അമിതാഭ് ബച്ചന്റെ കൂടെ അഭിനയിക്കുമ്പോഴും നടന്‍ ധര്‍മേന്ദ്രയോടും പ്രണയമായിരുന്നു; ആ കഥ ജയ ബച്ചൻ പറഞ്ഞതിങ്ങനെ

ഗുഡ്ഡി, സമാധി, ഷോലെ തുടങ്ങി നിരവധി സൂപ്പര്‍ഹിറ്റ് സിനിമകളില്‍ ധര്‍മേന്ദ്രയും ജയ ബച്ചനും ഒരുമിച്ച് അഭിനയിച്ചിട്ടുണ്ട്. ഷോലെ യില്‍ ഹേമമാലിനി അവതരിപ്പിച്ച ബസന്തി എന്ന റോള്‍ ചെയ്യാന്‍ ജയ ആഗ്രഹിച്ചിരുന്നു. കാരണം അന്ന് ധര്‍മേന്ദ്രയോട് നടിയ്ക്ക് പ്രണയമായിരുന്നു. ഇതേ കുറിച്ചാണ് കരണ്‍ ജോഹറുമായി സംസാരിക്കവേ ജയ വെളിപ്പെടുത്തിയത്. 'ഷോലെ യിലെ ബസന്തിയായി അഭിനയിക്കണമെന്ന് ഞാന്‍ ആഗ്രഹിച്ചു. കാരണം ഞാന്‍ ധര്‍മേന്ദ്രയെ സ്‌നേഹിക്കുകയായിരുന്നു.

ഞാന്‍ അദ്ദേഹത്തെ ആദ്യം കാണുകയും എന്നെ പരിചയപ്പെടുകയും ചെയ്തപ്പോള്‍ ഇതുപോലൊരു സോഫ അവിടെയും ഉണ്ടായിരുന്നു. അതിന്റെ പുറകില്‍ പോയി ഞാന്‍ ഒളിച്ചിരുന്നു. കാരണം വളരെ പരിഭ്രാന്തിയുള്ള നിമിഷമായിരുന്നു അത്. എന്ത് ചെയ്യണമെന്ന് എനിക്ക് അറിയില്ലായിരുന്നു. അവിടെ അതിശയം തോന്നുന്ന ഈ മനുഷ്യനും ഉണ്ട്. ഗ്രീക്ക് ദൈവത്തെ പോലെ വെള്ള ട്രൗസറും വെള്ള ഷര്‍ട്ടുമാണ് അദ്ദേഹം അന്ന് ധരിച്ചിരുന്നതെന്ന് എനിക്കിന്നും ഓര്‍മ്മയുണ്ട്' എന്നും ജയ പറയുന്നു. ജയ ബച്ചന്‍ ആദ്യമായി അഭിനയിച്ച ഗുഡ്ഡിയില്‍ ധര്‍മേന്ദ്രയോട് ഇഷ്ടമുള്ള ഒരു സ്‌കൂള്‍ വിദ്യാര്‍ഥിനിയുടെ കഥാപാത്രമാണ് ചെയ്തത്. ഇതേ ഷോ യില്‍ ഹേമ മാലിനിയും ധര്‍മേന്ദ്രയെ ആദ്യമായി കണ്ടതിനെ കുറിച്ച് പറഞ്ഞിരുന്നു.

അതേ സമയം ജയ ബച്ചനും ധര്‍മേന്ദ്രയും വര്‍ഷങ്ങള്‍ക്ക് ശേഷം ഒരുമിച്ച് സിനിമയില്‍ അഭിനയിക്കുകയാണ്. കരണ്‍ ജോഹര്‍ സംവിധാനം ചെയ്യുന്ന 'റോക്കി ഓര്‍ റാണി കി പ്രേം കഹാനി' എന്ന സിനിമയിലൂടെയാണ് താരജോഡികള്‍ വീണ്ടും ഒരുമിക്കുന്നത്. ഷബാന അസ്മി, രണ്‍വീര്‍ സിംഗ്, ആലിയ ഭട്ട്, എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്. എന്തായാലും അടുത്ത വര്‍ഷം ഫെബ്രുവരിയില്‍ റിലീസിനൊരുങ്ങുന്ന സിനിമയിലൂടെ ഈ താരങ്ങളെ വീണ്ടും ബിഗ് സ്‌ക്രീനിലൂടെ കാണാന്‍ സാധിക്കും.

Recommended Video

Violence Likes Me. മാസ്സ് ഡയലോഗുമായി റോക്കിഭായ്

2008 ല്‍ പുറത്തിറങ്ങിയ ദ്രോണ എന്ന ചിത്രത്തിലാണ് ജയ ബച്ചന്‍ അവസാനമായി കേന്ദ്രകഥാപാത്രമായിട്ടെത്തിയത്. അതിന് ശേഷം അതിഥി വേഷങ്ങളിലാണ് പ്രത്യക്ഷപ്പെട്ടത്. നീണ്ടൊരു ഇടവേളയ്ക്ക് ശേഷം മുതിര്‍ന്ന നടി അഭിനയത്തിലേക്ക് തിരിച്ച് വരുന്നു എന്ന പ്രത്യേകത കൂടിയുണ്ട്.