'ബോളിവുഡിലെ ആദ്യത്തെ അവിവാഹിതനായ അച്ഛൻ, അതൊരു ത്രില്ലായിരുന്നു'; നടൻ തുഷാർ കപൂർ പറയുന്നു!

മുജ്ജെ കുച്ച് കെഹ്‌ന ഹെ എന്ന ഹിന്ദി ചിത്രത്തിലൂടെയാണ് തുഷാർ കപൂർ ചലച്ചിത്ര രംഗത്തേക്ക് കടക്കുന്നത്. ഈ ചിത്രത്തിൽ തുഷാറിൻറെ നായികയായി അഭിനയിച്ചത് കരീന കപൂർ ആയിരുന്നു. ഈ സിനിമയിൽ മികച്ച പുതുമുഖ നടനുള്ള ഫിലിംഫെയർ അവാർഡ് തുഷാറിന് ലഭിക്കുകയുണ്ടായി. ഗയാബ്, കാക്കി എന്നീ സിനിമകൾ കൂടി പിറന്നതോടെ തുഷാർ കപൂറിനെ ജനങ്ങൾ ശ്രദ്ധിക്കാൻ തുടങ്ങി തുടർന്നും ഇദ്ദേഹം ധാരാളം സിനിമകളിൽ അഭിനയിച്ചു. ഡേർട്ടി പിക്ച്ചർ, ​ഗോൽമാൽ അടക്കം നിരവധി സിനിമകളിൽ തുഷാർ കപൂർ അഭിനയിച്ചിട്ടുണ്ട്. നസറുദ്ദീൻ ഷായോടൊപ്പമുള്ള ത്രില്ലർ മാരീചാണ് തുഷാർ കപൂറിന്റെ പുതിയ ചിത്രം. പോലീസ് ഓഫീസറുടെ വേഷത്തിലാണ് തുഷാർ കപൂറെത്തുന്നത്. സറോ​ഗസി എന്ന തീരുമാനത്തിലേക്ക് എത്തിയതിനെ കുറിച്ചും അതിന് കുടുംബത്തിൽ നിന്നും ലഭിച്ച പിന്തുണയെ കുറിച്ചും തുഷാർ വെളിപ്പെടുത്തിയിരിക്കുകയാണ്. മുംബൈയിലെ ജസ്‌ലോക് ആശുപത്രിയിൽവെച്ചായിരുന്നു കുഞ്ഞിന്റെ ജനനം. ബോളിവുഡിലെ ആദ്യത്തെ അവിവാഹിതനായ അച്ഛൻ തുഷാർ കപൂറാണ്.

ശരീരത്തിന് പുറത്ത് കൃത്രിമാവസ്ഥയിൽ അണ്ഡകോശത്തെ പുരുഷബീജംകൊണ്ട് ബീജസങ്കലനം ചെയ്യിക്കുന്ന ഇൻ വിട്രോ ഫെർട്ടിലൈസേഷൻ അഥവാ കൃത്രിമ ബീജസങ്കലനം വഴിയാണ് കുട്ടിക്ക് തുഷാർ ജന്മം നൽകിയത്. 2016 ജൂണിലായിരുന്നു ഇത്. ലക്ഷ്യ കപൂർ എന്നാണ് മകന് തുഷാർ പേര് നൽകിയിരിക്കുന്നത്. തന്റെ പിതൃത്വത്തെ മുൻനിർത്തി ബാച്ചിലർ ഡാഡ് എന്ന പുസ്തകവും തുഷാർ രചിച്ചിട്ടുണ്ട്. 'ഒരു ജീവിതപങ്കാളി വേണമെന്ന തോന്നൽ എനിക്കുണ്ടായിട്ടില്ല. സിനിമയിലെ അഭിനയവും നിർമാണവും ഉൾപ്പെടെ ഞാൻ എപ്പോഴും തിരക്കിലായിരുന്നു. അതിനിടയിൽ പ്രായമാകുന്നത് ഞാൻ തിരിച്ചറിഞ്ഞില്ല. 39ആം വയസിലാണ് എനിക്കൊരു കുഞ്ഞ് വേണമെന്ന് തോന്നിയത്. പ്രായപൂർത്തിയായ ഒട്ടേറെ അവിവാഹിതരായ സ്ത്രീകൾ കുട്ടികളെ വളർത്തുന്നുണ്ട്. മാതൃത്വം ആ അർഥത്തിൽ ആഘോഷിക്കപ്പെടുന്നുമുണ്ട്. എന്തുകൊണ്ട് അവിവാഹിതനായ എനിക്ക് പിതൃത്വം ആഘോഷിച്ചുകൂടാ എന്ന ചിന്തയിൽ നിന്നാണ് കുട്ടി വേണമെന്ന ആലോചനയുണ്ടാവുന്നത്. അമ്മയുടേയും അച്ഛന്റേയും അവസ്ഥയിലൂടെ എനിക്ക് കടന്നുപോകണമെന്ന് തോന്നി. ആ വെല്ലുവിളി ഞാൻ ഏറ്റെടുക്കുകയായിരുന്നു. ജീവിതത്തിൽ അത്തരമൊരു ത്രില്ലിലേക്ക് ഞാൻ മാറുകയായിരുന്നു.'

