സീരിയസ്സാണ് ഈ സീരിയൽ കില്ലേർസ്... കേരളക്കരയിൽ തരംഗമായ ചില സീരിയൽ കില്ലർ സിനിമകളെ അറിയാം

വർഷത്തിൽ അനവധി ത്രില്ലറുകൾ ഇറങ്ങുന്ന മലയാള സിനിമയിലും അത്തരം കഥകളും പറയാറുണ്ട്. തുടർ കൊലപാതകങ്ങളുടെ കഥകളുമായി വന്നു ആരാധകരെ പേടിപ്പിക്കുകയും ഞെട്ടിക്കുകയും ചെയ്ത ഒരുപാട് സിനിമകൾ മോളിവുഡിൽ ഉണ്ടായിട്ടുണ്ട്. അവയിൽ പലതും ഇറങ്ങിയ സമയത്ത് ഫ്ലോപ്പ് ആകുകയും പിന്നീട് ടീവിയിലും ഒടിടിയിലും ഇറങ്ങി ഹിറ്റാകുകയും ചെയ്തിട്ടുണ്ട്. അറിയാം മലയാളത്തിലെ ചില സീരിയൽ കില്ലർ സിനിമകൾ

മലയാളത്തിലെ മികച്ച സീരിയൽ കില്ലർ സിനിമകളിൽ ഒന്നാണ് മെമ്മറിസ്. ജീത്തു ജോസഫ് സംവിധാനം ചെയ്ത സിനിമ പൃഥ്വിരാജിന്റെ കരിയർ ബെസ്റ്റ് ആണ്. മികച്ച ട്വിസ്റ്റും ത്രില്ലർ എലമെന്റും അഭിനയവും ചേർന്നപ്പോൾ ഗംഭീര സിനിമയാവാൻ മെമ്മറീസിന് സാധിച്ചു. ചിത്രം ഒരു പോലീസ് ഓഫീസറുടെ ജീവിതത്തിലൂടെയാണ് കഥ പറയുന്നത്.

മോഹൻലാൽ-ബി ഉണ്ണികൃഷ്ണൻ കൂട്ടുകെട്ടിൽ പുറത്തു വന്ന മികച്ച സീരിയൽ കില്ലർ ആയിരുന്നു ഗ്രാൻഡ് മാസ്റ്റർ. കൊലപാതകിയും കുറ്റാന്വേഷകനും തമ്മിൽ ഒരു ചെസ് കളിക്കുന്ന പോലെ കാഴ്ചകാരനെ തോന്നിപ്പിക്കുന്ന കഥ പറച്ചിൽ മികച്ചതായിരുന്നു. ചന്ദ്രശേഖരൻ എന്ന പോലീസ് ഓഫീസർ കഥാപാത്രം മോഹൻലാൽ മികച്ചതാക്കിയിരുന്നു.

സമീപകാലത്തു ഇറങ്ങിയതിൽ മികച്ച സീരിയൽ കില്ലർ സിനിമയാണ് അഞ്ചാം പാതിര. മിഥുൻ മാനുവൽ തോമസ് സംവിധാനം ചെയ്ത സിനിമയിൽ സൈക്കോളജിസ്റ്റിന്റെ വേഷം കുഞ്ചാക്കോ ബോബൻ മികച്ചതാക്കി. ചിത്രത്തിലെ വില്ലൻ വേഷം നടൻ ഷറഫുദ്ദീൻ ഗംഭീരമായി തന്നെ ചെയ്തു.

ടോവിനോ തോമസ് ഫോറൻസിക് ഉദ്യോഗസ്തനായി വന്നു കൊലപാതകിയെ കണ്ടെത്തുന്ന സിനിമയിരുന്നു ഫോറൻസിക്. ആവറേജ് അനുഭവം നൽകിയ സിനിമ മികച്ച സീരിയൽ കില്ലർ കഥയാണ് പറഞ്ഞിരുന്നത്. ചിത്രം ഹിന്ദിയിലേക്ക് അക്ഷയ് കുമാർ റീമേക്ക് ചെയ്തിരുന്നു.

പദ്മരാജൻ എഴുതി ജോഷി സംവിധാനം ചെയ്ത സിനിമയായിരുന്നു ഈ തണുത്ത വെളുപ്പാൻ കാലത്ത്. മമ്മൂട്ടി പോലീസ് കഥാപാത്രമായി വന്ന് സീരിയൽ കില്ലർ സിനിമയിൽ വില്ലൻ വേഷം ചെയ്തിരുന്നത് നെടുമുടി വേണു ആയിരുന്നു. മലയാളത്തിലെ മികച്ച ത്രില്ലറുകളിൽ ഒന്നാണ് ഇത്. പദ്മരാജന്റെ തിരക്കഥ സിനിമയ്ക്ക് വലിയ രീതിയിൽ മൈലേജ് നൽകിയിരുന്നു.

മലയാളത്തിൽ വ്യത്യസ്ത ജോണർ പരീക്ഷിച്ച സിനിമയായിരുന്നു വിന്റർ. ജയറാം, ഭാവന തുടങ്ങിയവർ അഭിനയിച്ച സിനിമ ഇന്നും കാഴ്ചക്കാരിൽ ഞെട്ടലുളവാക്കാറുണ്ട്. റിപ്പർ കഥാപാത്രം വില്ലൻ ആയി വന്ന സിനിമയിൽ ഡാർക്ക് സീനുകളും ഹൊറാർ സീനുകളും ഒരുപാടുണ്ട്. ഒരു പരീക്ഷണ ചിത്രം ആയിരുന്നതിനാൽ തിയേറ്ററിൽ വലിയ പരാജയം നേരിടേണ്ടി വന്നു.

മോഹൻ സംവിധാനം ചെയ്ത മുഖം റിലീസ് ചെയ്യുന്നത് 1990ൽ ആണ്. മോഹൻലാൽ നായകനായ ത്രില്ലർ സിനിമ സീരിയൽ കൊലപാതകങ്ങളെ കുറിച്ചാണ്. സൈക്കോപാത്ത് ആയ കൊലപാതകിയെ തേടുന്ന ഹരിപ്രസാദ് ആണ് മോഹൻലാൽ. മികച്ച കുറ്റാന്വേഷണ സിനിമ ഇന്നും റിപീറ്റ് വാല്യൂ ഉള്ള ചിത്രമാണ്.

മോഹൻലാൽ-പ്രിയദർശൻ കൂട്ടുകെട്ടിൽ വന്ന മികച്ച ത്രില്ലർ ആയിരുന്നു ഒപ്പം. അന്ധനായ നായകനായി മോഹൻലാൽ വന്നപ്പോൾ സീരിയൽ കില്ലർ ആയ വില്ലനായി തമിഴ് നടൻ സമുദ്രക്കനി ആയിരുന്നു. മേക്കിങ് കൊണ്ട് കഥപറച്ചിലുകൊണ്ടും മികച്ച സിനിമ തന്നെയാണ് ഒപ്പം.