ഇടിവെട്ട് ഡയലോ​ഗുമായി ഭരത്ചന്ദ്രൻ, നിഷ്കളങ്കനായ പ്രേം കുമാർ; മലയാള സിനിമയിലെ ചില പൊലീസ് വേഷങ്ങൾ

സിനിമകളിൽ കണ്ട് പരിചയം ഇല്ലാത്ത ഒരു പൊലീസുകാരനെ ആണ് തട്ടത്തിൻ മറയത്ത് എന്ന സിനിമയിൽ പ്രേക്ഷകർ കണ്ടത്. നടൻ മനോജ് കെ ജയൻ ആണ് എസ്ഐ പ്രേംകുമാർ എന്ന ഈ കഥാപാത്രത്തെ അവതരിപ്പിച്ചത്. സൗമ്യനായി പെരുമാറുന്ന പൊലീസിനെ ആണ് ഈ സിനിമയിൽ നടൻ അവതരിപ്പിച്ചത്.

പൊലീസുകാരുടെ കഥ പറഞ്ഞ മറ്റൊരു സിനിമ ആയിരുന്നു ആക്ഷൻ ഹീറോ ബിജു. ഏറെ വിമർശനങ്ങൾ കേട്ട സിനിമയാണിത്. ഈ സിനിമ ഇറങ്ങിയ ശേഷം സിനിമയിൽ നിവിൻ പോളി പ്രതികളെ മർദ്ദിക്കുന്ന രീതി യഥാർത്ഥ പൊലീസുകാർ അനുകരിക്കുന്ന സ്ഥിതിയും ഉണ്ടായിരുന്നു. പിന്തിരിപ്പൻ ആശയങ്ങൾ പ്രോത്സാഹിപ്പിക്കുന്നെന്ന കുറ്റപ്പെടുത്തലും സിനിമയ്ക്ക് നേരെ വന്നു. 

സുരേഷ് ​ഗോപിയുടെ ഐക്കണിക് കഥാപാത്രങ്ങളിൽ ഒന്നാണ് കമ്മീഷണർ എന്ന സിനിമയിലെ ഭരത്ചന്ദ്രൻ ഐപിഎസ്. നിരവധി സിനിമകളിൽ സുരേഷ് ​ഗോപി പൊലീസ് വേഷം ചെയ്തിട്ടുണ്ടെങ്കിലും ഭരത്ചന്ദ്രൻ ഐപിഎസ് എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു. ജസ്റ്റ് റിമെംബർ ദാറ്റ് എന്ന സുരേഷ് ​ഗോപിയുടെ ഹിറ്റ് ഡയലോ​ഗും ഈ സിനിമയിൽ നിന്നാണ്. 

പട്ടണ പ്രവേശം എന്ന സിനിമയിൽ മോഹൻലാലും ശ്രീനിവാസനും ചെയ്ത ദാസൻ, വിജയൻ എന്നീ കഥാപാത്രങ്ങൾ ഇന്നും അനശ്വരമായി പ്രേക്ഷക മനസ്സിൽ നിലനിൽക്കുന്നു, തമിഴ്നാട് പൊലീസിലെ സിഐഡികളായി എത്തുന്ന ഈ കഥാപാത്രങ്ങളുടെ നിരവധി ഹാസ്യ രം​ഗങ്ങൾ സിനിമയിലുണ്ട്. 

ഏറെ നിരൂപക പ്രശംസ പിടിച്ചു പറ്റിയ സിനിമ ആയിരുന്നു മമ്മൂട്ടി നായകനായെത്തിയ ഉണ്ട എന്ന സിനിമ. മണികണ്ഠൻ എസ്ഐ എന്ന കഥാപാത്രത്തെയാണ് മമ്മൂട്ടി ഈ സിനിമയിൽ അവതരിപ്പിച്ചത്. മാസ് സീനുകളൊന്നും ഇല്ലാതെ വളരെ റിയലിസ്റ്റിക് ആയെടുത്ത പൊലീസ് കഥയായിരുന്നു ഇത്. മമ്മൂട്ടിയുടെ പ്രകടനവും ഏറെ ശ്രദ്ധിക്കപ്പെട്ടു.