സംശയം വേണ്ട, രണ്ടാമൂഴം തുടങ്ങുന്നു... ഡേറ്റ് പ്രഖ്യാപിച്ച് സംവിധായകന്‍! ചിത്രം ഒരുങ്ങുന്നതിങ്ങനെ...

അടുത്ത വര്‍ഷം

രണ്ടാമൂഴം അടുത്ത വര്‍ഷം ആരംഭിക്കുമെന്ന് സംവിധായകന്‍ ശ്രീകുമാര്‍ മേനോന്‍ ട്വിറ്ററിലൂടെ അറിയിച്ചു. രണ്ടാമൂഴത്തിന്റെ കാര്യങ്ങള്‍ അറിയാന്‍ താല്പര്യമുള്ള വര്‍ക്കായി താന്‍ ജനുവരി പത്തൊമ്പതോടു കൂടി ചിത്രത്തിന്റെ പ്രിപ്രൊഡക്ഷന്‍ ജോലികളില്‍ സജീവമാകുമെന്ന് അദ്ദേഹം കൂട്ടിച്ചേര്‍ത്തു.

ഒരു വര്‍ഷത്തിനുള്ളില്‍

ജനുവരിയില്‍ പ്രി പ്രൊഡക്ഷന്‍ ജോലികള്‍ ആരംഭിക്കുന്ന ചിത്രം അടുത്ത വര്‍ഷം അവസാനത്തോടെ തിയറ്ററിലെത്തും. രണ്ട് ഭാഗങ്ങളായിട്ടാണ് ചിത്രം പ്രദര്‍ശനത്തിനെത്തിക്കുന്നത്. ആദ്യ ഭാഗം ഇറങ്ങി 100 ദിവസത്തിന് ശേഷം രണ്ടാം ഭാഗം റിലീസ് ചെയ്യും.

ലോക വ്യാപക റിലീസ്

മലയാളത്തില്‍ രണ്ടാമൂഴം എന്ന പേരിലിറങ്ങുന്ന ചിത്രം മഹാഭാരതം എന്ന പേരില്‍ എല്ലാ ഇന്ത്യന്‍ ഭാഷകളിലും ചില വിദേശ ഭാഷകളിലും പ്രദര്‍ശനത്തിനെത്തും. ഹോളിവുഡ്, ബോളിവുഡ് താരങ്ങളലും ടെക്‌നീഷ്യന്‍സും ചിത്രത്തിനായി അണിനിരക്കും.

ആയിരം കോടി ബജറ്റ്

എംടി വാസുദേവന്‍ നായരുടെ രണ്ടാമൂഴം എന്ന നോവലിനെ ആസ്പദമാക്കി ഒരുക്കുന്ന ചിത്രത്തിന് തിരക്കഥ ഒരുക്കുന്നത് എംടി തന്നെയാണ്. ആയിരം കോടി മുതല്‍ മുടക്കുള്ള ചിത്രം നിര്‍ക്കുന്നത് വ്യവസായിയായ ബിആര്‍ ഷെട്ടിയാണ്. 750 കോടിയാണ് ചിത്രത്തിനായി ശ്രീകുമാര്‍ മേനോന്‍ ആവശ്യപ്പെട്ടത് എന്നാല്‍ 1000 കോടി അനുവദിക്കുകയായിരുന്നു.

ഭീമനായി മോഹന്‍ലാല്‍

ഭീമനെ കേന്ദ്ര കഥാപാത്രമാക്കി മഹാഭാരത കഥ പറയുകയാണ് എംടി രണ്ടാമൂഴത്തിലൂടെ. മോഹന്‍ലാലാണ് കേന്ദ്രകഥാപാത്രമായ ഭീമനാകുന്നത്. തന്റെ അഭിനയ ജീവിതത്തിലെ സ്വപ്‌ന കഥാപാത്രമെന്നാണ് മോഹന്‍ലാല്‍ ഭീമനെ വിശേഷിപ്പിച്ചത്.

മൂന്ന് മാസത്തെ ബ്രേക്ക്

മോഹന്‍ലാലിനെ നായകനാക്കി ശ്രീകുമാര്‍ മേനോന്‍ സംവിധാനം ചെയ്യുന്ന ഒടിയന്‍ ചിത്രീകരണത്തിന് മൂന്ന് മാസത്തെ ബ്രേക്കിലാണ്. മോഹന്‍ലാലിന്റെ ശരീര ഭാരം കുറയ്ക്കുന്നതിന് വേണ്ടിയാണ് മൂന്ന് മാസത്തെ ദീര്‍ഘമായ ബ്രേക്ക് പ്രഖ്യാപിച്ചിരിക്കുന്നത്.