സാധാരണ പോലീസ് കഥയല്ല അബ്രഹാമിന്‍റെ സന്തതികള്‍, സിനിമയെക്കുറിച്ച് വാചാലനായി രണ്‍ജി പണിക്കര്‍, കാണൂ!

സുപ്രധാന വേഷത്തില്‍ രണ്‍ജി പണിക്കര്‍

മികച്ച തിരക്കഥാകൃത്ത് മാത്രമല്ല എഴുത്തുകാരന്‍ കൂടിയാണ് താനെന്ന് രണ്‍ജി പണിക്കര്‍ നേരത്തെ തന്നെ തെളിയിച്ചതാണ്. ആരാധകരെ ആവേശത്തിലാഴ്ത്തുന്ന കിടിലന്‍ ഡയലോഗുകള്‍ മാത്രമല്ല ഏത് തരത്തിലുള്ള കഥാപാത്രത്തെ അവതരിപ്പിക്കാനും തനിക്ക് കഴിയുമെന്നും അദ്ദേഹം തെളിയിച്ചിരുന്നു യുവതാരങ്ങളോടൊപ്പമായാലും മുതിര്‍ന്ന താരങ്ങള്‍ക്കൊപ്പമായാലും കട്ടയ്ക്ക് പിടിച്ച് നില്‍ക്കാനുള്ള കെല്‍പ്പ് അദ്ദേഹത്തിനുണ്ട്. റിലീസാവാനിരിക്കുന്ന മെഗാസ്റ്റാര്‍ ചിത്രമായ അബ്രാഹമിന്റെ സന്തതികളില്‍ സുപ്രധാന വേഷത്തില്‍ അദ്ദേഹം എത്തുന്നുണ്ട്.

പതിവ് രീതികളല്ല

പതിവ് പോലെയുള്ള രീതികളിലൂടെയല്ല ഈ സിനിമ സഞ്ചരിക്കുന്നതെന്ന് രണ്‍ജി പണിക്കര്‍ പറയുന്നു. ടീസര്‍ ലോഞ്ചിനിടയിലുള്ള അദ്ദേഹത്തിന്റെ വാക്കുകള്‍ ഇതിനോടകം തന്നെ വൈറലായിരുന്നു. പതിവ് പോലെയുള്ള കുറ്റാന്വേഷണ ചിത്രമല്ല ഇത്. യാതൊരു ബന്ധവുമില്ലാത്ത കേസ് അന്വേഷിക്കാന്‍ വരുന്ന പോലീസ് ഉദ്യോഗസ്ഥന്റെ കഥയല്ല മറിച്ച്് തന്റെ ജീവിതത്തോട് ചേര്‍ത്ത് വെക്കാവുന്ന കേസന്വേഷണവുമായാണ് അദ്ദേഹം എത്തുന്നത്. പല സംഭവങ്ങളും അവസാനിക്കുന്നത് മമ്മൂട്ടിയുടെ നേര്‍ക്കെത്തിയാണെന്നതാണ് മറ്റൊരു വസ്തുത.

ഷാജി പാടൂരിനെക്കുറിച്ച്

മമ്മൂട്ടി നേരത്തെ തന്നെ ഡേറ്റ് നല്‍കിയിരുന്നുവെങ്കിലും 10 വര്‍ഷത്തെ കാത്തിരിപ്പിനൊടുവിലാണ് അദ്ദേഹം സിനിമ സംവിധാനം ചെയ്യുന്നത്. മമ്മൂട്ടിക്ക് അനുയോജ്യമായ കഥയ്ക്ക് വേണ്ടിയുള്ള കാത്തിരിപ്പിലായിരുന്നു അദ്ദേഹം. വര്‍ഷങ്ങളായി അദ്ദേഹം സിനിമയില്‍ സജീവമാണ്. രഞ്ജിത്ത്, ഷാജി കൈലാസ് എന്നിവരോടൊപ്പം പ്രവര്‍ത്തിച്ച പരിചയവുമായാണ് അദ്ദേഹം സ്വതന്ത്ര്യ സംവിധായകനാവുന്നത്.

മഹാമാരി പോലെ മഹാനടനം

കേരളക്കരയെ ഒന്നടങ്കം വിസ്മയിപ്പിക്കുന്ന സിനിമയായിരിക്കും അബ്രഹാമിന്റെ സന്തതികളെന്ന് അണിയറപ്രവര്‍ത്തകര്‍ വ്യക്തമാക്കിയിരുന്നു. ജോബി ജോര്‍ജാണ് ചിത്രം നിര്‍മ്മിച്ചിട്ടുള്ളത്. ഗ്രേറ്റ് ഫാദറിന് ശേഷമുള്ള സ്റ്റൈലിഷ് ചിത്രമായിരിക്കും ഇതെന്ന് സിനിമയുടെ പോസ്റ്ററുകളും ടീസറുമൊക്കെ വ്യക്തമാക്കിയിരുന്നു. മണിക്കൂറുകള്‍ കൂടി കഴിയുന്നതോടെ ഇതേക്കുറിച്ച് കൃത്യമായി മനസ്സിലാവും.