പ്രിയങ്കയുടേയും ക്യാറ്റിന്റേയും നൃത്തം അനാവശ്യം

തന്റെ ചിത്രങ്ങളില്‍ മറ്റൊരു നായിക കൂടി ഉണ്ടാകുന്നത് ബോളിവുഡ് സുന്ദരി കരീന കപൂറിന് തീരെ ഇഷ്ടമല്ല. അതുകൊണ്ടു തന്നെ രണ്ടു നായികമാര്‍ ഉള്ള സിനിമകള്‍ തിരഞ്ഞെടുക്കാതിരിയ്ക്കാന്‍ കരീന പ്രത്യേകം ശ്രദ്ധിക്കാറുമുണ്ട്. എന്നാല്‍ അടുത്തിടെ കരീന അഭിനയിച്ച രണ്ടു ചിത്രങ്ങളില്‍ കത്രീന കൈഫും പ്രിയങ്ക ചോപ്രയും ഗസ്റ്റ് റോളില്‍ വരികയുണ്ടായി. ഒരു ഐറ്റം നമ്പറിലൂടെയാണ് ഇരുവരും കരീനയുടെ ചിത്രത്തില്‍ നുഴഞ്ഞുകയറിയത്. കരീനയ്ക്ക് കലി വരാന്‍ ഇതില്‍ കൂടുതലെന്തെങ്കിലും വേണോ?

കത്രീനയുടേയും പ്രിയങ്കയുടേയും ഐറ്റം നമ്പര്‍ മൂലം ചിത്രം കാണുന്നവര്‍ തന്റെ പ്രകടനം ശ്രദ്ധിക്കാതെ പോയാലോ എന്നായിരുന്നത്രേ കരീനയുടെ പേടി. ഇതിന്റെ പേരില്‍ ഇരുവരുമായും കരീന ഉടക്കിയെന്ന് വാര്‍ത്തയുണ്ടായിരുന്നു.

അടുത്തിടെ ഒരു പത്രത്തിന് നല്‍കിയ അഭിമുഖത്തില്‍ യാതൊരാവശ്യവുമില്ലാതെയാണ് കത്രീനയുടേയും പ്രിയങ്കയുടേയും ഐറ്റം ഡാന്‍സ് തന്റെ ചിത്രങ്ങളില്‍ ഉള്‍പ്പെടുത്തിയതെന്ന് ബെബോ തുറന്നടിച്ചു. ഒപ്പം അവരുടെ ഡാന്‍സിന് തന്റെ കഥാപാത്രത്തിന്റെ പ്രാധാന്യം കുറയ്ക്കാനാകില്ലെന്നും കരീന പറഞ്ഞു. സല്‍മാന്‍ ഖാന്റെ ബോഡിഗാര്‍ഡിലും ഷാരൂഖിന്റെ രാ വണിലും തനിയ്ക്ക് മികച്ച കഥാപാത്രങ്ങളെ ലഭിച്ചെന്നും അതില്‍ സംതൃപ്തയാണെന്നും കരീന പറയുന്നു.