂടിയാണ്. ദേശീയ മാദ്ധ്യമങ്ങളുടെ റിപ്പോർട്ടുകൾ പ്രകാരം ഷമിതയുടെ മൊത്തം ആസ്തി 1-5 ദശലക്ഷം ഡോളറാണ്. ഇത് ഏകദേശം 7.5 മുതൽ 35 കോടി വരെയാണ്. ഇതിന് പുറമെ ഷമിത ചില ബ്രാൻഡ് എൻഡോസ്മെന്റും നടത്താറുണ്ട്. ഇതിലൂടെയും താരത്തിന് വരുമാനം ലഭിക്കുന്നതായും റിപ്പോർട്ടുകൾ പറയുന്നുണ്ട്. ശിൽപ ഷെട്ടിയുടെ സഹോദരി എന്ന പേരുള്ളതിനാൽ താൻ നിരവധി മോശം അവസ്ഥകളിലൂടെ കടന്നുപോയിട്ടുണ്ടെന്ന് തുറന്ന് പറഞ്ഞിരിക്കുകയാണ് ഇപ്പോൾ ഷമിത ഷെട്ടി.

ചേച്ചി ശിൽപയുമായി തന്നെ ആരാധകരടക്കമുള്ളവർ നിരന്തരം താരതമ്യപ്പെടുത്താറുണ്ട് എന്നാണ് ഷമിത പറയുന്നത്. ബി​ഗ് ബോസ് വീട്ടി‌ൽപോലും താൻ ആ താരതമ്യപ്പെടുത്തൽ അനുഭവിച്ചിട്ടുണ്ടെന്നാണ് ഷമിത പറയുന്നത്. ശിൽപയും ഷമിതയും കട്ടകമ്പിനിയാണ്. ഇരുവരുടേയും സോഷ്യൽമീഡിയ പോസ്റ്റുകളിൽ നിന്നും ഇത് വ്യക്തമാണ്. ഷമിതയുടെ എല്ലാ പ്രശ്നങ്ങളിലും താങ്ങും തണലുമായി എപ്പോഴും ശിൽപയുണ്ടാകാറുണ്ട്. ഷമിത ബി​ഗ് ബോസ് ഹൗസിനുള്ളിലായിരുന്നുപ്പോഴും എല്ലാവിധ സപ്പോർട്ടും നൽകി അനിയത്തിക്ക് വേണ്ടി ശിൽപയും സജീവമായിരുന്നു. തന്റെ സഹോദരി ശിൽപ ഷെട്ടിയുടെ നിഴലിൽ ജീവിക്കുന്നതിനെക്കുറിച്ച് ഷമിത ഷെട്ടി അടുത്തിടെ തുറന്ന് പറഞ്ഞിരുന്നു.

സഹോദരി ജനപ്രിയ നടിയായതിനാൽ ബോളിവുഡിൽ അവസരങ്ങൾക്കും പ്രശസ്തി നേടിയെടുക്കാനും തനിക്ക് എളുപ്പമാണെന്നാണ് പല ആളുകളും കരുതിയിരുന്നതെന്നും ഷമിത പറയുന്നു. ബി​ഗ് ബോസിൽ അം​ഗമാകാൻ അവസരം ലഭിച്ചതോടെയാണ് താൻ എങ്ങനെയുള്ള ആളാണെന്ന് ആരാധകർ തിരിച്ചറിഞ്ഞതെന്നും താനായി ആളുകൾക്ക് മുമ്പിൽ‌ ജീവിക്കാൻ സാധിച്ചുവന്നത് ഓർക്കുമ്പോൾ ബി​ഗ് ബോസ് ഷോ സന്തോഷം നൽകിയെന്നും ഷമിത പറയുന്നു. ബി​ഗ് ബോസ് 15 തേർഡ് റണ്ണറപ്പായിരുന്നു ഷമിത ഷെട്ടി. ബി​ഗ് ബോസിൽ നിന്നും പുറത്ത് വന്ന ശേഷം ഷമിത ഷെട്ടിയുടെ പിറന്നാൾ ശിൽപയും ഭർത്താവ് രാജ് കുന്ദ്രയും ബന്ധുക്കളും ചേർന്ന് ആഘോഷമായി കൊണ്ടാടിയിരുന്നു.