സിനിമ കാണാതെ നോക്കിയിരുന്നു!! കജോളിന്റെ ക്രഷിനെ കുറിച്ച് കരൺ, പൊട്ടിച്ചിരിച്ച് നടി

അക്ഷയ്കുമാറിനോട് ക്രഷ്

ഒരു കാലത്ത് നടൻ അക്ഷയ് കുമാറിനോട് കജോളിന് വല്ലത്ത ക്രഷ് ഉണ്ടായിരുന്നു എന്നായിരുന്നു കരണിന്റെ വെളിപ്പെടുത്തൽ. കപിൽ ശർമ്മയുടെ ഷോയിൽ കജോളും അതിഥിയായി എത്തിയപ്പോഴായിരുന്നു കരൺ ഇക്കാര്യം വെളിപ്പെടുത്തിയത്. കരണിന്റെ വെളിപ്പെടുത്തൽ കേട്ട് കപിലും കജോളും പൊട്ടിച്ചിരിക്കുകയായിരുന്നു. ഇവർ തമ്മിലുള്ള ഒരു രസകരമായ സംഭവവു കരൺ വെളിപ്പെടുത്തി.

ക്രഷിൽ തുടങ്ങിയ സൗഹൃദം

1991 ൽ പുറത്തിറങ്ങിയ ഹെന്ന എന്ന ചിത്രത്തിന്റെ പ്രദർശനത്തിനിടെയായിരുന്നു സംഭവം . ആ സമയത്തായിരുന്നു അക്ഷയ് കുമാറിനോട് കജോളിന് ആകർഷണം തോന്നിയത്. സിനിമ കാണാതെ കജോൾ അക്ഷയെ തന്നെ നോക്കിയിരിക്കുകയായിരുന്നു. ആ സിനിമ തീർന്നപ്പോൾ തന്നെ അക്ഷയ് അവിടെ നിന്ന് അപ്രതൃക്ഷനാവുകയായിരുന്നു. അവിടെവെച്ചായിരുന്നു താനും കജോളും തമ്മിലുള്ള സൗഹൃദം ആരംഭിച്ചത്. പിന്നീട് 1994 ലാണ് അക്ഷയ്യും കജോളും ഒന്നിച്ച് അഭിനയിക്കുന്നത്. അപ്പോഴേയ്ക്കും കജോൾ തിരക്കുളള ഒരു നടിയായി മാറിയിരുന്നു.

കജോളിന്റെ മറവി

തന്റെ സുഹൃത്തുക്കളിൽ മറവിയുടെ കാര്യത്തിൽ ഒന്നാം സ്ഥാനക്കാരിയാണ് കജോൾ. തങ്ങൾക്കിടയിൽ വർഷങ്ങൾ നീണ്ട സൗഹൃദമുണ്ടെങ്കിൽ തന്റെ പിറന്നാൾ എന്നാണെന്ന് കജോളിന് അറിയില്ലെന്നും കരൺ ജോഹർ പറഞ്ഞു. ഒരിക്കൽ പോലും തനിയ്ക്ക് പിറന്നാൾ ആശംസ നേർന്നിട്ടുമില്ല. എന്നിരുന്നാലും തങ്ങളുടെ സൗഹൃദത്തിന് ഒരു തരത്തിലുള്ള കോട്ടവും തട്ടിയിട്ടില്ലെന്നും കരൺ പറഞ്ഞു.

കജോളുമായുള്ള പിണക്കം

കജോളുമായുണ്ടായ പരിഭവത്തെ കുറിച്ചും കരൺ ജോഹർ വെളിപ്പെടുത്തി. കജോളിന്റെ ഭർത്താവ് അജയ് ദേവ്ഗണിന്റെ ചിത്രമായ ശിവായ് റിലീസിനെത്തിയ സമയത്തായിരുന്നു കരൺ ജോഹർ ചിത്രമായ യേ ദിൽഹേ മുഷ്കിൽ എന്ന ചിത്രവും പ്രദർശനത്തിനെത്തിയത്. ശിവായ്യെ കുറിച്ച് മോശം നിരൂപണം എഴുതാൻ കരണിന്റെ സിനിമ അണിയറ പ്രവർത്തകർ സിനിമ നിരൂപകനായ കമാൽ ആർ ഖാന് പണം നൽകിയെന്നതായിരുന്നു ആരോപണം. ഇതു സംബന്ധമായ ഒരു വോഴ്സ് ക്ലിപ്പ് അജയ് പുറത്തു വിടുകയും ചെയ്തിരുന്നു. ഈ സംഭവത്തിൽ അജയ് യെ പിന്തുണച്ച് കജോൾ എത്തിയിരുന്നു. ഇതിനു ശേഷം ഇരുവരും മാനസികമായി അകന്നു. എന്നാൽ ഇവരുടെ പിണക്കത്തിന് അധികം ആയുസ്സ് ഉണ്ടായിരുന്നില്ല. തെറ്റിധാരണകൾ പറഞ്ഞ് തീർത്ത് വീണ്ടും സുഹൃത്തുക്കളാവുകയായിരുന്നു.