ഒരുമിച്ച് ജീവിക്കാനും കുഞ്ഞുങ്ങള്‍ ഉണ്ടാകാനും കുറച്ച് സമയമേയുള്ളൂ! നവാബിന്‍റെ വാക്കിന് പൂജ യെസ് മൂളി

ബിഗ് സ്‌ക്രീനിലെ നായികയും വില്ലനും ഒരുമിച്ചതിന്‍രെ സന്തോഷത്തിലാണ് ആരാധകര്‍. അടുത്തിടെയായിരുന്നു പൂജ ബത്രയും നവാബ് ഷായും വിവാഹിതരായത്. അതീവ രഹസ്യമായാണ് വിവാഹമെന്ന തരത്തിലുള്ള റിപ്പോര്‍ട്ടുകളായിരുന്നു പ്രചരിച്ചത്. എന്നാല്‍ പിന്നീട് താരങ്ങള്‍ തന്നെ വിവാഹ വിശേഷങ്ങള്‍ പങ്കുവെച്ച് എത്തുകയായിരുന്നു. തങ്ങളുടെ ബന്ധത്തെക്കുറിച്ച് അറിയാവുന്ന സുഹൃത്തുക്കളും ബന്ധുക്കളുമൊക്കെയായിരുന്നു വിവാഹമെന്തിനാണ് വൈകിപ്പിക്കുന്നതെന്ന കാര്യത്തെക്കുറിച്ച് ചോദിച്ചത്. അടുത്ത സുഹൃത്തുക്കളുടേയും ബന്ധുക്കളുടേയും സാന്നിധ്യത്തിലായിരുന്നു വിവാഹം നടത്തിയത്.

20 വര്‍ഷത്തോളമായി തനിക്ക് പൂജയെ അറിയാമെന്ന് നവാബ് ഷാ പറയുന്നു. മെന്‍ എക്‌സ്പിക്ക് നല്‍കിയ അഭിമുഖത്തിനിടയിലായിരുന്നു അദ്ദേഹം വിവാഹത്തെക്കുറിച്ചുള്ള കൂടുതല്‍ വിശേഷങ്ങള്‍ പങ്കുവെച്ചത്. ആദ്യ കാഴ്ചയില്‍ത്തന്നെ പൂജയെ വിവാഹം ചെയ്യാനായി താന്‍ ആഗ്രഹിച്ചിരുന്നുവെന്ന് അദ്ദേഹം നേരത്തെ പറഞ്ഞിരുന്നു. പൂജയും സമ്മതം അറിയിച്ചതോടെയാണ് വിവാഹം തീരുമാനിച്ചതെന്നും അദ്ദേഹം പറയുന്നു.

നേരത്തെ തന്നെ പൂജയെ അറിയാമെങ്കിലും തന്നെ വിവാഹം ചെയ്യുമോയെന്ന് ചോദിക്കാനും മാത്രമുള്ള പരിചയമില്ലായിരുന്നുവെന്നും താരം പറയുന്നു. തന്റെ കുടുംബാംഗങ്ങളും ഒപ്പമുണ്ടായിരുന്നപ്പോഴാണ് പൂജയോട് വിവാഹത്തെക്കുറിച്ച് സംസാരിച്ചത്. വിവാഹാഭ്യര്‍ത്ഥന നടത്തണമെന്നൊന്നും നേരത്തെ കരുതിയിരുന്നില്ല. നേരത്തെ ആസുത്രണം ചെയ്ത കാര്യമൊന്നുമായിരുന്നില്ല അതെന്നും താരം പറയുന്നു.

തനിക്ക് ചേരുന്ന പങ്കാളിയാണ് ഇതെന്ന് തോന്നിയിരുന്നുവെന്നും നമുക്ക് ഒരുമിച്ച് ജീവിക്കാനും കുഞ്ഞുങ്ങള്‍ ഉണ്ടാകാനും കുറച്ച് സമയമേയുള്ളൂവെന്നും വിവാഹം കഴിക്കാമോയെന്നും ചോദിക്കുകയായിരുന്നുവെന്നും താരം പറയുന്നു. സോഷ്യല്‍ മീഡിയയിലൂടെ അദ്ദേഹം പ്രണയത്തെക്കുറിച്ചുള്ള തുറന്നുപറച്ചിലുകള്‍ നടത്തിയിരുന്നു. മനോഹരമായ ചിത്രങ്ങളും പങ്കുവെച്ചിരുന്നു.

5 മാസത്തെ പ്രണയത്തിന് ശേഷമാണ് തങ്ങള്‍ വിവാഹിതരായതെന്ന് നവാബ് ഷാ പറയുന്നു. നേരത്തെ നവാബിനെ അറിയാമായിരുന്നുവെങ്കിലും ഫെബ്രുവരി മാസത്തിലാണ് അദ്ദേഹത്തെ വീണ്ടും കണ്ടതെന്നും ആ കൂടിക്കാഴ്ചയാണ് നിര്‍ണ്ണായകമായി മാറിയതെന്നും പൂജ പറയുന്നു. അടുത്ത സുഹൃത്ത് വഴിയായിരുന്നു ആ കൂടിക്കാഴ്ച. അതേക്കുറിച്ച് ഓര്‍ക്കുമ്പോള്‍ എല്ലാം യാദൃശ്ചികമായി തോന്നുന്നുവെന്നും പൂജ പറയുന്നു.

നവാബുമായുള്ള വിവാഹത്തില്‍ താന്‍ അതീവ സന്തുഷ്ടയാണെന്നും താരം വ്യക്തമാക്കിയിരുന്നു. സോഷ്യല്‍ മീഡിയയില്‍ സജീവമായ ഇരുവരും വിശേഷങ്ങളെല്ലാം പങ്കുവെച്ചാണ് എത്തുന്നത്. വിവാഹത്തിന്റെ ചിത്രങ്ങള്‍ വൈറലായി മാറിയിരുന്നു. ആചാരപ്രകാരമുള്ള ചടങ്ങുകളായിരുന്നു ആദ്യം നടത്തിയത്. അധികം വൈകാതെ തന്നെ വിവാഹം രജിസ്റ്റര്‍ ചെയ്യുമെന്നും താരം വ്യക്തമാക്കിയിരുന്നു.

ഫെമിന മിസ് ഇന്ത്യ കിരീടം സ്വന്തമാക്കിയതിന് പിന്നാലെയായാണ് പൂജ ബത്രയെത്തേടി സിനിമാപ്രവര്‍ത്തകരെത്തിയത്. ആസൈ എന്ന സിനിമയിലൂടെയായിരുന്നു താരം തുടക്കം കുറിച്ചത്. വിരാസത്, ഒരുവന്‍, ജോഡി നമ്പര്‍ വണ്‍, തുടങ്ങി നിരവധി സിനിമകളിലാണ് താരം അഭിനയിച്ചത്. 2003 ല്‍ ഡോ എസ് അലുവായിയും പൂജയും വിാഹിതരായിരുന്നു. വിവാഹത്തോടെ താരം സിനിമയില്‍ നിന്നും അകലുകയായിരുന്നു. 2011ലായിരുന്നു ഇരുവരും വേര്‍പിരിഞ്ഞത്.