ഇവരുടെ ടാലന്റ് ഉപയോ​ഗിക്കപ്പെടാതെ പോവുന്നോ? കിട്ടുന്ന റോളുകൾ മികവുറ്റതാക്കുന്ന നടിമാർ

ലാൽജോസ് സിനിമ ഡയമണ്ട് നെക്ലേസിലൂടെ അഭിനയ രം​ഗ​ത്തെത്തിയ അനുശ്രീ ചെയ്യുന്ന കഥാപാത്രങ്ങളിൽ മിക്കതും തുടക്ക കാലത്ത് ശ്രദ്ധിക്കപ്പെട്ടിരുന്നു. ചന്ദ്രേട്ടൻ എവിടെയാ ഉൾപ്പെടെയുള്ള സിനിമകൾ ഇതിന് ഉദാഹരണമാണ്. എന്നാൽ പിന്നീട് അതേ കരിയർ ​ഗ്രാഫ് നിലനിർത്താൻ അനുശ്രീക്ക് കഴിഞ്ഞില്ല. കോമഡിയും വൈകാരികതയും ഒരുപോലെ സ്ക്രീനിൽ എത്തിക്കാനാവുന്ന ചുരുക്കം നടിമാരിൽ ഒരാളാണ് അനുശ്രീ. മികച്ച കഥാപാത്രങ്ങൾ കിട്ടിയാൽ അനുശ്രീയുടെ അഭിനയ മികവ് ഇനിയും പ്രേക്ഷകർക്ക് കാണാനാവും. 

സഹ നടി വേഷങ്ങളിൽ മലയാളത്തിൽ തിളങ്ങാൻ സാധിക്കുന്ന നടിയാണ്  ദേവി അജിത്ത്. ആക്ഷൻ ഹീറോ ബിജുവിലെ ഏതാനും മിനിട്ടുള്ള രം​ഗം ഇതിന് ഉ​ദാഹരണം ആണ്. മകനെക്കുറിച്ചുള്ള ആവലാതി പൊലീസിനോട് പറയുന്ന രം​ഗത്തിൽ മികവുറ്റ പ്രകടനം ആണ് നടി കാഴ്ച വെച്ചത്. ട്രിവാൻഡ്രം ലോഡ്ജ് എന്ന സിനിമയിലെ കഥാപാത്രവും ശ്രദ്ധിക്കപ്പെട്ടിരുന്നു. എന്നാൽ ഇത്തരത്തിലുള്ള കഥാപാത്രങ്ങൾ പിന്നീട് നടിയെ തേടി വന്നില്ല. 

സിനിമകളിൽ സജീവമാണെങ്കിലും തുടക്ക കാലത്ത് മിയയെ തേടി വന്ന പോലുള്ള കഥാപാത്രങ്ങൾ നടിക്കിപ്പോൾ മലയാളത്തിൽ ലഭിക്കുന്നില്ല. ആദ്യ സിനിമയായ ചേട്ടായീസിൽ മികച്ച പ്രകടനം ആയിരുന്നു മിയ കാഴ്ച വെച്ചത്. പിന്നീട് അനാർക്കലി എന്ന സിനിമയിൽ ചെയ്ത വേഷവും നടി മികച്ചതാക്കി. സ്വന്തമായി ഡബ് ചെയ്യുന്ന നടിക്ക് ഇതും മുതൽക്കൂട്ടാണ്. 

അഭിനയത്തിൽ ഇന്ന് മലയാളത്തിൽ എടുത്ത് പറയാൻ പറ്റുന്ന നടിയാണ് നൈല ഉഷ. പൊറിഞ്ച് മറിയം ജോസിൽ നടിയുടെ വേഷം ഏറെ ശ്രദ്ധിക്കപ്പെട്ടിരുന്നു. പിന്നീട് പാപ്പൻ ഉൾപ്പെടെ നിരവധി സിനിമകളിൽ അഭിനയിച്ച നടിക്ക് പൊറിഞ്ച് മറിയം പോലെ ഇംപാക്ട് ഉണ്ടാക്കിയ മറ്റൊരു സിനിമ ഇതുവരെ ലഭിച്ചിട്ടില്ല. മാസ് വേഷങ്ങൾ ചെയ്യാൻ പറ്റുന്ന മലയാളത്തിലെ ചുരുക്കം നടിമാരിൽ ഒരാളാണ് നൈല ഉഷ.

മലയാളി അല്ലെങ്കിലും നടി പ്രിയാമണി കേരളത്തിന് സുപരിചിതയാണ്. തിരക്കഥ, പുതിയമുഖം, പ്രാഞ്ചിയേട്ടൻ, ​ഗ്രാന്റ് മാസ്റ്റർ തുടങ്ങിയ സിനിമകളിൽ പ്രിയാമണി ആയിരുന്നു നായിക. നടിയുടെ കരിയറിലെ ഏറ്റവും മികച്ച റോളുകളിലൊന്നായാണ് തിരക്കഥ എന്ന സിനിമ വിശേഷിപ്പിക്കപ്പെടുന്നത്. അത്യു​ഗ്രൻ പ്രകടനം കാഴ്ച വെച്ച നടിയെ തേടി ആ വർഷത്തെ മികച്ച നടിക്കുള്ള ഫിലിംഫെയർ പുരസ്കാരവും ലഭിച്ചു.  എന്നാൽ പിന്നീട് ഇത്തരത്തിലുള്ള റോളുകൾ മലയാളത്തിൽ നിന്ന് പ്രിയാമണിക്ക് ലഭിച്ചിട്ടില്ല. അതേസമയം നടി ഇന്ന് പാൻ ഇന്ത്യൻ തലത്തിൽ പ്രശസ്തയാവുകയും ചെയ്തു. നടിയുടെ മികച്ച ഒരു മലയാള സിനിമയ്ക്കായി കാത്തിരിക്കുകയാണ് പ്രേക്ഷകർ.