ഹോം

ബോളിവുഡ്

ബോളിവുഡിൽ വ്യത്യസ്തവും ശക്തവുമായ കഥാപാത്രങ്ങൾ തെരെഞ്ഞെടുക്കുന്നതിൽ അതീവ ശ്രദ്ധ പുലർത്തുന്ന നടിയാണ് വിദ്യ ബാലൻ. വിവാഹം കഴിഞ്ഞുവെങ്കിലും സിനിമയിൽ സജീവ സാന്നിധ്യമായി വിദ്യയുണ്ട്. ഒപ്പം ശക്തമായ പിന്തുണയുമായി ഭർത്താവ് സിദ്ധാർത്ഥും. 2003ൽ സിനിമയിൽ അരങ്ങേറ്റം കുറിച്ച വിദ്യയ്ക്ക് 70കളിലെ നായികയാവാനായിരുന്നു എക്കാലത്തേയും ആഗ്രഹം. പാലക്കാട് ജില്ലയിലെ പുത്തൂർ പൂതംകുറിശ്ശിയിലെ ഒരു അയ്യർ കുടുംബത്തിലാണ് വിദ്യ ബാലൻ ജനിച്ചത്. മുംബൈയിലെ ചെമ്പൂരിലെ സെന്റ് ആന്റണീസ് ഗേൾസ് ഹൈസ്കൂളിൽ സ്കൂൾ വിദ്യാഭ്യാസം പൂർത്തിയാക്കി.

തുടർന്ന് സെന്റ് സേവ്യേർസ് കോളേജിൽ സോഷ്യോളജിയിൽ ബിരുദം നേടി. ദി ഡേർട്ടി പിക്ചർ എന്ന ചിത്രത്തിലെ അഭിനയത്തിന് 2011ലെ മികച്ച നടിക്കുള്ള ദേശീയ ചലച്ചിത്ര പുരസ്കാരവും വിദ്യ നേടി. കൂടാതെ 2014ൽ പത്മശ്രീ പുരസ്കാരവും വിദ്യയ്ക്ക് ലഭിച്ചു. ജന്മം കൊണ്ട് മലയാളിയായ വിദ്യയ്ക്ക് കേരളത്തിലും നിരവധി ആരാധകരുണ്ട്. 2012ൽ ആയിരുന്നു വിദ്യയുടെ വിവാഹം നടന്നത്. ലേഡി ഷാരൂഖ് ഖാൻ എന്നാണ് വിദ്യാ ബാലൻ സിനിമാ പ്രേമികൾക്കിടയിൽ അറിയപ്പെടുന്നത്.

'ജൂനിയർ ആർട്ടിസ്റ്റുകൾ പൈസ വാങ്ങാൻ ക്യു നിൽക്കുമ്പോൾ ഞാനും പോയി നിന്നിട്ടുണ്ട്'; 1983 താരം ഭ​ഗത് എബ്രിഡ് ഷൈൻ

വിദ്യ തന്റെ സ്വകാര്യ ജീവിതം പരസ്യപ്പെടുത്താൻ താൽപര്യമില്ലാത്ത സെലിബ്രിറ്റിയാണ്. അടുത്തിടെ വിദ്യ തന്റെ ഭർത്താവായ സിദ്ധാർത്ഥിനെ പ്രശംസിക്കുകയും വിവാഹത്തെക്കുറിച്ചുള്ള തന്റെ ചിന്തകൾ മാറ്റിയത് സിദ്ധാർഥ് ആണെന്ന് തുറന്ന് സമ്മതിക്കുകയും ചെയ്തിരുന്നു. ടൈംസ് ഓഫ് ഇന്ത്യയ്ക്ക് നൽകിയ അഭിമുഖത്തിലാണ് വിദ്യ തന്റെ ഭർത്താവ് സിദ്ധാർത്ഥിനെക്കുറിച്ച് പറഞ്ഞത്. താൻ കണ്ട ഏറ്റവും ക്ഷമയുള്ള ആളുകളിൽ ഒരാളാണ് സിദ്ധാർഥ് എന്ന് വിദ്യ വെളിപ്പെടുത്തി. വിവാഹവും ലിവ് ഇൻ റിലേഷനും ഒന്നാണെന്ന് നേരത്തെ താൻ കരുതിയിരുന്നതായും വിദ്യ വെളിപ്പെടുത്തി.

സിദ്ധാർഥിനെ വിവാഹം കഴിച്ചതിൽ അഭിമാനിക്കുന്നുവെന്നും വിദ്യ കൂട്ടിച്ചേർത്തു. 'എന്റെ ജീവിതത്തിൽ ഞാൻ കണ്ടിട്ടുള്ളതിൽ വെച്ച് ഏറ്റവും ക്ഷമയുള്ള വ്യക്തി സിദ്ധാർത്ഥാണ്. അദ്ദേഹം ഉപദേശം നൽകില്ല. എന്നോട് ഇത് ചെയ്യണമെന്നോ അത് ചെയ്യണമെന്നോ പറഞ്ഞ് പുറകെ നടക്കില്ല. അദ്ദേഹത്തെ എന്റെ പങ്കാളിയായി കിട്ടിയതിൽ ഞാൻ ഭാഗ്യവതിയാണ്. എന്റെ നല്ലതും ചീത്തയുമെല്ലാം അദ്ദേഹം സ്വീകരിക്കുന്നുണ്ട്. ഞങ്ങൾ വിവാഹിതരായി 10 വർഷത്തോളമായി. അ​ദ്ദേഹം കാരണമാണ് ഞാൻ ഇപ്പോൾ വിവാഹമെന്ന പ്രക്രിയയെ അഭിനന്ദിക്കുന്നത്. വൈകി വിവാ​ഹിതയായാലും നല്ലത് തെരഞ്ഞെടുക്കണമെന്ന് ഞാൻ‌ നേരത്തെ ഉറപ്പിച്ചിരുന്നു' വിദ്യ ബാലൻ കൂട്ടിച്ചേർത്തു.

'നിർബന്ധമായും മലയാളം പറയണമെങ്കിൽ അതറിയുന്നവരെ വീട്ടിലേക്ക് കയറ്റിയാൽ പോരെ'; ബി​ഗ് ബോസ് ടീമിനോട് അശ്വതി