ക്യാമറയ്ക്ക് മുന്നില്‍വെച്ച് അന്ന് അങ്ങനെ ചെയ്തപ്പോള്‍ ദീപിക ദേഷ്യപ്പെട്ടു; തുറന്നുപറഞ്ഞ് രണ്‍വീര്‍ സിങ്ങ്

ദീര്‍ഘനാളത്തെ പ്രണയത്തിനുശേഷം 2018 നവംബറിലാണ് ദീപികയും രണ്‍വീറും വിവാഹിതരാകുന്നത്. വിവാഹത്തിന് ശേഷമായിരുന്നു ദീപികയുമായുള്ള പ്രണയത്തെക്കുറിച്ച് രണ്‍വീര്‍ വെളിപ്പെടുത്തിയത്. ഈ വിവാഹത്തിനായി ഏറെ നാളായി കാത്തിരിക്കുകയായിരുന്നു എന്നും രണ്‍വീര്‍ പറയുന്നു. രണ്‍വീറിന്റെ വാക്കുകള്‍ ഇങ്ങനെ. ''ഏകദേശം മൂന്ന് വര്‍ഷമായി ഞാന്‍ വിവാഹത്തെ കുറിച്ച് ഗൗരവത്തോടെ ചിന്തിച്ചിരുന്നു. ദീപിക തയ്യാറാവാന്‍ വേണ്ടി കാത്തിരിക്കുകയായിരുന്നു. അവള്‍ തീരുമാനിച്ചപ്പോള്‍ വിവാഹം സംഭവിക്കുകയായിരുന്നു.' രണ്‍വീര്‍ പറയുന്നു. ഭാര്യയോടുള്ള സ്‌നേഹവും ബഹുമാനവും പൊതുവേദികളിലും രണ്‍വീര്‍ തുറന്നുപ്രകടിപ്പിക്കാറുണ്ട്.

ഏകദേശം പത്ത് വര്‍ഷം മുമ്പായിരുന്നു ഇരുവരും ഡേറ്റിങ്ങ് ആരംഭിച്ചത്. ഇപ്പോള്‍ അക്കാലത്തെക്കുറിച്ചുള്ള ഓര്‍മ്മകള്‍ പുതുക്കുകയാണ് രണ്‍വീര്‍ സിങ്ങ്. ആദ്യ ദിവസങ്ങളില്‍ ദീപിക തന്നോട് വല്ലാതെ ദേഷ്യപ്പെടുമായിരുന്നുവെന്ന് തുറന്നു പറയുകയാണ് അദ്ദേഹം.

ബാജിറാവു മസ്താനി എന്ന ചിത്രത്തിന് വേണ്ടിയാണ് താനും ദീപികയും ആദ്യമായി ഒരുമിച്ച് അഭിമുഖം നടത്തിയത്. അന്നാണ് അവളെ ആദ്യമായി ക്യാമറയ്ക്കു മുന്നില്‍ വെച്ച് ഞാന്‍ കെട്ടിപ്പിടിച്ചത്. പക്ഷ, ഞാന്‍ ആലിംഗനം ചെയ്തപ്പോള്‍ അവള്‍ എന്നോടു ദേഷ്യപ്പെടുകയായിരുന്നു. ക്യാമറയ്ക്ക് മുന്നില്‍ വെച്ച് നീ എന്നെ ഇങ്ങനെയൊക്കെ കെട്ടിപ്പിടിക്കുമോ എന്നായിരുന്നു അവളുടെ ദേഷ്യഭാവത്തോടെയുള്ള ചോദ്യം. പക്ഷെ, ഇപ്പോള്‍ അവളെന്റെ നല്ല സുഹൃത്തും ