ആമിറിനെ പരസ്യമായി ആക്ഷേപിച്ചു; മാന്യത കൈ വിടാതെ നടൻ; ഇറ ഖാന്റെ റിസപ്ഷന് എത്തിയ കങ്കണയെക്കുറിച്ച് ചർച്ച

കഴിഞ്ഞ ദിവസമാണ് ആമിർ ഖാന്റെ മകൾ ഇറ ഖാൻ വിവാഹിതയായത്. ഫിറ്റ്നെസ് ട്രെയ്നറായ നുപുർ ശിഖാരെയാണ് ഇറ ഖാൻ വിവാഹം ചെയ്തത്. ആഘോഷപൂർവം നടന്ന വിവാഹത്തിൽ ബന്ധുക്കളും സുഹൃത്തുക്കളുമെല്ലാം പങ്കെടുത്തു. വിവാഹത്തിന് ശേഷം മുംബൈയിൽ വലിയ റിസപ്ഷനാണ് ആമിറും കുടുംബവും ഒരുക്കിയത്. ബോളിവുഡിലെ പ്രമുഖ താരങ്ങളിൽ പലരും അതിഥികളായി എത്തി. ഷാരൂഖ് ഖാൻ, സൽമാൻ ഖാൻ, രേഖ തുടങ്ങിയവരെല്ലാം ആമിറിന്റെ ക്ഷണം സ്വീകരിച്ചെത്തി. ഇക്കൂട്ടത്തിൽ ചർച്ചയായിരിക്കുന്നത് നടി കങ്കണ റണൗത്തിന്റെ സാന്നിധ്യമാണ്.

ആമിർ ഖാൻ കങ്കണയെ ക്ഷണിക്കുമെന്നോ ക്ഷണം സ്വീകരിച്ച് കങ്കണ എത്തുമെന്നോ കരുതിയില്ലെന്ന് ആരാധകർ പറയുന്നു. ഒന്നിലേറെ തവണ ആമിറിനെയും കുടുംബത്തെയും ആക്ഷേപിച്ച നടിയാണ് കങ്കണ റണൗത്ത്. ഇറ ഖാൻ വിഷാദരോ​ഗത്തെക്കുറിച്ച് തുറന്ന് പറഞ്ഞപ്പോൾ ആമിറിന്റെ കുടുംബ വിഷയം കങ്കണ നേരത്തെ പരാമർശിച്ചിട്ടുമുണ്ട്. ഇറ ഖാന്റെ തകർന്ന കുടുംബവമാണ് വിഷാദ രോ​ഗത്തിന് കാരണമായതെന്ന് കങ്കണ റണൗത്ത് ആരോപിച്ചു.

പതിനാറാം വയസിൽ എനിക്ക് ശാരീരിക ഉപദ്രവം ഉണ്ടായി. ആസിഡാക്രമണം നേരിട്ട സഹോദരിയെ പരിചരിച്ചു. മാധ്യമങ്ങളു‌ടെ വേട്ടയാടലും നേരിട്ടു. വിഷാദരോ​ഗത്തിന് പല കാരണങ്ങളുമുണ്ടാകും. പക്ഷെ തകർന്ന കുടുംബങ്ങളിലെ കുട്ടികൾക്ക് ഇത് നേരിടാൻ ബുദ്ധിമുട്ടാണ്. അതിനാൽ പരമ്പരാ​ഗത കുടുംബ വ്യവസ്ഥകൾക്ക് പ്രാധാന്യമുണ്ടെന്നും കങ്കണ സോഷ്യൽ മീഡിയയിൽ കുറിച്ചു.

ആമിറിനെതിരെ പല തവണ കങ്കണ സംസാരിച്ചിട്ടുണ്ട്. സമാന്ത, നാ​ഗ ചൈതന്യ വിവാഹമോചനത്തിലേക്ക് വരെ ആമിറിന്റെ പേര് പരോക്ഷമായി കങ്കണ വലിച്ചിഴച്ചു. നാ​ഗ ചൈതന്യ ആമിറിനൊപ്പം അഭിനയിച്ച ശേഷമാണ് നടൻ വിവാഹ മോചിതനാകുന്നതെന്ന് കങ്കണ പേരെടുത്ത് പറയാതെ ആരോപിച്ചു. 'ഡിവോഴ്സ് വിദ​ഗ്ധൻ' എന്നാണ് അന്ന് കങ്കണ ആമിർ ഖാനെ വിശേഷിപ്പിച്ചത്.

