Celebs » Kunchacko Boban » Biography
ജീവചരിത്രം
കുഞ്ചാക്കോ ബോബൻ (ചാക്കോച്ചൻ) ഒരു മലയാള ചലച്ചിത്ര നടനാണ്‌. 1976 നവംബർ 2-ന് ജനിച്ച അദ്ദേഹം പ്രശസ്ത ചലച്ചിത്ര നിർമ്മാതാവായ കുഞ്ചാക്കോയുടെ പേരക്കുട്ടിയാണ്. 1997-ൽ ഫാസിൽ സംവിധാനം ചെയ്ത 'അനിയത്തിപ്രാവ്' എന്ന സൂപ്പർ ഹിറ്റ്‌ ചിത്രത്തിലൂടെയാണ് ചാക്കോച്ചൻ തന്റെ സിനിമ ജീവിതം ആരംഭിക്കുന്നത്. രണ്ടാമത്തെ ചിത്രമായ നക്ഷത്രതാരാട്ട് കാര്യമായ വിജയം നേടിയില്ലെങ്കിലും കുഞ്ചാക്കോയുടെ താരമൂല്യം കുറഞ്ഞില്ല. കമൽ സംവിധാനം ചെയ്ത നിറം മികച്ച വാണിജ്യവിജയം കൈവരിച്ചു. പിന്നീട് പുറത്തിറങ്ങിയ അദ്ദേഹത്തിന്റെ പല ചിത്രങ്ങളും കാര്യമായ നേട്ടം കൊയ്തില്ല. ദോസ്ത്, നരേന്ദ്രൻ മകൻ ജയകാന്തൻ വക, കസ്തൂരിമാൻ, സ്വപ്നക്കൂട് എന്നിവയായിരുന്നു ഈ കാലഘട്ടത്തിലെ കുഞ്ചാക്കോ ബോബന്റെ വിജയചിത്രങ്ങൾ. 2004-ൽ പുറത്തിറങ്ങിയ ഈ സ്നേഹതീരത്ത് എന്ന ചിത്രത്തിലെ ഉണ്ണി എന്ന കഥാപാത്രം കുഞ്ചാക്കോ ബോബന് ആ വർഷത്തെ സംസ്ഥാന ചലച്ചിത്ര അവാർഡുകളിൽ പ്രത്യേക ജൂറി പുരസ്കാരം നേടിക്കൊടുത്തു. മമ്മൂട്ടിക്കും, മോഹൻലാലിനുമൊപ്പം ഹരികൃഷ്ണൻസ് എന്ന സിനിമയിൽ കുഞ്ചാക്കോ ബോബൻ അവതരിപ്പിച്ച കഥാപാത്രം മലയാളത്തിലെ മുൻനിര നായകൻമാരുടെ ഗണത്തിലേക്ക് അദ്ദേഹത്തെ കൊണ്ടുചെന്നെത്തിച്ചു. കുഞ്ചാക്കോ ബോബൻ ഇതുവരെ 62 സിനിമകളിൽ അഭിനയിച്ചിട്ടുണ്ട്. നിരവതി പ്രണയ ചിത്രങ്ങളിൽ അഭിനയിച്ച കുഞ്ചാക്കോ ബോബൻ കോളേജ് ക്യാംപസുകളിൽ ഏവർക്കും പ്രിയപ്പെട്ടവനായി മാറി. 2005-ൽ വിവാഹിതനായ അദ്ദേഹം റിയൽ എസ്റ്റേറ്റ് രംഗത്ത് ശ്രദ്ധ കേന്ദ്രീകരിച്ചു. 2006-ൽ കിലുക്കം കിലുകിലുക്കം എന്ന ചിത്രത്തിൽ മാത്രം അഭിനയിച്ച അദ്ദേഹം 2007-ൽ ചലച്ചിത്രരംഗത്ത് നിന്ന് പൂർണ്ണമായി വിട്ടുനിന്നു. 2008-ൽ ലോലിപോപ്പ് എന്ന ഷാഫി ചിത്രത്തിലൂടെ അഭിനയരംഗത്തേക്ക് തിരിച്ചുവന്ന ചാക്കോച്ചൻ 2010-ഓടെ ചലച്ചിത്രരംഗത്ത് വീണ്ടും സജീവമായി. 2010-ൽ ലാൽ ജോസ് സംവിധാനം ചെയ്ത എൽസമ്മ എന്ന ആൺകുട്ടി എന്ന ചിത്രത്തിലെ പാലുണ്ണി എന്ന കഥാപാത്രം അദ്ദേഹത്തെ ഹാസ്യ രംഗത്ത് സജീവമാക്കി. 2011-ൽ ട്രാഫിക്, സീനിയേഴ്സ്, ത്രീ കിംഗ്സ്, സെവൻസ്, ഡോക്ടർ ലൗ എന്നീ ചിത്രങ്ങളിൽ അദ്ദേഹം അഭിനയിച്ചു. 2012-ൽ പുറത്തിറങ്ങിയ ഓർഡിനറി, മല്ലൂസിംഗ് എന്നീ ചിത്രങ്ങളും മികച്ച വിജയം നേടി. 2013-ൽ പുറത്തിറങ്ങിയ റോമൻസും പ്രേക്ഷക ശ്രദ്ധ പിടിച്ചു പറ്റി. വൈശാഖ് സംവിധാനം ചെയ്ത കസിൻസ് ആണ് അദ്ദേഹം അവസാനം അഭിനയിച്ച ചിത്രം.
 

 

 

 

 

 
 

വിനോദലോകത്തെ ഏറ്റവും പുതിയ വിശേഷങ്ങളുമായി - Filmibeat Malayalam