തീവ്രവാദിയാവാന്‍ പറ്റില്ല; ഹോളിവുഡിലേക്കുള്ള ചാന്‍സ് നടന്‍ നാന പടേക്കര്‍ നിഷേധിച്ചതിനെ പറ്റി അനുരാഗ് കശ്യപ്

ഓസ്‌കാര്‍ ജേതാവും ഹോളിവുഡിലെ പ്രശസ്ത നടനുമായ ലിയോനാര്‍ഡോ ഡികാപ്രിയയുടെ കൂടെ അഭിനയിക്കാനുള്ള അവസരമായിരുന്നു നാന പടേക്കറിന് മുന്‍പൊരിക്കല്‍ ലഭിച്ചത്. എന്നാല്‍ കഥാപാത്രമെന്താണെന്ന് കേട്ടതോടെ അദ്ദേഹമത് വേണ്ടെന്നുള്ള തീരുമാനത്തിലേക്ക് എത്തുകയായിരുന്നു.

പിന്നീട് നടന്‍ മാര്‍ക്ക് സ്‌ട്രോങ് അവതരിപ്പിച്ച തീവ്രവാദിയുടെ വേഷമായിരുന്നു നാനയോട് ചെയ്യാനായി അണിയറ പ്രവര്‍ത്തകര്‍ ആവശ്യപ്പെട്ടത്. എന്നാല്‍ തീവ്രവാദിയാവാന്‍ തയ്യാറല്ലെന്ന് പറഞ്ഞാണ് നാന അതില്‍ നിന്നും പിന്മാറിയതെന്നാണ് അനുരാഗ് പറയുന്നത്.

ഹോളിവുഡിലെ പ്രശസ്ത സംവിധായകനായ റിഡ്‌ലി സ്‌കോട്ട് എനിക്കൊരു മെയില്‍ അയച്ചു. നാന പടേക്കറിനെ അദ്ദേഹത്തിന്റെ സിനിമയിലേക്ക് കാസ്റ്റ് ചെയ്യണമെന്നുള്ള ആഗ്രഹം പറഞ്ഞ് കൊണ്ടാണ് ആ മെയില്‍ വന്നത്. ഇക്കാര്യം പറയാനായി ഉടന്‍ തന്നെ ഞാന്‍ നാന പടേക്കറുടെ അടുത്ത് എത്തി. വേഷത്തെ കുറിച്ചുള്ള ചോദ്യത്തിന് കഥാപാത്രത്തെ കുറിച്ച് പറഞ്ഞ് മനസിലാക്കി. എന്നാല്‍ കാര്യം പറഞ്ഞ് കഴിഞ്ഞപ്പോള്‍ ഒരു തീവ്രവാദിയായി അഭിനയിക്കാന്‍ താല്‍പര്യമില്ലെന്നാണ് നാന പറഞ്ഞത്.

അങ്ങനെ റിഡ്‌ലി സ്‌കോട്ട്-ലിയോനാര്‍ഡോ കൂട്ടുകെട്ടിലെത്തിയ ചിത്രത്തില്‍ അഭിനയിക്കാനില്ലെന്ന് പറഞ്ഞ് നാന പടേക്കര്‍ പിന്മാറുകയായിരുന്നു എന്നും അനുരാഗ് വെളിപ്പെടുത്തുന്നു. ഇതേ അഭിമുഖത്തില്‍ ബോളിവുഡ് നടന്‍ അഭിഷേക് ബച്ചനൊപ്പം വര്‍ക്ക് ചെയ്തപ്പോഴുണ്ടായ അനുഭവത്തെ കുറിച്ചും സംവിധായകന്‍ തുറന്ന് സംസാരിച്ചു.

തുടക്ക കാലത്ത് അഭിഷേക് ബച്ചന്‍ വളരെ ക്രൂരമായി പെരുമാറുന്ന സ്വഭാവക്കാരനായിരുന്നു. അമിതാഭ് ബച്ചനൊപ്പം ചെയ്ത യുദ്ധ് എന്ന സിനിമ ചിത്രീകരണത്തിനിടയില്‍ നടന്നൊരു സംഭവത്തെ കുറിച്ചും അനുരാഗ് വെളിപ്പെടുത്തി. 'അഭിഷേക് ബച്ചന്‍ വളരെ കഠിനാധ്വാനിയാണ്.

നല്ല സംസ്‌കാരവും നന്നായി ഭക്ഷണം ഇഷ്ടപ്പെടുകയുമൊക്കെ ചെയ്യുന്ന ആളആണ്. എന്നാല്‍ സിനിമയില്‍ അഭിനയിച്ച് തുടങ്ങിയ ആദ്യ കാലങ്ങളില്‍ വളരെ ക്രൂരനായിരുന്നു. അവന്‍ എല്ലാം ഒരു തമാശയായി കാണുകയും പലതിനെയും കളിയാക്കുകയും ചെയ്തിരുന്നു.

ഓരോ ദിവസം കഴിയും തോറും ആളുകള്‍ വളര്‍ന്ന് കൊണ്ടിരിക്കുകയാണ്. അങ്ങനെ അഭിഷേകും വളര്‍ന്നു. മന്‍മര്‍സിയാന്‍ എന്ന ചിത്രത്തില്‍ അഭിനയിക്കാനെത്തിയ അഭിഷേകും ആദ്യം കണ്ട അഭിഷേകും തമ്മില്‍ വലിയ വ്യത്യാസം വന്നിരുന്നുവെന്നും അനുരാഗ് പറയുന്നു. ഇനി അമിതാഭ് ബച്ചനെ കുറിച്ച് പറയുകയാണെങ്കില്‍ വിമര്‍ശനങ്ങളെ നല്ല രീതിയില്‍ സ്വീകരിക്കുന്ന വ്യക്തിയാണ് അദ്ദേഹമെന്നാണ് സംവിധായകന്‍ പറയുന്നത്.