'ഐശ്വര്യയ്ക്ക് ഏറ്റവും മാച്ച് രജനി അങ്കിളാണ്, ഹൃത്വിക്കിന് സൗന്ദര്യം കൂടുതലാണ്'; അഭിഷേക് ബച്ചൻ

ജീവിതത്തിലെ ചെറുതും വലുതുമായ എല്ലാക്കാര്യങ്ങളിലും പരസ്പരം താങ്ങായും തണലായും ഒന്നിച്ച് നീങ്ങുന്നവർ കൂടിയാണ് ഐശ്വര്യയും അഭിഷേകും. അഭിഷേക് ബച്ചനും ഐശ്വര്യ റായിയും 2010ൽ ബോളിവുഡിലെ പ്രശസ്തമായ ചാറ്റ് ഷോ കോഫി വിത്ത് കരണിന്റെ സീസൺ 3യിൽ പ്രത്യക്ഷപ്പെട്ടിരുന്നു.

റാപ്പിഡ് ഫയർ റൗണ്ടിനിടെ കരൺ അഭിഷേകിനോട് ഒരു ചോദ്യം ചോദിച്ചിരുന്നു. അഭിഷേകല്ലാതെ ഐശ്വര്യയ്‌ക്കൊപ്പം ഏറ്റവും മികച്ച ഓൺ-സ്‌ക്രീൻ കെമിസ്ട്രി ആരുടേതാണ് എന്നായിരുന്നു കരൺ ജോഹർ ചോദിച്ചത്.

ഷാരൂഖ് ഖാൻ, ഹൃത്വിക് റോഷൻ, രജനികാന്ത് എന്നിങ്ങനെ മൂന്ന് ഓപ്ഷനുകളും അഭിഷേകിന് കരൺ നൽകി. അതിൽ നിന്നും അഭിഷേക് രജനികാന്തിന്റെ പേരാണ് തെരഞ്ഞെടുത്തത്.

ആ പേര് തെര‍ഞ്ഞെടുക്കാൻ അഭിഷേക് പറഞ്ഞ കാരണമാണ് ഇപ്പോൾ വർഷങ്ങൾക്ക് ശേഷം വീണ്ടും ചർച്ചയാകുന്നത്. 'ഞാൻ ഹൃത്വിക് റോഷനും ഐശ്വര്യയും ജോഡികളാകുന്നത് കണ്ടിട്ടുണ്ട്.'

'അവർ ഒരു നല്ല ജോഡിയാണെന്ന് ഞാൻ കരുതുന്നു. പക്ഷേ നിർഭാഗ്യവശാൽ ആ ജോഡി വലിയ അത്ഭുതമാകില്ല.'

'കാരണം ലോകത്തിലെ ഏറ്റവും സൗന്ദര്യമുള്ള പുരുഷനാണ് ഹൃത്വിക്ക് റോഷൻ. അദ്ദേഹം നിൽക്കുമ്പോൾ ആ സൗന്ദര്യമാണ് ആസ്വദിക്കപ്പെടുക ഇവരുടെ ജോഡിയല്ല. ഷാരൂഖിനൊപ്പവും ഐശ്വര്യ പെയറായാൽ നല്ലതൊക്കെയാണ്. ഒരു റോ എനർജിയുണ്ട് ഇരുവർക്കുമിടയിൽ.'

'പക്ഷെ എനിക്ക് തോന്നുന്നു രജനി അങ്കിളും ഐശ്വര്യയുമാകുമ്പോൾ ആ ജോഡി അതിശയിപ്പിക്കുന്നുവെന്നാണ്. റോബോട്ട് സിനിമ ഞാൻ അതുകൊണ്ട് വളരെ ഇഷ്ടപ്പെടുന്നു' അഭിഷേക് പറഞ്ഞു.

2018ൽ ചലച്ചിത്ര സംവിധായൻ ഷൂജിത് സിർക്കറുമൊത്തുള്ള ഒരു പരിപാടിയിൽ അഭിഷേക് ബച്ചൻ ശമ്പള തുല്യതയെക്കുറിച്ച് സംസാരിക്കുകയും ഭാര്യ ഐശ്വര്യ റായ് ബച്ചൻ തന്നേക്കാൾ കൂടുതൽ പ്രതിഫലം വാങ്ങുന്നുവെന്ന് വെളിപ്പെടുത്തുകയും ചെയ്തിരുന്നു.

അവർ ഒരുമിച്ച് ചെയ്ത ഒമ്പത് സിനിമകളിൽ എട്ടെണ്ണത്തിലും ഐശ്വര്യയുടെ പ്രതിഫലം തന്നേക്കാൾ കൂടുതലാണെന്ന് അഭിഷേക് പറഞ്ഞിരുന്നു.

ബോബ് ബിശ്വാസാണ് ഏറ്റവും അവസാനം തിയേറ്ററുകളിലെത്തിയ അഭിഷേക് സിനിമ. ഐശ്വര്യറായിയുടേതായി റിലീസിന് തയ്യാറെടുക്കുന്നത് പൊന്നിയൻ സെൽവനാണ്.

ചിത്രത്തിന്റേതായി പുറത്തിറങ്ങിയ ടീസറിന് മികച്ച സ്വീകാര്യതയാണ് പ്രേക്ഷകരിൽ നിന്നും ലഭിച്ചത്. മണിരത്നം സിനിമകളിലെ സ്ഥിരം സാന്നിധ്യമാണ് ഐശ്വര്യ റായി.