ആ ​ഗാനത്തിൽ ഷാരൂഖ് മാത്രം സുരക്ഷാ കവചം ധരിച്ചില്ല; ദിൽ സെയിലെ ​ഗാനരം​ഗത്തെക്കുറിച്ച് മണിരത്നം

ഇപ്പോൾ ഈ ​ഗാനരം​ഗം ഷൂട്ട് ചെയ്തതിനെ പറ്റി സംസാരിച്ചിരിക്കുകയാണ് മണിരത്നം. റഹ്മാന്റെ സം​ഗീതത്തിലൂടെയാണ് ആ മാജിക്ക് സാധ്യമായത്. പക്ഷെ സെറ്റിൽ സാങ്കേതികമായ ഒരുപാട് തടസ്സങ്ങൾ ഉണ്ടായിരുന്നു.

ഓടുന്ന ട്രെയ്നിൽ ഷൂട്ട് ചെയ്യുമ്പോൾ ഇടയ്ക്ക് വെളിച്ചം നഷ്ടപ്പെടുക, ട്രെയ്നിന് പുറത്ത് ക്യാമറയും മറ്റും വെക്കുക, ഡാൻസേർസിന്റെയും മലൈകയുടെയും ഷാരൂഖിന്റെയും സുരക്ഷ ഉറപ്പ് വരുത്തുക തുടങ്ങിയവയാണ് നേരിട്ട വെല്ലുവിളികളെന്ന് മണിരത്നം പറഞ്ഞു. അതിനാൽ തന്നെ ക്രിയേറ്റീവ് ആയി ഒരുപാട് ചെയ്യാൻ ​ഗാനരം​ഗത്തിൽ പരിമിതികൾ ഉണ്ടായിരുന്നെന്നും അദ്ദേഹം ചൂണ്ടിക്കാട്ടി.

ഓടുന്ന ട്രെയ്നിന് മുകളിൽ വെച്ച് ഡാൻസ് ചെയ്യുമ്പോൾ ഷാരൂഖ് സുരക്ഷാ കവചങ്ങൾ ഉപയോ​ഗിച്ചിരുന്നില്ലെന്നും സ്വതന്ത്രമായി ​ഗാനത്തിനനുസരിച്ച് ഡാൻസ് ചെയ്യാൻ വേണ്ടിയാണ് ഷാരൂഖ് സുരക്ഷാ കവചം ഒഴിവാക്കിയതെന്നും മണിരത്നം പറഞ്ഞു.

'കോച്ചുകളിലേക്ക് ഷാരൂഖ് ചാടുന്നത് നിങ്ങൾക്ക് കാണാം. പെർഫോം ചെയ്യുമ്പോൾ അക്ഷരാർത്ഥത്തിൽ ഷാരൂഖ് ആസ്വദിക്കുകയായിരുന്നെന്ന് നിങ്ങൾക്ക് കാണാം,' മണിരത്നം പറഞ്ഞു. സമയവും സുരക്ഷയും പരി​ഗണിച്ച് എത്രയും പെട്ടെന്ന് ആ ​ഗാനരം​ഗം പൂർത്തിയാക്കുകയായിരുന്നു തങ്ങളുടെ ലക്ഷ്യമെന്നും മണിരത്നം പറഞ്ഞു.

മണിരത്നത്തിന്റെ സ്വപ്ന സിനിമയായ പൊന്നിയിൻ സെൽവൻ റിലീസിന് ഒരുങ്ങുകയാണ്. സെപ്റ്റംബർ 30 നാണ് സിനിമ റിലീസ് ചെയ്യുന്നത്. പൊന്നിയിൻ സെൽവൻ എന്ന നോവലാണ് മണിരത്നം രണ്ട് ഭാ​ഗങ്ങളുള്ള സിനിമ ആക്കുന്നത്. കൽക്കി കൃഷ്മ മൂർത്തി എഴുതിയ ഈ ക്ലാസിക് തമിഴ് നോവൽ നേരത്തെ പലരും സിനിമയാക്കാൻ ശ്രമിച്ചെങ്കിലും നടന്നിരുന്നില്ല. നേരത്തെ പല തവണ മണിരത്നം തന്നെ ഈ സിനിമയൊരുക്കാൻ ശ്രമിച്ചിരുന്നു.

എന്നാൽ വർഷങ്ങൾക്കിപ്പുറം ആണ് മണിരത്നത്തിന് ഇത് സാധ്യമായത്. വിക്രം, ജയം രവി, ഐശ്വര്യ റായ്, തൃഷ, കാർത്തി, ഐശ്വര്യ ലക്ഷ്മി, ശോഭിത ധുലിപാല, റഹ്മാൻ തുടങ്ങി വൻ താരനിരയാണ് പൊന്നിയിൽ സെൽവനിൽ അണിനിരക്കുന്നത്. സിനിമയുടെ ട്രെയ്ലറും മോഷൻ പോസ്റ്ററുമെല്ലാം ഇതിനകം വലിയ ജനശ്രദ്ധ ആകർഷിച്ചിട്ടുണ്ട്.