ഷമിത ഷെട്ടിയ്ക്ക് 48 വയസുണ്ടെന്ന് കെആര്‍കെ, അസംബന്ധം പറയരുതെന്ന് ആരാധകര്‍, നടന് ട്രോള്‍

കരണ്‍ ജോഹര്‍ അവതരിപ്പിക്കുന്ന പരിപാടി ഓഗസ്റ്റ് ഏട്ടിനാണ് ഒടിടി പ്ലാറ്റ്‌ഫോമായ വൂട്ടില്‍ സംപ്രേക്ഷണം ആരംഭിച്ചത്. ഷമിത ഷെട്ടി ഉള്‍പ്പെടെ 13 മല്‍സരാര്‍ത്ഥികളാണ് ബിഗ് ബോസ് ഒടിയില്‍ പങ്കെടുക്കുന്നത്. വര്‍ഷങ്ങള്‍ക്ക് മുന്‍പ് ബിഗ് ബോസ് ഹിന്ദി മൂന്നാം സീസണിലും ശില്‍പ്പ ഷെട്ടിയുടെ അനിയത്തി പങ്കെടുത്തിരുന്നു. എന്നാല്‍ അന്ന് വളരെ കുറച്ചുനാളുകള്‍ മാത്രമാണ് ഷമിതയ്ക്ക് പിടിച്ചുനില്‍ക്കാനായത്.

അതേസമയം ബിഗ് ബോസിന്‌റെ പുതിയ സീസണില്‍ എത്തിയതിന് പിന്നാലെ വീണ്ടും വാര്‍ത്തകളില്‍ നിറയുകയാണ് ഷമിത ഷെട്ടി. കഴിഞ്ഞ ദിവസം ഷമിതയുടെ വയസിനെ കുറിച്ച് പറഞ്ഞ് അക്ഷര സിംഗ്, ഉര്‍വ്വി ജാവേദ് തുടങ്ങിയ മല്‍സരാര്‍ത്ഥികള്‍ രംഗത്തെത്തിയിരുന്നു. ഷമിത ഷെട്ടിയെ ആന്റി എന്നാണ് അക്ഷര വിളിച്ചത്. തന്‌റെ അമ്മയേക്കാള്‍ പ്രായം ഷമിതയ്ക്കുണ്ടെന്നും അക്ഷര പറഞ്ഞു. ഈ സംഭവത്തിന് പിന്നാലെയാണ്‌ ഷമിതയുടെ വയസിനെ കുറിച്ച് ട്വീറ്റ് ചെയ്ത് ബോളിവുഡിലെ വിവാദ നായകന്‍ കെആര്‍കെ എന്ന കമാല്‍ ആര്‍ ഖാന്‍ എത്തിയത്.

ബോളിവുഡ്, ടെലിവിഷന്‍ സെലിബ്രിറ്റികളെ കുറിച്ച് എപ്പോഴും വിവാദ പരമാശര്‍ശങ്ങളുമായി എത്തിയ താരമാണ് കെആര്‍കെ. ഇത്തവണ ഷമിത ഷെട്ടിയാണ് കെആര്‍കെയുടെ ഇര. ട്വിറ്ററിലൂടെയാണ് ഷമിത ഷെട്ടിയെ കുറിച്ച് കെആര്‍കെ പ്രതികരിച്ചത്. ഷമിത ഷെട്ടിയെ കുറിച്ച് ബിഗ് ബോസ് മല്‍സരാര്‍ത്ഥികള്‍ പറഞ്ഞത് ശരിയാണെന്ന് ആണ് കെആര്‍കെ പുതിയ ട്വീറ്റില്‍ പറയുന്നത്.

2019ല്‍ ഷമിതയ്‌ക്കൊപ്പം ഞാന്‍ ബിഗ് ബോസ് 3യില്‍ പങ്കെടുത്തതാണ്. അന്ന് ഷമിതയ്ക്ക് 35 വയസുണ്ടായിരുന്നു. അതുകൊണ്ട് ഇപ്പോള്‍ അവള്‍ക്ക് 48 വയസുണ്ട് എന്നാണ് കെആര്‍കെ ട്വീറ്റ് ചെയ്തത്. കെആര്‍കെയുടെ ട്വീറ്റിന് പിന്നാലെ ഷമിതയെ പിന്തുണച്ച് ആരാധകര്‍ രംഗത്തെത്തി. 46 വയസുളള ശില്‍പ്പ ഷെട്ടിയേക്കാള്‍ ഇളയതാണ് ഷമിതയെന്ന് ആരാധകര്‍ പറയുന്നു.

Recommended Video

Shilpa Shetty on Raj Kundra's arrest

'അവളുടെ പ്രായം മറന്നേക്കൂ. നിങ്ങള്‍ നിങ്ങളുടെ ജീവിതത്തിലെ നിര്‍ണായക വര്‍ഷങ്ങള്‍ മറികടന്നതായി തോന്നുന്നു. അതിനാല്‍ ദൈവം ഇപ്പോള്‍ നിങ്ങളെ നിയോഗിച്ചിരിക്കുന്നത് ഇത്തരം അസംബന്ധങ്ങള്‍ പറയാനാണ്‌' എന്നാണ് ഒരാള്‍ കെആര്‍കെയ്ക്ക് മറുപടി നല്‍കിയത്‌. 'അവള്‍ എന്തായാലും നിങ്ങളേക്കാള്‍ മൂത്തതല്ല. വയസ് വെച്ച് ഒരാളെ അവഹേളിക്കുന്നത്‌ ശരിയല്ല എന്ന് മറ്റൊരാളും കുറിച്ചു.