'സെയ്ഫ് ജനസംഖ്യയിലേക്ക് ഒരുപാട് സംഭാവന നൽകിക്കഴിഞ്ഞു'; ​ഗർഭിണിയാണെന്ന വാർത്തകളോട് പ്രതികരിച്ച് കരീന

കരിയർ വുമണായി അറിയപ്പെടുന്ന കരീന വിവാഹ ശേഷവും കുട്ടികളായതിന് ശേഷവും മുൻ നിര നായികയായി നിരവധി സിനിമകളിൽ അഭിനയിച്ച് വരികയാണ്. തെെമൂർ അലി ഖാൻ, ജെഹാൻ​ഗീർ അലി ഖാൻ എന്നീ രണ്ട് കുട്ടികളാണ് കരീനയ്ക്കും സെയ്ഫിനുമുള്ളത്. നിലവിൽ യൂറോപ്പിൽ വെക്കേഷൻ ആഘോഷിക്കുകയാണ് സെയ്ഫും കരീനയും. ഇവരുടെ നിരവധി ചിത്രങ്ങളും ഇതിനകം പുറത്തു വന്നിരുന്നു.

ഇതിനു പിന്നാലെ കരീന കപൂർ മൂന്നാമതും ​ഗർഭിണിയാണെന്ന ​അഭ്യൂഹങ്ങൾ ബി ടൗണിൽ പരന്നിരുന്നു. യൂറോപ്യൻ യാത്രയിൽ നിന്നുള്ള ചിത്രങ്ങളിൽ കരീനയുടെ വയറ് ചൂണ്ടിക്കാണിച്ചായിരുന്നു ഈ ​ഗോസിപ്പ് പരന്നത്. ഇപ്പോൾ ഇതേക്കുറിച്ച് കരീന കപൂർ തന്നെ പ്രതികരിച്ചിരിക്കുകയാണ്. താൻ ​ഗർഭിണിയല്ലെന്നാണ് കരീന പറയുന്നത്.

താൻ പാസ്തയും വൈനും കഴിച്ചത് കൊണ്ടാണ് വയറ് ചാടിയതെന്നും കരീന പറയുന്നു. ​'ഗയ്സ് അത് പാസ്തയും വൈനുമാണ്. ഞാൻ ​ഗർഭിണിയല്ല. ശാന്തരാവൂ. രാജ്യത്തെ ജനസംഖ്യയിലേക്ക് താൻ ഇപ്പോൾ തന്നെ വളരെക്കൂടുതൽ സംഭാവന നൽകിയെന്നാണ് സെയ്ഫ് പറയുന്നത്,' കരീന കപൂർ ഇൻസ്റ്റ​ഗ്രാം സ്റ്റോറിയിൽ കുറിച്ചതിങ്ങനെ. ദിവസങ്ങളായി നീണ്ടു നിന്ന അഭ്യൂഹങ്ങളാണ് കരീന ഇപ്പോൾ അവസാനിപ്പിച്ചിരിക്കുന്നത്.

2012 ഒക്ടോബർ 16 നാണ് സെയ്ഫും കരീനയും വിവാഹിതരായത്. 2016 ലാണ് ഇവരുടെ മൂത്തമകൻ തൈമൂർ അലി ഖാൻ ജനിക്കുന്നത്. 2021 ൽ രണ്ടാമത്തെ മകൻ ജഹാം​ഗീറും ജനിച്ചു. സെയ്ഫിന്റെ രണ്ടാം വിവാഹമായിരുന്നു ഇത്. നടി അമൃത സിം​ഗിനെയാണ് സെയ്ഫ് ആദ്യം വിവാഹം കഴിച്ചിരുന്നത്. 2004 ൽ ഇരുവരും ഈ ബന്ധം അവസാനിപ്പിച്ചു.

ഈ ബന്ധത്തിൽ ഇരുവർക്കും സാറ അലി ഖാൻ, ഇബ്രാഹിം അലി ഖാൻ എന്നീ രണ്ട് മക്കളുമുണ്ട്. 26 കാരിയായ സാറ ഇതിനോടകം ഒരുപിടി ബോളിവുഡ് സിനിമകളിൽ അഭിനയിച്ച് കഴിഞ്ഞു. അത്രം​ഗി രെ, കൂലി നമ്പർ വൺ, സിംമ്പ, ലൗ ആജ് കൽ, കേദർ നാഥ് തുടങ്ങിയവയാണ് സാറ അലി ഖാൻ നായികയായെത്തിയ സിനിമകൾ. സഹോദരൻ ഇബ്രാഹിം അലി ഖാനും ബോളിവുഡ് അരങ്ങേറ്റത്തിനുള്ള തയ്യാറെടുപ്പിലാണ്.

Recommended Video

Dr. Robin Crazy Fan Girl: റോബിനെ കാണാൻ മഴയത്തും എത്തിയ ഫാൻ ഗേൾ | *BiggBoss

ആമിർ ഖാനോടൊപ്പം അഭിനയിക്കുന്ന ലാൽ സിം​ഗ് ഛദ്ദയാണ് കരീനയുടെ പുറത്തിറങ്ങാനുള്ള സിനിമ. ഹോളിവുഡ് സിനിമ ഫോറസ്റ്റ് ​ഗംപിന്റെ ഹിന്ദി റീമേക്കാണ് ചിത്രം. ആ​ഗസ്റ്റ് 11 ന് ലാൽ സിം​ഗ് ഛദ്ദ റിലീസ് ചെയ്യും. ഇതിനു പുറമെ ഒടിടി പ്ലാറ്റ്ഫോമിലേക്കും കരീന അരങ്ങേറ്റം കുറിക്കുകയാണ്.

ജപ്പാനീസ് നോവൽ ദ ഡിവോഷൻ ഓഫ് സസ്പെക്ട് എക്സിനെ ആധാരമാക്കി ഒരുക്കുന്ന പ്രൊജക്ടിലാണ് നടി എത്തുന്നത്. ഇതിന്റെ ചിത്രീകരണം പൂർത്തിയായി. സുജോയ് ഘോഷ് ആണ് ചിത്രത്തിന്റെ സംവിധാനം നിർവഹിച്ചിരിക്കുന്നത്.