ഹോം

വാർത്ത

ഗവി എന്ന സ്ഥലത്തിന്റെ ദൃശ്യഭംഗിയില്‍ സാധാരണക്കാര്‍ക്ക് വേണ്ടി ഒരുങ്ങിയ ചിത്രമായിരുന്നു 'ഓര്‍ഡിനറി'. സുഗീതിന്റെ സംവിധാനത്തില്‍ പുറത്തിറങ്ങിയ ചിത്രത്തില്‍ കുഞ്ചാക്കോ ബോബനും ബിജു മേനോനും തകര്‍ത്തഭിനയിച്ചു.

ഈ ചിത്രത്തിന്റെ വിജയത്തിന് ശേഷം കുഞ്ചാക്കോ ബോബനും ബിജു മേനോനുമാണ് മലയാളത്തിന്റെ അടുത്ത മികച്ച കൂട്ടുകെട്ടുകള്‍ എന്ന് മലയാളികള്‍ വിലയിരുത്തി. തുടര്‍ന്ന് ധാരാളം സിനിമകളില്‍ ഇവര്‍ ഒന്നിച്ചു. പക്ഷെ ഒന്നും ഓര്‍ഡിനറിയോളം വന്നില്ല.

കുഞ്ചാക്കോ ബോബനും ബിജുവും മാത്രമായാല്‍ ഓര്‍ഡിനറി ആയില്ലല്ലോ. ആ കൂട്ടുകെട്ടിലേയ്ക്ക് സുഗീതുമെത്തി, 'ത്രി ഡോട്ട്‌സ്' എന്ന ചിത്രമെടുത്തു. പക്ഷെ അതിനും മുന്‍ ചിത്രത്തിന്റെ വിജയം ആവര്‍ത്തിക്കാന്‍ കഴിഞ്ഞില്ല.

ഇപ്പോഴിതാ ഈ കൂട്ടുകെട്ട് വീണ്ടും ഒന്നിക്കുന്നു. ഒരു അഭിമുഖത്തില്‍ സുഗീത് തന്നെയാണ് ഇക്കാര്യം അറിയിച്ചത്. റിപ്പോര്‍ട്ടുകള്‍ പ്രകാരം ഒരു പ്രണയ ചിത്രമാണ് പുതിയത്. ഓര്‍ഡിനറിയ്ക്ക് തിരക്കഥയെഴുതിയ നിഷാദ് കോയ തന്നെയാണ് പേരിട്ടിട്ടില്ലാത്ത ഈ ചിത്രത്തിനും തിരക്കഥയെഴുതുന്നത്.

നായികമാരെയോ മറ്റ് താരങ്ങളെയോ തീരുമാനിച്ചിട്ടില്ല. ശ്രിത ശിവദാസും ആന്‍ അഗസ്റ്റിയനുമായിരുന്നു ഓര്‍ഡിനറിയിലെ നായികമാര്‍. കേരളത്തിലെ ഗെവിയുടെ പശ്ചാത്തലത്തിലാണ് ഓര്‍ഡിറി ഒരുങ്ങിയതെങ്കില്‍ പുതിയ ചിത്രത്തിന്റെ പ്രധാന ലൊക്കേഷന്‍ ദുബായും ശ്രീലങ്കയുമാണ്.