'വേർപിരിയാനല്ല... ഒന്നായത്', ​ഗോസിപ്പുകൾ കാറ്റിൽ പറത്തി നിക്ക്-പ്രിയങ്ക ദാമ്പത്യത്തിന് മൂന്ന് വയസ്

അടുത്തിടെ ഇരുവരും വേർപിരിയാൻ പോകുന്നുവെന്ന തരത്തിൽ വ്യാപകമായി വാർത്തകൾ പരന്നിരുന്നു. പ്രിയങ്ക തന്റെ പേരിൽ നിന്നും നിക്കിന്റെ സർ നെയിം ആയ ജൊനാസ് ഒഴിവാക്കിയിരുന്നു. ഇതോടെയാണ് ഇരുവരും വേർപിരിയാൻ പോകുന്നുവെന്ന തരത്തിൽ അഭ്യൂഹങ്ങൾ പ്രചരിക്കാൻ തുടങ്ങിയത്. സാമന്തയുടെ വിവാഹ മോചന അഭ്യൂഹങ്ങളും പ്രചരിക്കാൻ തുടങ്ങിയത് താരം പേരിനൊപ്പം ചേർത്തിരുന്ന അക്കിനേനി എന്ന നാ​ഗചൈതന്യയുടെ കുടുംബപേര് നീക്കം ചെയ്തതോടെയാണ്. സാമന്തയുടെ കാര്യത്തിൽ പാപ്പരാസികളുടെ ഊഹം ശരിയായിരുന്നുവെങ്കിലും പ്രിയങ്ക-നിക്ക് ബന്ധത്തെ കുറിച്ചുള്ള പ്രവചനം ചീറ്റി പോയി എന്നാണ് പിന്നീടുള്ള ഇരുവരുടേയും സോഷ്യൽമീഡിയ പോസ്റ്റുകൾ വ്യക്തമാക്കുന്നത്.

സാമന്തയുടെ വഴിയെ പ്രിയങ്കയും നീങ്ങുന്നുവെന്നാണ് വാർത്തകൾ പ്രചരിച്ചിരുന്നത്. ഈ വാർത്തകൾ പ്രചരിക്കുന്നതിനിടയിൽ തന്നെ നിക്കിന് വേണ്ടി നെറ്റ്ഫ്‌ളിക്‌സിന്റെ ദ ജൊനാസ് ബ്രദേഴ്‌സ് ഫാമിലി റോസ്റ്റ് പരിപാടിയില്‍ പ്രിയങ്ക പങ്കെടുക്കുകയും അവിടെ വെച്ച് പ്രിയങ്ക നിക്കിനെ കുറിച്ച് സംസാരിക്കുന്ന വീഡിയോയും പ്രിയങ്ക തന്നെ സോഷ്യൽമീഡിയയിൽ പങ്കുവെച്ചിരുന്നു. വീഡിയോയിൽ പ്രിയങ്ക നിക്കിനേയും അദ്ദേഹത്തിന്റെ കുടുംബത്തിലെ സഹോദരങ്ങൾ അടക്കമുള്ളവരേയും റോസ്റ്റ് ചെയ്യുന്നതും വീഡിയോയിൽ കാണാമായിരുന്നു. നിക്കുമായുള്ള തന്റെ ദാമ്പത്യ ജീവിതം എത്രത്തോളം കെട്ടുറപ്പുള്ളതാണെന്ന് പല അഭിമുഖങ്ങളിലും പ്രിയങ്ക വ്യക്തമാക്കിയിട്ടുണ്ട്. ജോലി തിരക്കുകൾക്കിടയിൽ തങ്ങളുടെ പരസ്പര സ്നേഹത്തിന് വേണ്ടി കുറച്ച് സമയം നീക്കിവെക്കാൻ നിക്ക് എന്നും സഹായിക്കാറുണ്ടെന്നും. തങ്ങളുടെ പ്രൊഫഷണൽ കാര്യങ്ങളിൽ ഇരുവരും തലയിടുകയോ അഭിപ്രായങ്ങൾ പങ്കുവെക്കുകയോ ചെയ്യാറില്ലെന്നും പ്രിയങ്ക മുമ്പ് പറഞ്ഞിരുന്നു.

Recommended Video

Priyanka chopra's natural hair mask

മറ്റെന്തിനെക്കാളും പരസ്പരമുള്ള അഭിപ്രായങ്ങൾക്കാണ് മുൻ​ഗണന നൽകാറുള്ളതെന്നും പ്രിയങ്ക വ്യക്തമാക്കി. ലണ്ടനിലായിരുന്നു പ്രിയങ്കയുടേയും നിക്കിന്റേയും മൂന്നാം വിവാഹ വാർഷിക ആഘോഷങ്ങൾ. മനോഹരമായി അലങ്കരിച്ച മെഴുകുതിരികൾക്കിടയിൽ ഇരിക്കുന്ന പ്രിയങ്കയുടെ വീഡിയോയും 'മൂന്ന് വർഷം' എന്നെഴുതികൊണ്ട് വിവാഹ വാർഷിക ദിനത്തിൽ നിക്ക് ജൊനാസ് പങ്കുവെച്ചിരുന്നു. ഇരുവരും വിവാഹ വാർഷിക ആഘോഷത്തിനായി ഒരുക്കിയ ഇടത്ത് 'ഫോർഎവർ' എന്നും വെള്ള നിറത്തിൽ ദീപങ്ങളാൽ അലങ്കരിച്ച് എഴുതി ചേർത്തിരുന്നു. പ്രിയങ്കയും വിവാഹ വാർഷിക ആഘോഷങ്ങളുടെ ചിത്രങ്ങൾ പങ്കിട്ടിരുന്നു. ബോളിവുഡ്, ഹോളിവുഡ് സെലിബ്രിറ്റികളടക്കം നിരവധി പേർ നിക്കിനും പ്രിയങ്കയ്ക്കും വിവാഹ വാർഷിക ആശംസകൾ നേർന്നു.