ബോളിവുഡ് ബ്ലോക്ക്ബസ്റ്ററുകളുടെ ഭാ​ഗമാകാനുള്ള അവസരം നിരസിച്ച തെന്നിന്ത്യൻ താരങ്ങൾ!

തമിഴിൽ ഹിറ്റായ സൂര്യ ചിത്രം സിങ്കം ഹിന്ദിയിലേക്ക് രോഹിത്ത് ഷെട്ടി റീമേക്ക് ചെയ്തിരുന്നു. അജയ് ദേവ്​ഗണാണ് നായകനായത്. സിനിമയുടെ കാസ്റ്റിങ് നടക്കുന്ന സമയത്ത് അനുഷ്ക ഷെട്ടിയ്ക്ക് നായികയാകാൻ ക്ഷണം ലഭിച്ചിരുന്നു. അവസരം അനുഷ്ക നിരസിച്ചതോടെ കാജൾ അ​ഗർവാൾ നായികയായി. 

ഷാരൂഖ് ഖാനെ നായകനാക്കി അറ്റ്ലി സംവിധാനം ചെയ്യുന്ന ബോളിവുഡ് ചിത്രം ജവാനിലൂടെ ലേഡി സൂപ്പർസ്റ്റാർ നയൻതാര ബോളിവുഡിൽ അരങ്ങേറാൻ പോവുകയാണ്. മുമ്പും നിരവധി അവസരങ്ങൾ ബോളിവുഡിൽ നിന്നും നയൻസിന് വന്നിരുന്നു. അതിൽ ഒന്ന് ഷാരൂഖിന്റെ ചെന്നൈ എക്സ്പ്രസിൽ‌ ഐറ്റം ഡാൻസ് ചെയ്യാനുള്ള ക്ഷണമായിരുന്നു. പക്ഷെ താരം ആ അവസരം നിരസിച്ചു. 

മലയാളത്തിലെ താരമൂല്യമുള്ള യുവനടൻ നിവിൻ പോളിക്ക് ബോളിവുഡിൽ നിന്നും നിരവധി അവസരങ്ങൾ വന്നിരുന്നു. പക്ഷെ പലതും തന്റെ തിരിക്കേറിയ ഷെഡ്യൂൾ കാരണം നിവിന് ഉപേക്ഷിക്കേണ്ടി വന്നു. നിവിന്റെ മൂത്തോൻ സിനിമയെ പുകഴ്ത്തി നിരവധി താരങ്ങൾ ബോളിവുഡിൽ നിന്നും രം​ഗത്തെത്തിയിരുന്നു. 

മലയാള സിനിമയുടെ അഭിമാനമായ നടനാണ് ഫഹദ് ഫാസിൽ. അവസാനം ഇറങ്ങിയ വിക്രത്തിൽ വരെ തകർപ്പൻ പ്രകടനം കാഴ്ചവെച്ച് വീണ്ടും ഫഹദ് പ്രേക്ഷകരുടെ പ്രിയങ്കരനായി തീർന്നിട്ടുണ്ട്. തെന്നിന്ത്യയിലെ ഫഹദിന്റെ ഖ്യാ‌തി അറിഞ്ഞ് പലരും ബോളിവുഡിലേക്ക് ഫഹദിനെ ക്ഷണിച്ചിട്ടുണ്ട്. മനോഹരമായ സ്ക്രിപ്റ്റായിരുന്നുവെങ്കിലും താൻ അതിന് യോജിക്കുന്നില്ലെന്ന് തോന്നിയതിനാൽ ഫഹദ് അവസരം വേണ്ടെന്ന് വെച്ചു. സിനിമയുടെ വിവരങ്ങളൊന്നും ഫഹദ് വെളിപ്പെടുത്തിയിട്ടില്ല.

നടി രശ്മിക മന്ദാനയെ ഷാഹിദ് കപൂറിന്റെ ജേഴ്സിയിൽ ഭാ​ഗമാകാൻ ക്ഷണിച്ചിരുന്നു. എന്നാൽ തന്നെകൊണ്ട് ആ കഥാപാത്രം ചെയ്യാൻ കഴിയില്ലെന്ന തോന്നൽ ഉണ്ടായിരുന്നതിനാൽ രശ്മിക ആ അവസരം വേണ്ടെന്ന് വെച്ചു. തെലുങ്കിൽ പുറത്തിറങ്ങിയ നാനി ചിത്രത്തിന്റെ റീമേക്കായിരുന്നു ഷാഹിദിന്റെ ജേഴ്സി.

കെജിഎഫ് താരം യാഷിന് ലാൽ കാപ്റ്റാൻ എന്ന ബോളിവുഡ് സിനിമയിൽ അഭിനയിക്കാൻ ക്ഷണം ലഭിച്ചതായി ഒരിടയ്ക്ക് റിപ്പോർട്ടുകളുണ്ടായിരുന്നു. ലാൽ കാപ്റ്റാിൽ പിന്നീട് അഭിനയിച്ചത് സെയ്ഫ് അലി ഖാനായിരുന്നു.