കരീന-കത്രീന വഴക്ക് തീര്‍ന്നു?

സല്‍മാന്‍ നായകനായ ബോഡിഗാര്‍ഡ് എന്ന ചിത്രത്തില്‍ കത്രീന ഐറ്റം നമ്പര്‍ ചെയ്തത് കരീനയ്‌ക്കൊട്ടും പിടിച്ചില്ല. കത്രീനയുടെ ഐറ്റം ഡാന്‍സ് മൂലം തന്റെ പ്രകടനം ശ്രദ്ധിക്കപ്പെടാതെ പോകുമോ എന്നായിരുന്നു കരീനയുടെ പേടി. അതിന്റെ പേരില്‍ കരീന കത്രീനയോട് വഴക്കിട്ടുവെന്ന് ബി ടൗണ്‍ പാപ്പരാസികള്‍ പറഞ്ഞു പരത്തുകയും ചെയ്തു.

എന്നാല്‍ ഇരുവരും തമ്മില്‍ രമ്യതയിലായെന്നാണ് സൂചന. അടുത്തിടെ നടന്ന ലാക്‌മെ ഫാഷന്‍ വീക്കില്‍ കരീനയും കത്രീനയും കണ്ടുമുട്ടി. ഷോയുടെ അവസാനം കത്രീന ഡിസൈനര്‍ മനീഷ് മല്‍ഹോത്രയ്ക്കും കരീനയ്ക്കും കൈകൊടുത്താണ് പിരിഞ്ഞത്.

ഷോ കഴിഞ്ഞിട്ടും ഇരുവരും തമ്മില്‍ കൈകോര്‍ത്തു പിടിയ്ക്കുകയും സംസാരിയ്ക്കുകയും ചെയ്തിരുന്നു. കത്രീനയുമായി വീണ്ടും സൗഹൃദത്തിലായോ എന്ന് ചോദിച്ചപ്പോള്‍ തങ്ങള്‍ മുന്‍പും നല്ല സുഹൃത്തുക്കളായിരുന്നുവെന്നാണ് കരീന പറഞ്ഞത്. ഒരു കാര്യം എന്തായാലും വ്യക്തമാണ്. സിനിമാലോകത്ത് ആരും സ്ഥിരമായി ശത്രുക്കളോ മിത്രങ്ങളോ അല്ല.