'38-ാം വയസിൽ ആദ്യമായി ​ഗർഭിണിയായി, ഏഴാം മാസം വലിയ വയറും വെച്ച് ക്രിക്കറ്റ് ഷോ അവതരിപ്പിച്ചു'; മന്ദിരാ ബേദി

മന്ദിരാ ബേദിയുടെ ഭർത്താവും സംവിധായകനുമായ രാജ് കൗശൽ അടുത്തിടെയാണ് അന്തരിച്ചത്. ഹൃദയാഘാതത്തെ തുടർന്നായിരുന്നു രാജ് കൗശലിന്റെ അന്ത്യം. അകാല വിയോഗം എല്ലാവരെയും സങ്കടത്തിലാക്കിയിരുന്നു. രാജ് കൗശലിനെ കുറിച്ചുള്ള വൈകാരികമായ മന്ദിരാ ബേദിയുടെ കുറിപ്പ് വൈറലായിരുന്നു. മന്ദിരാ ബേദിയും രാജ് കൗശലും 1999ലാണ് വിവാഹിതരായത്. 1996ൽ ആണ് ഇരുവരും കാണുന്നതും പരിചയത്തിലാകുന്നതും പിന്നീട് മൂന്ന് വർഷത്തോളം പ്രണയിച്ചു. പന്ത്രണ്ട് വർഷത്തെ കാത്തിരിപ്പിന് ശേഷമാണ് ആദ്യത്തെ കുഞ്ഞ് ഇരുവർക്കും ജനിച്ചത്. 2011 ജൂൺ 17ന് ആയിരുന്നു ഇരുവരുടേയും ഇടയിലേക്ക് മകൻ വീർ എത്തിയത്. ശേഷം ഇരുവരും 2020 ജൂലൈയിൽ താര എന്ന മകളെ ദത്തെടുക്കുകയും ചെയ്‍തിരുന്നു. മന്ദിരാ ബേദി മുപ്പത്തിയെട്ടാം വയസിലാണ് മകനെ ​ഗർഭം ധരിച്ചത്. ​ഗർഭിണിയായിരിക്കെ തന്നെ അവതാരകയായും ജോലി ചെയ്തു.

'പ്രായമാകുന്തോറും ഗർഭിണിയാകാനും സുരക്ഷിതമായ പ്രസവം നടത്താനും ബുദ്ധിമുട്ടാണ്. എന്നെ സംബന്ധിച്ചിടത്തോളം അതിന്റെ ബയോളജിക്കൽ ക്ലോക്ക് ഭാഗം കൂടുതലായിരുന്നു. എന്റെ എല്ലാ സുഹൃത്തുക്കൾക്കും കുട്ടികളുണ്ടായിരുന്നു. പിന്നെ ഇടയ്ക്കിടെ അമ്മായിമാരും മാതാപിതാക്കളും എപ്പോഴാണ് നിങ്ങൾ ഞങ്ങൾക്ക് നല്ല വാർത്ത നൽകുന്നത്? എന്ന് ചോദിക്കും. 38 വയസ്സുള്ളപ്പോൾ ഞാൻ ഗർഭിണിയായി. 39 ആം വയസ്സിൽ ഞാൻ പ്രസവിച്ചു. മകന് പൂർണ ആരോ​ഗ്യവാനാണ്. പിന്നീട് മകൾ ഞങ്ങളുടെ ജീവിതത്തിലേക്ക് വന്നത്. ഒരു വലിയ അനുഗ്രഹം പോലെ അവൾ തങ്ങളുടെ ജീവിതത്തിലേക്ക് വന്നു. ഞങ്ങളുടെ കുഞ്ഞു മകളാണ് നാല് വയസുകാരി താര. വീറിന്റെ കു‍ഞ്ഞ് അനിയത്തിയാണ്. മധ്യപ്രദേശിൽ നിന്നാണ് അവൾ ‍ഞങ്ങളുടെ അടുത്തേക്ക് വന്നത്. ഇന്നവൾ നന്നായി ഇം​ഗ്ലീഷ് സംസാരിക്കും.'

'​ഗർഭിണിയായിരുന്നപ്പോഴും ഞാൻ ജോലിയിൽ വ്യാപൃതയായിരുന്നു. എനിക്ക് ജോലി ഇഷ്ടമാണ്. എന്റെ ജോലി എന്നെ നിർവചിക്കുന്നു. ഏത് സമയത്തും ഞാൻ ഉദ്ദേശിച്ചത് പോലെയായിരുന്നു. ഞാൻ ഗർഭിണിയാണെന്ന് ഞാൻ ചാനലിനോട് പറഞ്ഞു. അന്ന് അവർ എന്നോട് പറഞ്ഞു നിങ്ങൾ സാരി ധരിക്കു... നിങ്ങൾ ഈ സ്റ്റൂളുകളിൽ ഇരിക്കുന്നു... നിങ്ങൾ ഗർഭിണിയാണെന്ന് ആർക്കും പറയാൻ കഴിയില്ല. എനിക്ക് അതിൽ പ്രശ്‌നമുണ്ടായിരുന്നു എന്നല്ല.. ഗർഭിണിയായിരിക്കുമ്പോൾ ഒരു ക്രിക്കറ്റ് ഷോ ഹോസ്റ്റ് ചെയ്യുന്നത് നിങ്ങൾ തന്നെ ഒന്ന് സങ്കൽപ്പിച്ച് നോക്കൂ... വളരെ ഗ്ലാമറസ് ലുക്ക് അല്ല എന്തായാലും. ഞാൻ അല്പം തടിയുള്ള പെൺകുട്ടിയായി തോന്നുമായിരുന്നു. പക്ഷേ എനിക്ക് ഒരു ഇടവേള എടുക്കാൻ ആഗ്രഹമില്ലാത്തത് കൊണ്ടാണ് അപ്പോഴും ജോലിക്ക് പോയത്' മന്ദിര ബേദി പറഞ്ഞു.