നാനാ പടേക്കര്‍ മാന്യനല്ലെന്ന് അറിയാം,പക്ഷേ തനുശ്രീയോട് അങ്ങനെ ചെയ്യുമെന്ന് കരുതുന്നില്ല:രാജ് താക്കറെ

നാനാ പടേക്കറിനെ അനുകൂലിച്ച് രാജ് താക്കറെ

നാനാ പടേക്കര്‍ മാന്യനല്ലെങ്കില്‍ പോലും തനുശ്രീയോട് ഇങ്ങനെ പെരുമാറുമെന്ന് കരുതുന്നുന്നില്ലെന്നായിരുന്നു രാജ് താക്കറെ പറഞ്ഞിരുന്നത്. തനുശ്രീ കള്ളം പറഞ്ഞതാകാമെന്നും താക്കറെ ആരോപിക്കുന്നു. അയാള്‍ മാന്യനല്ലെന്ന് തനിക്ക് നന്നായി അറിയാം. ഭ്രാന്തമായ പല കാര്യങ്ങളും അയാള്‍ ചെയ്യാറുണ്ട്. എന്തൊക്കെയായാലും തനുശ്രീക്കെതിരെ അയാള്‍ അങ്ങനെ ചെയ്യില്ലെന്നു തന്നെയാണ് കരുതുന്നത്. കോടതി അക്കാര്യം പരിഗണിക്കട്ടെയന്നും അദ്ദേഹം പറയുന്നു.

രാജ് താക്കറെ പറഞ്ഞത്

സിനിമാ രംഗത്ത് മീ ടു വിവാദങ്ങള്‍ കത്തിനില്‍ക്കവേ മാധ്യമങ്ങള്‍ അതിന് പിന്നാലെ പോകണ്ട ആവശ്യമുണ്ടോയെന്നാണ് രാജ് താക്കറെ ചോദിക്കുന്നത്. മീടു എന്നത് വളരെ ഗൗരവമുളള വിഷയമാണ്. പക്ഷേ അതിനെക്കുറിച്ച് സമൂഹ മാധ്യമങ്ങളില്‍ ചര്‍ച്ച നടത്തുന്നത് ശരിയായ കാര്യമല്ലെന്നും രാജ് താക്കറെ പറയുന്നു. സ്ത്രീകള്‍ക്ക് നേരെയുളള എതുതരം ആക്രമണങ്ങളിലും സഹായം തേടി നവനിര്‍മ്മാണ്‍ സേനയെ സമീപിക്കാമെന്നും രാജ് താക്കറെ പറയുന്നു.

അടിച്ചമര്‍ത്തലിന് എതിരെ ശബ്ദം ഉയരണം

ഏത് മേഖലയില്‍ ജോലി ചെയ്യുന്നവര്‍ ആയാലും അടിച്ചമര്‍ത്തലിന് എതിരെ സ്ത്രീകള്‍ ശബ്ദം ഉയര്‍ത്തണമെന്നും രാജ് താക്കറെ പറയുന്നു. ഇത്തരം വെളിപ്പെടുത്തലുകള്‍ നടത്തേണ്ടത് പത്ത് വര്‍ഷം കഴിഞ്ഞല്ലായെന്നും സംഭവം നടക്കുമ്പോള്‍ തന്നെയാണെന്നും രാജ് താക്കറെ കൂട്ടിച്ചേര്‍ത്തു. പെട്രോള്‍ വിലവര്‍ധന,രൂപയുടെ മൂല്യത്തകര്‍ച്ച. തൊഴിലില്ലായ്മ എന്നീ പ്രശ്‌നങ്ങളെ മറയ്ക്കാനുളള പഴുതായാണ് മീടു നിലവില്‍ ഉപയോഗിക്കപ്പെടുന്നതെന്നും രാജ് താക്കറെ ആരോപിച്ചു. ദേശീയമാധ്യമത്തിന് നല്‍കിയ അഭിമുഖത്തിലായിരുന്നു രാജ് താക്കറെ ഇക്കാര്യം പറഞ്ഞത്.

രാജ് താക്കറെയ്‌ക്കെതിരെ തനുശ്രീ പറഞ്ഞത്

രാജ് താക്കറെ ഒരു ഗുണ്ടയാണെന്നും സ്ത്രീകളെ ആക്രമിക്കുന്നവരെ ഒരിക്കലും നേതാവെന്ന് വിളിക്കാന്‍ സാധിക്കില്ലെന്നും മുന്‍പ് തനുശ്രീ ആരോപിച്ചിരുന്നു. കൂടാതെ ബാല്‍ താക്കറെയുടെ മരണശേഷം രാജ് താക്കറെയ്ക്ക് ശിവസേന തലവനാകണമെന്ന് അഗ്രഹമുണ്ടായിരുന്നുവെന്നും എന്നാല്‍ സാധിച്ചില്ലെന്നും തനുശ്രീ പറഞ്ഞിരുന്നു. കൂടാതെ ഹോണ്‍ ഒകെ പ്ലീസ് എന്ന ചിത്രത്തില്‍ നിന്നും പിന്മാറിയപ്പോള്‍ തനിക്കെതിരെ ആക്രമണം നടത്തിയവരില്‍ എംഎന്‍എസും ഉണ്ടായിരുന്നെന്നും തനുശ്രീ ആരോപിച്ചിരുന്നു.

നവനിര്‍മ്മാണ്‍ സേന പറഞ്ഞത്

രാജ് താക്കറയ്‌ക്കെതിരെ വിവാദ പരാമര്‍ശം നടത്തിയതിന് തനുശ്രീയ്‌ക്കെതിരെ നവനിര്‍മ്മാണ്‍ സേന രംഗത്തുവന്നിരുന്നു. തനുശ്രീയെ ബിഗ് ബോസില്‍ പങ്കെടുപ്പിച്ചാല്‍ ആക്രമിക്കുമെന്നായിരുന്നു മുന്‍പ് നവനിര്‍മ്മാണ്‍ സേന അനുയായികള്‍ അറിയിച്ചിരുന്നത്. മറാത്തി നടന്‍മാരെയും പാര്‍ട്ടിയെയും അപമാനിക്കാന്‍ തനുശ്രീ ശ്രമിക്കുന്നുണ്ടെന്നും ഇത് അനുവദിക്കാന്‍ കഴിയില്ലെന്നുമായിരുന്നു നവനിര്‍മ്മാണ്‍ സേന പറഞ്ഞിരുന്നത്.