മുൻ ഭർത്താവ് വളരെ നല്ലയാൾ, പ്രശ്നങ്ങളില്ല; വിവാഹ മോചനത്തെക്കുറിച്ച് മലൈക അറോറ

വിവാഹ മോചനം തന്റെ ജീവിതത്തിൽ നല്ല മാറ്റങ്ങളാണ് വരുത്തിയതെന്ന് മലൈക പറയുന്നു. മുൻ ഭർത്താവുമായി ഇപ്പോൾ പ്രശ്നങ്ങളൊന്നുമില്ല, വേർപിരിയലിന് ശേഷം മകനുമായി കൂടുതൽ അടുത്തു. എന്തുകൊണ്ടും നല്ല തീരുമാനമായിരുന്നു വിവാഹ മോചനം എന്ന് മലൈക വ്യക്തമാക്കി.

'ഞങ്ങൾ ഇപ്പോൾ വളരെ പക്വതയുള്ളവരാണ്. വളരെ സന്തോഷത്തിലുള്ള ശാന്തരായ ആളുകൾ. അദ്ദേഹം വളരെ നല്ല ആളാണ്. ജീവിതത്തിൽ അദ്ദേഹത്തിന് നല്ലത് മാത്രം ആശംസിക്കുന്നു. ചില സമയത്ത് ആളുകൾ നല്ലവരായിരിക്കും. പക്ഷെ അവർ ഒരുമിച്ച് അത്ര നല്ലതായിരിക്കില്ല,' മലൈക അർബാസിനെക്കുറിച്ച് പറഞ്ഞതിങ്ങനെ.

'എന്നെക്കുറിച്ച് ആലോചിച്ചാണ് അത്തരമൊരു തീരുമാനം എടുത്തത്. അതിന് ശേഷം ഞാൻ ഒരുപാട് മെച്ചപ്പെട്ട വ്യക്തിയാണ്. എന്റെ മകനുമായി കുറച്ചു കൂടി അടുത്തു. മുൻ ഭർത്താവുമായി എനിക്ക് നല്ല സൗഹൃദം ഉണ്ട്. ഞാൻ ഈ തീരുമാനം എടുത്തതിലും എനിക്ക് വേണ്ടി സ്വയം നിലനിന്നതിലും ഞാൻ സന്തോഷവതിയാണ്'

'അതിനാൽ തന്നെ സ്വന്തം ഹൃദയം പിന്തുടരാൻ ഭയപ്പെടാതിരിക്കുക. ജീവിതം അത്ര എളുപ്പമല്ല. നിങ്ങൾക്ക് എല്ലാവരെയും സന്തോഷിപ്പിക്കാനാവില്ല, മലൈക പറഞ്ഞു. 1998 ലാണ് മലൈകയും അർബാസ് ഖാനും വിവാഹിതാരായത്. ഒരു ഷൂട്ടിനിടെ പരിചയപ്പെട്ട ഇരുവരും പിന്നീട് പ്രണയത്തിലാവുകയായിരുന്നു'

വിവാഹ മോചനത്തിന് ശേഷം നടൻ അർജുൻ കപൂറുമായി പ്രണയത്തിലാണ് മലൈക. ഇരുവരും തങ്ങളുടെ പ്രണയത്തെക്കുറിച്ച് തുറന്ന് സംസാരിച്ചിട്ടുമുണ്ട്. അതേസമയം സോഷ്യൽ മീഡിയയിൽ നിരന്തരം രണ്ട് പേരും ട്രോളുകൾക്കിരയാവാറുണ്ട്. ഇരുവരും തമ്മിലുള്ള പ്രായ വ്യത്യാസമാണ് ഇതിന് കാരണം.

മലൈകയുടെ പ്രായം 48 ആണ്. അർജുൻ കപൂറിന്റെ പ്രായം 37 ഉം. 10 വയസ്സിന്റെ പ്രായ വ്യത്യാസമാണ് പലരും ചൂണ്ടിക്കാട്ടുന്നത്. എന്നാൽ പ്രായം പ്രണയത്തിന് തടസ്സമല്ലെന്നാണ് മലൈകയും അർജുനും പറയുന്നത്.

‍‍ഇത്തരം അധിക്ഷേപങ്ങൾക്കെതിരെ നേരത്തെ മലൈക ശക്തമായി രം​ഗത്ത് വന്നിരുന്നു. പ്രായമുള്ള പുരുഷൻ ചെറുപ്പക്കാരിയെ പ്രണയിച്ചാൽ അത് വാഴ്ത്തപ്പെടും. പക്ഷെ സ്ത്രീക്കാണ് പ്രായക്കൂടുതൽ എങ്കിൽ അവളെ കിളവിയെന്നും എന്തിനും തുനിഞ്ഞവളെന്നും വിളിക്കുന്നു എന്നായിരുന്നു മലെൈക ചൂണ്ടിക്കാട്ടിയത്.