'വീട്ടിൽ വരെ വന്നു, പക്ഷെ ഒരു ഉറപ്പ് അവന് കൊടുത്തില്ല'; ഐശ്വര്യയെക്കുറിച്ച് സൽമാന്റെ സഹോദരൻ പറഞ്ഞത്

1997 ലാണ് ഐശ്വര്യയും സൽമാനും പ്രണയത്തിലാവുന്നത്. സഞ്ജയ് ലീല ബൻസാലി ചിത്രമായ ഹം ദിൽ കെ ചുകെ സനം എന്ന സിനിമയുടെ സെറ്റിൽ വെച്ചാണ് ഇരുവരും പ്രണയത്തിലാവുന്നത്. അന്ന് സൊമി അലി എന്ന കാമുകിയുമായി സൽമാൻ വിവാഹിതനാവാൻ പോവുന്നെന്ന അഭ്യൂഹങ്ങൾക്കിടെയായിരുന്നു ഐശ്വര്യയുടെ കടന്ന് വരവ്.

സൽമാൻ ഐശ്വര്യയുമായി അടുത്തതോടെ സൊമി ഈ ബന്ധം ഉപേക്ഷിക്കുകയും അമേരിക്കയിലേക്ക് താമസം മാറുകയും ചെയ്തത്ര. ഇതോടെ സൽമാൻ-ഐശ്വര്യ പ്രണയബന്ധം തുടങ്ങി. സൽമാനുമായുള്ള ബന്ധത്തിന്റെ ഐശ്വര്യയും മാതാപിതാക്കളും തമ്മിൽ തർക്കമുണ്ടായെന്നും ഇതിന്റെ പേരിൽ നടി മറ്റൊരു അപ്പാർട്മെന്റിലേക്ക് താമസം മാറിയെന്നും ഹാൾ ഓഫ് ഫെയിം ഐശ്വര്യ റായ് എന്ന 2004 ലെ പുസ്തകത്തിൽ പരാമർശിച്ചിട്ടുണ്ടായിരുന്നു.

എന്നാൽ അധികം വൈകാതെ തന്നെ ഈ ബന്ധത്തിൽ വിളളലുകൾ വന്നു. സൽമാനും ഐശ്വര്യയും വേർപിരിയുകയും ചെയ്തു. ഇതോടനുബന്ധിച്ച് അന്ന് പല പ്രശ്നങ്ങളും ഉണ്ടായി. സൽമാനുമായുള്ള ബന്ധം ഉപേക്ഷിച്ചെന്ന് പറഞ്ഞ ഐശ്വര്യ അന്ന് നടനെതിരെ നിരവധി ആരോപണങ്ങളും ഉന്നയിച്ചു. സൽമാൻ തന്നെ ശാരീരികമായും മാനസികമായും നിരന്തരം ഉപദ്രവിക്കുകയായിരുന്നെന്നായിരുന്നു ഐശ്വര്യയുടെ ആരോപണം.

'മദ്യപിച്ചുള്ള മോശം പെരുമാറ്റ സമയത്തും ഞാനവന്റെ ഒപ്പം നിന്നു. എനിക്ക് തിരിച്ചു കിട്ടിയത് വാക്കുകളാലും ശാരീരികമായും മാനസികവുമായുള്ള ഉപദ്രവവും അവിശ്വസ്തതയും അനാദരവും ആയിരുന്നു. അതിനാൽ ആത്മാഭിമാനമുള്ള ഏതൊരു സ്ത്രീയെയും പോലെ ഞാനും അവനുമായുള്ള ബന്ധം അവസാനിപ്പിച്ചു,' ഐശ്വര്യ അന്ന് ഇന്ത്യൻ എക്സ്പ്രസുമായുള്ള അഭിമുഖത്തിൽ പറഞ്ഞതിങ്ങനെ.

എന്നാൽ ഐശ്വര്യയുടെ ഈ പ്രസ്താവന സൽമാൻ ഖാന്റെ സഹോദരൻ സൊഹൈൽ ഖാനെ പ്രകോപിപ്പിച്ചു. ഐശ്വര്യക്കെതിരെ ഇദ്ദേഹം രം​ഗത്ത് വരികയും ചെയ്തു. സൽമാനുമായുള്ള ബന്ധത്തെ ഐശ്വര്യ ഒരിക്കലും പരസ്യമായി അം​ഗീകരിച്ചിരുന്നില്ലെന്നും ഇതാണ് സൽമാനെ അശാന്തനാക്കിയതെന്നും സൊഹൈൽ ഖാൻ പറഞ്ഞു.

Recommended Video

ബോളിവുഡ് താര ദമ്പതികളും, പ്രണയ കഥയും | FilmiBeat Malayalam

ഇപ്പോൾ അവൾ പരസ്യമായി കരയുന്നു. അവൾ അവനോടൊപ്പം ചുറ്റിക്കറങ്ങുമ്പോൾ, കുടുംബത്തിലെ ഒരം​ഗത്തെ പോലെ ഞങ്ങളുടെ വീട്ടിൽ വരുമ്പോൾ, എപ്പോഴെങ്കിലും അവൾ ആ ബന്ധം അം​ഗീകരിച്ചിട്ടുണ്ടോ. അവൾ ഒരിക്കലും അത് ചെയ്തില്ല. അത് സൽമാനെ അരക്ഷിതാവസ്ഥയിലാക്കി. അവൾ അവനെ എത്രമാത്രം ആ​ഗ്രഹിക്കുന്നെന്ന് അറിയാൻ അവനാ​ഗ്രഹിച്ചു. പക്ഷെ അതിനൊരിക്കലും അവൾ അനുവദിച്ചില്ല, സൊഹൈൽ ഖാൻ പറഞ്ഞതിങ്ങനെ.

സൽമാന് ശേഷം ഐശ്വര്യ നടൻ വിവേക് ഒബ്റോയിയുമായി പ്രണയത്തിലായിരുന്നു. വിവേക് ഒബ്റോയിയുമായി പ്രണയത്തിലായിരിക്കെയും ഐശ്വര്യ സൽമാൻ ഖാനുമായി നിരന്തരം സംസാരിച്ചിരുന്നെന്നും സൊഹൈൽ ഖാൻ ആരോപിച്ചു. വർഷങ്ങൾക്കിപ്പുറം ഐശ്വര്യ നടൻ അഭിഷേക് ബച്ചനുമായി വിവാ​ഹിതയായി. ഇരുവർക്കും ആരാധ്യ എന്ന മകളുമുണ്ട്. സൽമാൻ ഖാൻ ഇപ്പോഴും അവിവാഹിതനായി തുടരുകയാണ്.