'ഫിറ്റ്നസ് മുഖ്യം.... നോ കോംപ്രമൈസ്'; മലയാള സിനിമയിലെ ഫിറ്റ്നസ് ഫ്രീക്ക്സായ താരങ്ങൾ!

ഫിറ്റ്‌നസിൻറെ കാര്യത്തിൽ ഒട്ടും വിട്ടുവീഴ്ചയില്ലാത്ത യുവ താരമാണ് ടൊവിനോ തോമസ്. കൃത്യമായി ഫിറ്റ്നസ് നിലനിർത്തുന്നുവെന്ന് മാത്രമല്ല ഫിറ്റ്നസിൽ പല പരീക്ഷണങ്ങൾക്ക് മുതിരാനും തയ്യാറാണ് താരം. താരത്തിന്റെ അത്തരം ജിം വർക്കൗട്ട് വീഡിയോകൾ പലപ്പോഴായി വൈറലായിട്ടുണ്ട്. 

ഫിറ്റ്നസിന്റെ കാര്യത്തിൽ മലയാള സിനിമ നടന്മാരിൽ ഉണ്ണി മുകുന്ദൻ മുന്നിൽ തന്നെയുണ്ട്. തന്റെ ഡയറ്റ് പ്ലാൻ ആരാധകർക്കായി പങ്കുവെക്കാറുമുണ്ട് താരം. മസിലെന്ന് കേട്ടാൽ മലയാളികളുടെ മനസിലേക്ക് ആദ്യം വരുന്ന മുഖവും ഉണ്ണി മുകുന്ദന്റേതാണ്. മേപ്പടിയാൻ എന്ന സിനിമയ്ക്കായി ഉണ്ണി മുകുന്ദൻ 20 കിലോയിലധികം ശരീര ഭാരം കൂട്ടിയിരുന്നു. ഷൂട്ടിങിന് ശേഷം ശരീര ഭാരം കുറച്ച് പഴയ ലുക്കിലേക്ക് എത്തുകയും ചെയ്തിരുന്നു താരം. 

മലയാള സിനിമയിലെ സുന്ദരന്മാരായ വില്ലന്മാരിൽ ഒരാളാണ് റിയാസ് ഖാൻ. നിരവധി ചിത്രങ്ങളിൽ വില്ലനായി തിളങ്ങിയ താരം വളരെ പെട്ടന്ന് തന്നെ പ്രേഷകരുടെ പ്രിയങ്കരനായി മാറുകയായിരുന്നു. മലയാള സിനിമയിൽ ഒരു പക്ഷെ ഏറ്റവും കൂടുതൽ ശരീര സൗന്ദര്യം ഉള്ള വില്ലൻ റിയാസ് ഖാനാണെന്ന് തന്നെ പറയാം. ഇന്നും ചെറുപ്പം കാത്ത് സൂക്ഷിക്കാൻ റിയാസ് പ്രത്യേകം ശ്രദ്ധിക്കാറുണ്ട്. 

എഴുപതാം  വയസിലും യുവാക്കളെ പോലും മോഹിപ്പിക്കുന്ന ഗ്ലാമർ സൂക്ഷിക്കുന്ന താരമാണ് മമ്മൂട്ടി. ആരെയും മോഹിപ്പിക്കുന്ന താങ്കളുടെ സൗന്ദര്യത്തിനും ഫിറ്റ്‌നസ്സിനും പിന്നിലെ രഹസ്യമെന്താണ് എന്ന ചോദ്യം അഭിമുഖങ്ങളിലും മറ്റും നിരവധി തവണ മമ്മൂട്ടിയ്ക്ക് അഭിമുഖീകരിക്കേണ്ടി വന്നിട്ടുണ്ട്. എന്നാൽ ആ സൗന്ദര്യത്തിനും ഗ്ലാമറിനും പിന്നിൽ യാതൊരുവിധ കുറുക്കു വഴികളുമില്ലെന്നും വർഷങ്ങളായി താരം പിന്തുടരുന്ന ആരോഗ്യപരമായ ജീവിതരീതിയും വർക്ക് ഔട്ടും തന്നെയാണ് മമ്മൂട്ടിയുടെ നിത്യയൗവ്വനത്തിന് പിന്നിൽ.

മുൻനിര താരങ്ങളെല്ലാം ജിം ബോഡി വികസിപ്പിച്ചെടുത്ത് അഭിനയിക്കാൻ തുടങ്ങിയ കാലത്തിനും മുമ്പ് മലയാളിയുടെ മസിൽ സങ്കൽപ്പങ്ങളിൽ ഇടം നേടിയ മുഖമാണ് നടൻ അബു സലീമിന്റേത്. അക്കാലത്ത് ബാബു ആന്റണി, അബു സലിം എന്നിങ്ങനെ ചുരുക്കം ചിലരാണ് അഭിനയത്തിലും മസിൽ ബലത്തിലും സിനിമയിൽ തിളങ്ങിയ അഭിനേതാക്കൾ. അറുപത്താറാം വയസിലും അബു സലീമിന്റെ ബോഡി ഫിറ്റ്നസിന്റെ കാര്യത്തിൽ പെർഫെക്ടാണ്.