ഇരുപത് വയസിന് ഇളയ നടി ജയപ്രദയുടെ കൂടെ മോശം രംഗങ്ങളില്‍ അഭിനയിച്ചു! രാജേഷ് ഖന്നയ്ക്ക് നേരിടേണ്ടി വന്നതിങ്ങനെ

ഇന്ത്യന്‍ സിനിമയിലെ ആദ്യ സൂപ്പര്‍താരമായി അറിയപ്പെടുന്ന നടനാണ് രാജേഷ് ഖന്ന. ഒരു കാലത്ത് ബോളിവുഡിന്റെ സൂപ്പര്‍താരങ്ങളില്‍ ഒരാളായി തിളങ്ങി നിന്ന നടന്‍ ഇന്നും ആരാധകരുടെ മനസില്‍ നിറഞ്ഞ് നില്‍ക്കുകയാണ്. അക്കാലത്തെ പ്രമുഖ നടിമാരായ ആശ പരേഖ്, മുംതാസ്, ഡിംപിള്‍ കപാഡിയ, ജയപ്രദ തുടങ്ങി ശ്രീദേവി വരെയുള്ള നിരവധി സൂപ്പര്‍ നായികമാര്‍ക്കൊപ്പവും നടന്‍ അഭിനയിച്ചിരുന്നു.

സീരിയസായിട്ടുള്ള കഥാപാത്രങ്ങള്‍ക്ക് പുറമേ റൊമാന്റിക് വേഷങ്ങള്‍ ചെയ്തതോടെ ചോക്ലേറ്റ് ഹീറോ ആയിട്ടും നടനെ പ്രേക്ഷകര്‍ ഇഷ്ടപ്പെട്ടു. നടനെ സ്‌ക്രീനില്‍ കണ്ടയുടനെ പെണ്‍കുട്ടികളെ ആകര്‍ഷിക്കുന്ന ചാരുതയും നടനുണ്ടെന്നാണ് ആരാധകര്‍ പറഞ്ഞിരുന്നത്. എന്നാല്‍ സൂര്യന്‍ അസ്തമിക്കുന്നത് പോലെരാജേഷ് ഖന്നയുടെ താരമൂല്യവും ആകര്‍ഷണീയതയും കുറഞ്ഞു.

എണ്‍പതുകളോടെ രാജേഷ് ഖന്നയ്ക്ക് ബി ഗ്രേഡ് സിനിമകളില്‍ പോലും അഭിനയിക്കേണ്ട അവസ്ഥ ഉണ്ടായി. ഇതുമാത്രമല്ല, തന്നേക്കാള്‍ പതിനഞ്ചും ഇരുപതും വയസ്സിന് ഇളയ നായികമാരുമായി ഇന്റിമേറ്റ് രംഗങ്ങളിലും പ്രണയ രംഗങ്ങളിലും നടന്‍ അഭിനയിച്ച് തുടങ്ങി. സ്‌ക്രീനിലെ നടന്റെ മാറ്റം ആരാധകര്‍ക്കും ഉള്‍കൊള്ളാന്‍ കഴിയുന്നതായിരുന്നില്ല.

ഒരിക്കല്‍ രാജേഷ് ഖന്ന നടി ജയപ്രദയുമായി ഒരു സിനിമയില്‍ ഇന്റിമേറ്റ് രംഗത്തില്‍ അഭിനയിച്ചത് ഏറെ വിവാദങ്ങള്‍ സൃഷ്ടിച്ചിരുന്നു. അന്ന് രാജേഷ് ഖന്നയേക്കാള്‍ 20 വയസ്സിന് ഇളയതായിരുന്നു ജയപ്രദ. ആ സിനിമയിലെ താരങ്ങളുടെ പ്രണയനിമിഷങ്ങള്‍ കണ്ട് ആളുകള്‍ വിമര്‍ശനമുയര്‍ത്തി രംഗത്ത് വന്നു. ഈ കഥ വീണ്ടും പ്രചരിക്കുകയാണിപ്പോള്‍. വിശദമായി വായിക്കാം...

