'ആലോചനകൾ നടക്കുമ്പോൾ ധൈര്യം പകർന്നത് ചേട്ടനായിരുന്നു'; കുടുംബത്തെ കുറിച്ച് കാവ്യ മാധവൻ

സിനിമയിൽ സജീവമായിരിക്കുമ്പോൾ തന്നെ സ്വന്തമായി ഒരു ബിസിനസ് എന്നത് കാവ്യ മാധവന്റെ ചിന്തയിൽ ഓടുന്നുണ്ടായിരുന്നു. തനിക്ക് പറ്റിയ ഒരു ബിസിനസ് അന്വേഷിച്ചുകൊണ്ടേയിരുന്നു. അങ്ങനെയാണ് ലക്ഷ്യ എന്ന ഓൺലൈൻ വസ്ത്ര വ്യാപരം ആരംഭിക്കുന്നതിലേക്ക് കാവ്യ എത്തിയത്. 2015ൽ ആയിരുന്നു സംരംഭക എന്ന രീതിയിലേക്ക് കൂടി കാവ്യ മാധവൻ എത്തിയത്. മെ​ഗസ്റ്റാർ മമ്മൂട്ടിയായിരുന്നു ഷോപ്പിന്റെ ഉദ്ഘാടനം നിർവഹിച്ചത്. കാവ്യയ്ക്ക് മാത്രമല്ല തെന്നിന്ത്യയിലെ നടിമാരായ പൂർണിമ, ആര്യ, സാമന്ത തുടങ്ങിയവരെല്ലാം ഓൺലൈൻ വസ്ത്ര വ്യാപാരവുമായി രം​ഗത്തുണ്ട്. ലക്ഷ്യയുടെ ഉദ്ഘാടനത്തിന് മുന്നോടിയായി വിളിച്ച വാർത്തസമ്മേളനത്തിൽ എന്തുകൊണ്ട് താൻ ബിസിനസിലേക്ക് കടന്നുവെന്ന് കാവ്യാ മാധവൻ പറയുന്ന വീഡിയോകളാണ് ഇപ്പോൾ‍ വർഷങ്ങൾക്കിപ്പുറം ആരാധകർ വൈറലാക്കുന്നത്.

കാവ്യയുടെ അച്ഛൻ ടെക്സ്റ്റയിൽസ് നടത്തിയിരുന്ന വ്യക്തിയായിരുന്നു. കൂടാതെ കാവ്യയുടെ സഹോദരൻ മിഥുൻ ഫാഷൻ ഡിസൈനറുമാണ്. അതിനാൽ തന്നെ രക്തത്തിൽ അലിഞ്ഞ് ചേർന്ന വസ്ത്ര വ്യാപാരം തന്നെ കാവ്യയും തുടങ്ങാൻ തീരുമാനിച്ചതിൽ അത്ഭുതമില്ല. ഒരു ബിസിനസ് ആരംഭിക്കാം എന്ന ചിന്ത വന്നപ്പോൾ മുതൽ കുടുംബം നൽകിയ ഉപദേശത്തെ കുറിച്ചും നിർദേശങ്ങളെ കുറിച്ചുമെല്ലാം ഇപ്പോൾ വൈറലാകുന്ന വീഡിയോയിൽ കാവ്യ മാധവൻ പറയുന്നുണ്ട്. ചേട്ടൻ മിഥുനും നാത്തൂനുമൊപ്പമാണ് കാവ്യ വാർത്താസമ്മേളനത്തിൽ പങ്കെടുത്തത്. 'സിനിമക്ക് ഒപ്പം എന്താ ചെയ്യുക എന്നുള്ള ആലോചനക്ക് ഒടുവിൽ ആണ് ബിസിനസ് എന്ന ആശയം മനസിൽ ഉദിച്ചത്. ടെക്സ്റ്റൈൽസിൽ ഒരു ബേസ് ഉണ്ടായിരുന്നു എങ്കിലും പൂർണ്ണമായും ഇറങ്ങാൻ ഉള്ള ഒരു തീരുമാനം ഉണ്ടായിരുന്നില്ല. എപ്പോഴും യാത്രയിൽ ആയിരിക്കണം. ട്രെൻഡിന്റെ പുറകെ പോകണം എന്നുള്ളത് ഒക്കെ ഒരു ബാധ്യത ആയി മാറുമോ എന്ന ടെൻഷനുണ്ട്. ചേട്ടൻ ഫാഷൻ ഡിസൈനറാണ്. ചേട്ടനാണ് ഒരു ഓൺലൈൻ സംരഭം തുടങ്ങിക്കൂടെ എന്ന ആശയം പറഞ്ഞത്. ലക്ഷ്യ എന്ന പേര് തീരുമാനിക്കുമ്പോൾ ഒരു അർഥം ഉണ്ടാകണം, സിംപിൾ ആകണം, പൂർണ്ണത ഉണ്ടാകണം ഒരു പോസിറ്റിവിറ്റി ഉണ്ടാകണം. സിനിമ പോലെ തന്നെ കുടുംബം പോലെയാണ് എനിക്ക് ബിസിനസും. എല്ലാത്തിനും ഒപ്പം നിഴലായി കുടുംബമുണ്ട് അതാണ് എന്റെ അടിത്തറ' കാവ്യ പറയുന്നു.

മഹാലക്ഷ്മിക്ക് മിഠായി കൊടുത്തപ്പോള്‍..തിരിച്ച് കിട്ടിയത് തഗ് മറുപടി | FilmiBeat Malayalam

പൊതു പരിപാടികളിൽ പങ്കെടുക്കാനെത്തുമ്പോഴെല്ലാം കാവ്യ ധരിക്കുന്ന കുർത്തികളും ചുരിദാറുകളും ലക്ഷ്യയിൽ ഡിസെൻ ചെയ്തവയാണ്. കാവ്യയുടെ ഫാഷൻ സെൻസിന് നിരവധി ആരാധകരുമുണ്ട്. തനിക്ക് വേണ്ടി മാത്രമല്ല മകൾ മഹാലക്ഷ്മിക്കും മീനാക്ഷിക്കും വേണ്ടി ലക്ഷ്യയിൽ വസ്ത്രങ്ങൾ ഡിസൈൻ ചെയ്യാറുണ്ട്. 2016ൽ ആയിരുന്നു ദിലീപുമായുള്ള കാവ്യയുടെ വിവാ​ഹം നടന്നത്. സിനിമകളിൽ നിന്നും കാവ്യ വിട്ടുനിൽക്കുകയാണെങ്കിലും കാവ്യയുടെ ഓരോ ചെറുവീഡിയോകളും വാർത്തകളും വളരെ വേ​ഗം ശ്രദ്ധിക്കപ്പെടാറുണ്ട്. അടുത്തിടെ മകൾ മൂന്ന് വയസുകാരി മഹാലക്ഷ്മിക്കും ഭർത്താവ് ദിലീപിനുമൊപ്പം കാവ്യ ദുബായിൽ അവധി ആഘോഷിക്കുകയായിരുന്നു. ദേ പുട്ടിന്റെ ദുബായിലെ ഷോപ്പ് സന്ദർശിച്ചപ്പോഴുള്ള താര കുടുംബത്തിന്റെ വീഡിയോയും വൈറലായിരുന്നു.