പതിനഞ്ച് മിനുറ്റിന് 5 കോടി പ്രതിഫലം; ബോളിവുഡ് സുന്ദരി ആലിയ ഭട്ട് തെലുങ്കിൽ എത്തിയപ്പോഴുള്ള പ്രതിഫല തുകയിങ്ങനെ

ചിത്രീകരണം പൂര്‍ത്തിയാക്കിയ ആര്‍ആര്‍ആര്‍ ജനുവരി ഏഴിന് റിലീസ് ചെയ്യാനാണ് അണിയറ പ്രവര്‍ത്തകര്‍ തീരുമാനിച്ചിരിക്കുന്നത്. ലോകം മുഴുവനുമായി വമ്പന്‍ റിലീസ് ആയിരിക്കുമിത്. ബോളിവുഡില്‍ നിന്നും തെലുങ്കില്‍ വന്ന് അഭിനയിക്കുന്ന ആലിയ ഭട്ടിനെ കുറിച്ചുള്ള ചര്‍ച്ചകള്‍ സജീവമാവുകയാണ്. തെലുങ്കിലെ ആദ്യ സിനിമയില്‍ കേവലം പതിനഞ്ച് മിനുറ്റ് മാത്രമേ ആലിയ ഉണ്ടാവുകയുള്ളു എന്നാണ് അറിയുന്നത്. ഇത്രയും മിനുറ്റില്‍ അഭിനയിക്കുന്നതിന് വേണ്ടി മാത്രം അഞ്ച് കോടിയോളം പ്രതിഫലം വാങ്ങിയെന്നുമാണ് റിപ്പോര്‍ട്ട്. പത്ത് ദിവസം മാത്രമേ ആലിയയുടെ സീനുകള്‍ ഷൂട്ട് ചെയ്തിരുന്നുള്ളു.

റിപ്പോര്‍ട്ടുകള്‍ പ്രകാരം, മാസങ്ങളോളം ഷൂട്ടിംഗ് നടക്കുന്ന ബോളിവുഡിലെ ഒരു ചിത്രത്തിന് 10 കോടി രൂപയാണ് അവര്‍ വാങ്ങുന്നതെന്നാണ്. പതിനഞ്ച് മിനുറ്റേ ഉള്ളുവെങ്കിലും ആലിയയുടേത് ഏറ്റവും പ്രധാനപ്പെട്ട കഥാപാത്രങ്ങളിലൊന്നാണ്. സിനിമയിലെ ഏറ്റവും പ്രധാനപ്പെട്ടൊരു സമയത്താണ് ആലിയ എത്തുക. ഹിന്ദി സിനിമകളില്‍ വര്‍ക്ക് ചെയ്യുന്നതിനെക്കാളും വേറിട്ടൊരു അനുഭവമാണ് തെലുങ്ക് ചിത്രത്തിലൂടെ ലഭിച്ചതെന്നാണ് മുന്‍പൊരു അഭിമുഖത്തില്‍ ആലിയ പറഞ്ഞത്. സംവിധായകനെ കുറിച്ചും നായകന്മാരെ കുറിച്ചുമൊക്കെ അന്ന് നടി തുറന്ന് സംസാരിച്ചിരുന്നു.

അതേ സമയം ഔദ്യോഗികമായി പുറത്ത് വന്ന റിപ്പോര്‍ട്ട് അല്ലെങ്കിലും ആലിയയുടെ വമ്പന്‍ പ്രതിഫലത്തെ കുറിച്ചുള്ള ചര്‍ച്ചകള്‍ സജീവമാവുകയാണ്. റിലീസിനോട് അനുബന്ധിച്ച് സിനിമയുമായി ബന്ധപ്പെട്ട വാര്‍ത്തകള്‍ ഓരോന്നായി പുറത്ത് വന്ന് കൊണ്ടിരിക്കുകയാണ്. ബാഹുബലിയ്ക്ക് ശേഷം രാജമൗലി ഒരുക്കുന്ന സിനിമ ആയതിനാല്‍ പ്രേക്ഷകരുടെ പ്രതീക്ഷകളും വളരെ വലുതാണ്. രാജമൗലി സംവിധാനം ചെയ്യുന്നതിന് പുറമേ ഇതൊരു മള്‍ട്ടിസ്റ്റാര്‍ സിനിമയാണെന്നുള്ളതാണ് ശ്രദ്ധേയമായ കാര്യം. രാം ചരണ്‍, ജൂനിയര്‍ എന്‍ടിആര്‍, ശ്രിയ ശരണ്‍ തുടങ്ങി വമ്പന്‍ താരനിരയാണ് സിനിമയില്‍ അഭിനയിക്കുന്നത്. ജനുവരിയിലെ റിലീസിനോട് അനുബന്ധിച്ച് സിനിമയുടെ പ്രൊമോഷന്‍ വര്‍ക്കുകള്‍ ഇതിനകം തുടങ്ങി കഴിഞ്ഞിരിക്കുകയാണ്.