1984ല്‍ പുറത്തിറങ്ങിയ 'ആവാസ്' എന്ന ചിത്രത്തിലാണ് രാജേഷ് ഖന്നയും ജയപ്രദയും ഒരുമിച്ചഭിനയിച്ചത്. ശക്തി സാമന്തയാണ് ഈ ചിത്രം സംവിധാനം ചെയ്തത്. സുപ്രിയ പഥക്, പ്രേം ചോപ്ര, മദന്‍ പുരി, അമരീഷ് പുരി തുടങ്ങിയ താരങ്ങളും ചിത്രത്തില്‍ അഭിനയിച്ചിരുന്നു. മാത്രമല്ല ഈ സിനിമ ഒരു സൂപ്പര്‍ഹിറ്റായി മാറുകയും ചെയ്തിരുന്നു. കൂടാതെ ബോക്സ് ഓഫീസില്‍ മികച്ച വരുമാനവും നേടി.

രാജേഷ് ഖന്നയുടെയും ജയപ്രദയുടെയും ജോഡി പൊരുത്തം സിനിമയില്‍ ശ്രദ്ധിക്കപ്പെട്ടെങ്കിലും അവരുടെ ഇന്റിമേറ്റ് രംഗങ്ങള്‍ ഒരു കോളിളക്കം വഴിയൊരുക്കി. യഥാര്‍ത്ഥത്തില്‍, ഈ ചിത്രത്തിലെ 'ആ ജാനേമാന്‍ ആജ് തുജെ' എന്ന ഗാനത്തിലാണ് രാജേഷ് ഖന്നയുടെയും ജയപ്രദയുടെയും ഇന്റിമേറ്റ് സീന്‍ ഉണ്ടായിരുന്നത്.

തന്നേക്കാള്‍ 20 വയസ്സിന് താഴെയുള്ള ഒരു നടിക്കൊപ്പം രാജേഷ് ഖന്നയെ ഇത്തരമൊരു വേഷത്തില്‍ കണ്ടതും ആരാധകരും ഞെട്ടി. സിനിമാലോകത്തും രാജേഷ് ഖന്നയെ കുറിച്ച് പലതരത്തിലുള്ള ചര്‍ച്ചകള്‍ അക്കാലത്ത് നടന്നിരുന്നതായി പറയപ്പെടുന്നു. നടന്റെ താരമൂല്യം കുറഞ്ഞു വരികയാണെന്നും, അതിജീവിക്കാന്‍ ഇതൊക്കെ ചെയ്യണമെന്നും ചിലര്‍ പറഞ്ഞ് പരത്തി.

എന്നാല്‍, ഇതില്‍ എത്രമാത്രം സത്യമുണ്ടെന്ന് വ്യക്തമല്ല. പക്ഷേ, തന്റെ കരിയറിന്റെ തകര്‍ച്ചയുടെ നാളുകളില്‍ രാജേഷ് ഖന്നയ്ക്ക് അത്തരത്തിലുള്ള നിരവധി ചിത്രങ്ങള്‍ ചെയ്യേണ്ടി വന്നുവെന്നത് ശരിയായ കാര്യമാണ്. അത് ആളുകള്‍ ഇപ്പോഴും കണ്ട് അത്ഭുതപ്പെടുന്നുണ്ട്. 2008 ല്‍ പുറത്തിറങ്ങിയ 'വഫ: ഏക് ലവ് സ്റ്റോറി'യില്‍ ലൈലാ ഖാനുമായി ചില അടുപ്പമുള്ള രംഗങ്ങളും രാജേഷ് ഖന്നയ്ക്കുണ്ടായിരുന്നു എന്നതും ശ്രദ്ധേയമാണ്.

1966 ല്‍ സിനിമയിലേക്ക് എത്തിയ താരം അവസാന കാലം വരെയും അഭിനയിച്ചിരുന്നു. 2012 ലായിരുന്നു രാജേഷ് ഖന്ന മരിക്കുന്നത്. അതിന് മുന്‍പ് അഭിനയിച്ച നടന്റെ ചില സിനിമകള്‍ മരണത്തിന് ശേഷം പുറത്തിറങ്ങി എന്നതും ശ്രദ്ധേയമാണ്.