ഈ വര്‍ഷം റിലീസിനെത്തി ടോപ്പ് റേറ്റിങ്ങ് നേടിയ സിനിമകള്‍; മമ്മൂട്ടിയും പ്രണവ് മോഹന്‍ലാലുമൊക്കെ മിന്നിച്ചു

മെഗാസ്റ്റാര്‍ മമ്മൂട്ടിയെ നായകനാക്കി അമല്‍ നീരദ് സംവിധാനം ചെയ്ത സൂപ്പര്‍ഹിറ്റ് മൂവിയാണ് ഭീഷ്മപര്‍വ്വം. തിയറ്ററുകളിലും ബോക്‌സോഫീസിലും ഗംഭീര പ്രതികരണം നേടിയ സിനിമയ്ക്ക് ഐഎംഡിബി യില്‍ 7.7 റേറ്റിങ്ങാണ് ലഭിച്ചിരുന്നത്. 

പ്രണവ് മോഹന്‍ലാലിന്റെ മൂന്നാമത്തെ സിനിമ എന്ന പ്രത്യേകതയോടെ എത്തിയ ഹിറ്റ് മൂവിയാണ് ഹൃദയം. കോളേജ് പ്രണയം ആസ്പദമാക്കി വിനീത് ശ്രീനിവാസന്‍ സംവിധാനം ചെയ്ത സിനിമയ്ക്ക് വലിയ സ്വീകരണമാണ് ലഭിച്ചത്. ഐഎംഡിബി റേറ്റിങ്ങില്‍ 8.1 ആണ് ഹൃദയത്തിന് ലഭിച്ചത്. 

ഏറെ കാലത്തിന് ശേഷം പോലീസ് ഓഫീസറുടെ വേഷത്തിലെത്തി സുരേഷ് ഗോപി കൈയ്യടി വാങ്ങിയ ചിത്രമാണ് പാപ്പന്‍. ജോഷി സംവിധാനം ചെയ്ത സിനിമയ്ക്ക് എല്ലായിടത്തും മികച്ച റിപ്പോര്‍ട്ടാണ് ലഭിച്ചത്. ഐഎംഡിബി റേറ്റിങ്ങില്‍ ഏഴിന് മുകൡലാണ് പാപ്പന് ലഭിച്ചത്. 

പൃഥ്വിരാജിന്റെ ഈ വര്‍ഷം റിലീസ് ചെയ്തതില്‍ ശ്രദ്ധേയമായി മാറിയ മൂവിയാണ് ജനഗണമന. പ്രമുഖ താരങ്ങള്‍ അണിനിരന്ന ചിത്രം സാമൂഹ്യ പ്രധാന്യമുള്ള വിഷയമാണ് കൈകാര്യം ചെയ്തത്. 8.3 റേറ്റിങ് നേടി സിനിമ ശ്രദ്ധേയമായി.

ബിഗ് ബജറ്റില്‍ വിനയന്‍ ഒരുക്കി വലിയ വിജയമായി മാറിയിരിക്കുകയാണ് പത്തൊന്‍പതാം നൂറ്റാണ്ട്. സിജു വിത്സന്‍ നായകനായി അഭിനയിച്ച ചിത്രത്തില്‍ വലിയ താരങ്ങളൊന്നുമില്ലെങ്കിലും സിനിമ ഹിറ്റായി. 8.4 ലാണ് പത്തൊന്‍പതാം നൂറ്റാണ്ടിന് ഐഎംഡിബി യില്‍ ലഭിച്ച റേറ്റിങ്.