ഇത്തവണ ഐശ്വര്യ റായ് കുടുംബവും ആരാധ്യയുടെ പിറന്നാൾ ആഘോഷിക്കില്ല, കൊവിഡ് മാത്രമല്ല കാരണം....

ആരാധ്യയുടെ എട്ടാം പിറന്നാൾ ബച്ചൻ കുടുംബം വലിയ ആഘോഷമാക്കുകയായിരുന്നു. ബോളിവുഡ് സെലിബ്രിറ്റി കിഡ്സെല്ലാം ആരാധ്യയുടെ പിറന്നാൾ ആഘോഷത്തിന് എത്തിയിരുന്നു. ഡിസ്നി വേൾഡ് മാതൃകയിൽ ആയിരുന്നു പിറന്നാൾ ആഘോഷം. മാലാഖയെ പോലെ അണിഞ്ഞൊരുങ്ങി നിൽക്കുന്ന ആരാധ്യയുടെ ചിത്രങ്ങൾ ഇന്നും സോഷ്യൽ മീഡിയയിൽ വൈറലാണ്.

നവംബർ 16 ന് താരപുത്രിയുടെ 9ാം പിറന്നാളാണ്. എന്നാൽ ഇത്തവണ ഗ്രാൻഡ് പിറന്നാൾ ആഘോഷം താരകുടുംബം സംഘടിപ്പിക്കുന്നില്ലെന്നാണ് പുറത്തു വരുന്ന റിപ്പോർട്ട്. കൊവിഡ് പ്രശ്നവും കുടുംബത്തിലുണ്ടായ അപ്രതീക്ഷിത വിയോഗങ്ങളെ തുടർന്നാണ് ബച്ചൻ കുടുംബം ഇങ്ങനെയൊരു തീരുമാനം എടുത്തത്. കുടുംബാംഗങ്ങൾ മാത്രം പങ്കെടുക്കുന്ന കേക്ക് മുറിക്കുന്ന ചെറിയ ചടങ്ങ് മാത്രമായിരിക്കും ഇക്കുറി.

എല്ലാ വർഷവും സംഘടിപ്പിക്കാറുള്ള ദീപാവലി ആഘോഷവും ഇത്തവണ ബച്ചൻ കുടുംബം സംഘടിപ്പിച്ചില്ലായിരുന്നു. കൊവിഡ് പ്രതിസന്ധി മാത്രമായിരുന്നില്ല അതിന് കാരണം. മകൾ ശ്വേത ബച്ചന്റെ ഭതൃമാതാവ് ഈ വർഷം മരണപ്പെട്ടിരുന്നു. കൂടാതെ നടൻ ഋഷി കപൂറിന്റെ വിയോഗവും ബച്ചൻ കുടുംബത്തെ വളരെ തളർത്തിയിരുന്നു. ഇതിനെ തുടന്നാണ് ഈ വർഷം എല്ലാ ആഘോഷങ്ങളും ഒഴിവാക്കിയത്. നടൻ അഭിഷേക് ബച്ചനും ഇതിനെ സ്ഥിരീകരിച്ച് രംഗത്ത് എത്തിയിട്ടുണ്ട്. സ്പോട്ട് ബോയിയ്ക്ക് നൽകിയ അഭിമുഖത്തിലാണ് ഇക്കാര്യം വെളിപ്പെടുത്തിയത്.

വാർത്ത സ്ഥിരീകരിച്ച അഭിഷേക് ഒരു അഭിമുഖത്തിൽ സ്പോട്ട് ബോയിയോട് പറഞ്ഞു, "ഇത് ശരിയാണ്. ഈ വർഷം ഞങ്ങൾക്ക് കുടുംബത്തിൽ ഒരു മരണം സംഭവിച്ചു. എന്റെ സഹോദരി ശ്വേതയുടെ അമ്മായിയമ്മ (റിതു നന്ദ) അന്തരിച്ചു. കൂടാതെ, ഇതുപോലുള്ള സമയത്ത് പാർട്ടികൾ ആതിഥേയത്വം വഹിക്കുന്നത് ആരാണ്? സമൂഹം എക്കാലത്തെയും മോശമായ പ്രതിസന്ധിയിലൂടെയാണ് കടന്നുപോകുന്നത്. നാമെല്ലാവരും കഴിയുന്നത്ര ശ്രദ്ധിക്കേണ്ടതുണ്ട്. പരമാവധി സാമൂഹിക അകലം നിരീക്ഷിക്കുക എന്നതാണ് ഞങ്ങൾക്ക് ഉള്ള ഏക ഓപ്ഷൻ. അതും അണുബാധയ്ക്കെതിരായ ഒരു ഉറപ്പ് അല്ല. ദീപാവലി പാർട്ടികളും മറ്റ് സാമൂഹിക അവസരങ്ങളും ഇപ്പോൾ ഒരു വിദൂര സ്വപ്നമാണ്. "