'കുഞ്ഞ് വേണമെന്ന ആ​ഗ്രഹം ഉണ്ടെന്ന് ആദ്യം പറയുന്നത് അമ്മയോടാണ്. അമ്മ ആദ്യം ഒന്നും പറയാതെ എന്നെ നോക്കി നിന്നു. അമ്മ വഴിയാണ് അച്ഛനെ ഇക്കാര്യം അറിയിക്കുന്നത്. അച്ഛൻ എതിർപ്പൊന്നും പറഞ്ഞില്ല. അതോടെ എനിക്ക് സന്തോഷമായി. പിന്നീട് സഹോദരി എനിക്ക് പിന്തുണയുമായെത്തി. അത് വലിയ ധൈര്യമാണ് നൽകിയത്. എന്റെ മകൻ കാഴ്ചയിൽ എന്നെപ്പോലെത്തന്നെയുണ്ട്. സന്തോഷിക്കാൻ ഇതിലധികം എന്തുവേണം... ലക്ഷ്യ ജനിച്ച് ആശുപത്രിയിൽ നിന്ന് ആദ്യമായി എന്റെ കൈയിലേക്ക് അവനെ തന്നപ്പോൾ പിതൃത്വം എന്താണെന്ന് ഞാൻ മനസിലാക്കി. തൊട്ടടുത്ത് സന്തോഷത്തോടെ അവൻ ഉറങ്ങിക്കിടക്കുന്നത് നോക്കിനിൽക്കുമ്പോൾ എന്നിൽ അതിയായ സന്തോഷമാണ് ഉണ്ടാകുന്നത്. കുട്ടി പിറന്നുവീണ ദിവസം മുതൽ ഞാനനുഭവിക്കുന്ന സന്തോഷം എന്നെ പുതിയ മനുഷ്യനാക്കി മാറ്റി. എല്ലാ രാത്രിയിലും ഒരു കഥയെങ്കിലും ഞാൻ അവന് പറഞ്ഞുകൊടുക്കും. പുസ്തകം വായിക്കാൻ വലിയ താത്പര്യമാണ്. ചില കഥകൾ വീണ്ടും വായിക്കാൻ അവൻ നിർബന്ധിക്കും. ഞാനത് ചെയ്യാറുണ്ട്. അമ്മയെപറ്റി ലക്ഷ്യ ഇതുവരെ ചോദിച്ചിട്ടില്ല. വലുതാകുമ്പോൾ അവന് ഞാൻ ഇവയെല്ലാം വിശദമായി പറഞ്ഞ് കൊടുക്കും' തുഷാർ കപൂർ പറയുന്നു.