ഇത്രയൊക്കെ ആക്ഷേപിച്ചിട്ടും കങ്കണയ്ക്കെതിരെ ആമിർ ഖാൻ സംസാരിച്ചിട്ടില്ല. നിരന്തരം കുറ്റപ്പെടുത്തിയിട്ടും ക്ഷണിച്ചത് ആമിറിന്റെ മര്യാദയാണെന്ന് ആരാധകർ ചൂണ്ടിക്കാട്ടുന്നു. എന്നാൽ ആ മാന്യത കങ്കണയ്ക്കില്ലെന്നും ഇവർ അഭിപ്രായപ്പെട്ടു. തുടരെയുള്ള വിവാദ​ പ്രസ്താവനകൾ കാരണം ബോളിവുഡിലെ മിക്കവരും കങ്കണയെ മാറ്റി നിർത്തുകയാണ്.

നടിയെ വെച്ച് സിനിമ ചെയ്യാൻ ബോളിവുഡിലെ പല പ്രമുഖരും മടിക്കുന്നു. അടുത്ത കാലത്തിറങ്ങിയ കങ്കണയുടെ എല്ലാ സിനിമകളും പരാജയപ്പെടുകയാണുണ്ടായത്. തേജസാണ് ഒടുവിൽ പുറത്തിറങ്ങിയ നടിയുടെ സിനിമ. ചിത്രം ബോക്സ് ഓഫീസിൽ കൂപ്പുകുത്തി.

മികച്ച നടിയായിരുന്ന കങ്കണ ഇന്ന് വെറുമൊരു വിവാദ താരമായി ഒതുങ്ങിയെന്ന ആക്ഷേപം പ്രേക്ഷകർക്കുണ്ട്. ആമിർ ഖാന് പുറമെ ബോളിവുഡിലെ നിരവധി പ്രമുഖർക്കെതിരെ കങ്കണ നേരത്തെ രം​ഗത്ത് വന്നിട്ടുണ്ട്. എന്നാൽ കങ്കണയുടെ ആരോപണങ്ങൾ മിക്കവരും മുഖവിലക്കെടുക്കാറില്ലെന്നതാണ് യാഥാർത്ഥ്യം. മിക്കവരും ഇത് അവ​ഗണിക്കാറാണ് പതിവ്. വിവാദങ്ങൾ കാരണം നടിയുടെ പ്രതിച്ഛയായക്കുണ്ടായ കോട്ടം ചെറുതല്ല.

സിനിമയ്ക്കപ്പുറം രാഷ്ട്രീയത്തിലേക്ക് കങ്കണ ശ്രദ്ധ തിരിക്കാൻ‌ സാധ്യതയുണ്ട്. വരുന്ന ലോക്സഭാ ഇലക്ഷനിൽ കങ്കണ മത്സരിച്ചേക്കുമെന്നും സൂചനയുണ്ട്. കങ്കണയുടെ പുതിയ സിനിമകൾ അണിയറയിൽ ഒരുങ്ങുന്നുണ്ട്. എമർജൻസിയാണ് ഇതിലൊന്ന്. മുൻ ഇന്ത്യൻ മന്ത്രി ഇന്ദിര ഗാന്ധിയായാണ് ചിത്രത്തിൽ കങ്കണ അഭിനയിക്കുന്നത്. സിനിമ സംവിധാനം ചെയ്യുന്നതും നിർമ്മിക്കുന്നതും കങ്കണ തന്നെയാണ്. നടിയുടെ വരാനിരക്കുന്ന സിനിമകളിൽ ആരാധകർക്ക് പ്രതീക്ഷയുണ്ട്.