ബോഡിഗാര്‍ഡ് ബോളിവുഡില്‍

ബോഡിഗാര്‍ഡിന്റെ ഹിന്ദി റീമേക്കുമായി സംവിധായകന്‍ സിദ്ദിഖ് ബോളിവുഡിലേക്ക് നീങ്ങുന്നു. വിജയ്-അസിന്‍ ടീമിനെ വെച്ച് ബോഡിഗാര്‍ഡിന്റെ തമിഴ് പതിപ്പ് ഒരുക്കുന്നതിന്റെ തിരക്കിലാണ് സിദ്ദിഖ്. ഇതിന് ശേഷമായിരിക്കും സംവിധായകന്റെ ബോളിവുഡ് രംഗപ്രവേശം.

മലയാളത്തില്‍ ദിലീപ് അവതരിപ്പിച്ച കഥാപാത്രം ഹിന്ദിയില്‍ സല്‍മാന്‍ ഖാന്‍ അവതരിപ്പിയ്ക്കും. തമിഴിലും ഹിന്ദിയിലും അസിന്‍ തന്നെയായിരിക്കും നായിക. സല്‍മാന്റെ പ്രൊഡക്ഷന്‍ കമ്പനി തന്നെയായിരിക്കും ചിത്രം നിര്‍മ്മിയ്ക്കുക.

സിദ്ദിഖിന്റെ ഹിറ്റ് ചിത്രങ്ങളുടെ റീമേക്കിലൂടെ ബോളിവുഡില്‍ വെന്നിക്കൊടി പാറിച്ച പ്രിയദര്‍ശന്റെ പാത പിന്തുടര്‍ന്നാണ് സിദ്ദിഖ് ഹിന്ദി സിനിമയിലെത്തുന്നത്. ഒരു പക്ഷേ സിദ്ദിഖിന്റെ ബോളിവുഡ് പ്രവേശം ഏറ്റവുമധികം ഭീഷണി ഉയര്‍ത്തുക പ്രിയന് തന്നെയായിരിക്കും.