സിനിമാ രംഗത്തുനിന്നും ദുരനുഭവം ഉണ്ടായിട്ടുണ്ട്! കാസ്റ്റിംഗ് കൗച്ച് വെളിപ്പെടുത്തലുമായി അതിഥി റാവു

അതിഥിയുടെ വെളിപ്പെടുത്തല്‍

മണിരത്‌നം സംവിധാനം ചെയ്ത കാട്രു വെളിയിടെ, പദ്മാവത് എന്നീ ചിത്രങ്ങളിലൂടെ ശ്രദ്ധേയയായ താരമാണ് അതിഥി റാവു. പ്രജാപതി എന്ന മലയാള ചിത്രത്തിലൂടെ തുടങ്ങിയ അതിഥി ബോളിവുഡ് ചിത്രങ്ങളിലായിരുന്നു കൂടുതലായും അഭിനയിച്ചിരുന്നത്. കാട്രു വെളിയിടെ.പദ്മാവത് തുടങ്ങിയ ചിത്രങ്ങളിലെ കഥാപാത്രങ്ങള്‍ അതിഥിയുടെ കരിയറില്‍ വഴിത്തിരിവുണ്ടാക്കിയിരുന്നു. അടുത്തിടെ നടന്ന ഒരഭിമുഖത്തിലായിരുന്നു സിനിമാ രംഗത്ത് നിന്നും തനിക്കുണ്ടായ ദുരനുഭവത്തെക്കുറിച്ച് അതിഥി റാവു പറഞ്ഞത്. കാസ്റ്റിംഗ് കൗച്ചിനെ എതിര്‍ത്തതിനെ തുടര്‍ന്ന് എട്ടുമാസത്തോളം സിനിമയില്ലാത്ത സാഹചര്യമുണ്ടായതായി അതിഥി പറയുന്നു.

കാസിംഗ് കൗച്ച് സത്യമാണ്

ഈ സാഹചര്യത്തില്‍ മാനസികമായി തളര്‍ന്നു പോയെന്നും വളരെ കഷ്ടപ്പെട്ടാണ് അതില്‍ നിന്നും കരകയറിയതെന്നും അതിഥി പറയുന്നു. സിനിമകള്‍ നഷ്ടപ്പെട്ടപ്പോള്‍ ഒരുപാട് കരഞ്ഞിരുന്നു. എന്നാല്‍ എനിക്കിപ്പോള്‍ അതില്‍ പശ്ചാത്താപമില്ല. സിനിമ പോയതുകൊണ്ട് മാത്രമല്ല കരഞ്ഞത്, സിനിമാ രംഗത്തുളളവര്‍ പെണ്‍കുട്ടികള്‍ക്കെതിരെ ഇങ്ങനെയാണ് സമീപിക്കുന്നതെന്നും കാസ്റ്റിംഗ് കൗച്ച് സത്യമാണെന്നുളളത് തിരിച്ചറിഞ്ഞതു കൊണ്ടുമാണ്.

കാസ്റ്റിംഗ് കൗച്ച് എന്ന കെണി

സിനിമാ രംഗത്ത് സ്ത്രീകള്‍ക്ക് വേര്‍ക്കുളള ഒരു കെണിയാണ് കാസ്റ്റിംഗ് കൗച്ചെന്ന് അതിഥി പറയുന്നു. പലര്‍ക്കും വഴങ്ങിക്കൊടുത്താലേ സിനിമ ലഭിക്കുവെന്ന പേടിയാണ് പലരെയും ഇതിനായി പ്രേരിപ്പിക്കുന്നത്. സ്വയം തീരുമാനമെടുക്കാന്‍ കഴിവുളളവരായി സ്ത്രീകള്‍ മാറണം. സ്വന്തം കഴിവില്‍ വിശ്വാസമുണ്ടെങ്കില്‍ സിനിമകള്‍ നിങ്ങളെ തേടിയെത്തുമെന്നും അതിഥി പറയുന്നു.

ശ്രീറെഡ്ഡിയുടെ വെളിപ്പെടുത്തലുകള്‍

അതിഥിയെ പോലെ തന്നെ ശ്രീറെഡ്ഡിയുടെ വെളിപ്പെടുത്തലുകളും സിനിമാ ലോകത്തെയും പ്രേക്ഷകരെയും ഒന്നടങ്കം ഞെട്ടിപ്പിച്ചിരുന്നു. തെലുങ്ക് സിനിമാ ലോകത്തിനെതിരെ വ്യത്യസ്തമായൊരു പ്രതിഷേധവുമായിട്ടായിരുന്നു ശ്രീറെഡ്ഡി നേരത്തെ രംഗത്തെത്തിയിരുന്നത്. പല മുന്‍നിര നടന്‍മാര്‍ക്കെതിരെയും ശ്രീറെഡ്ഡി ഗുരുതര ആരോപണങ്ങള്‍ ഉന്നയിച്ചിരുന്നു. സിനിമയില്‍ വലിയ അവസരങ്ങള്‍ വാഗ്ദാനം ചെയ്ത് ലൈംഗികമായി ചൂഷണം ചെയ്തുവെന്നായിരുന്നു ശ്രീറെഡ്ഡി പറഞ്ഞിരുന്നത്. തെലുങ്കിനു പുറമെ തമിഴ് സിനിമ രംഗത്തിനെതിരെയും വെളിപ്പെടുത്തലുമായി ശ്രീറെഡ്ഡി രംഗത്തെത്തിയിരുന്നു.

നാനിക്കെതിരെയുളള ആരോപണങ്ങള്‍

തെലുങ്കിലെ മുന്‍നിര താരം നാനിക്കെതിരെയായിരുന്നു ശ്രീറെഡ്ഡി കൂടുതലായും ആരോപണങ്ങള്‍ നടത്തിയിരുന്നത്. മയക്കുമരുന്ന് ഉപയോഗിച്ചാണ് നാനി ഉപദ്രവിച്ചതെന്നായിരുന്നു ശ്രീറെഡ്ഡി പറഞ്ഞിരുന്നത്. മോശം സ്വഭാവക്കാരനാണ് നാനിയെന്നും തന്നെ ബലം പ്രയോഗിച്ച് കീഴടക്കുകയായിരുന്നുവെന്നും നടി പറഞ്ഞിരുന്നു. പല നടിമാരെയും നാനി ഇതുപോലെ ഉപദ്രവിച്ചിരുന്നെന്നും നടി പറഞ്ഞിരുന്നു.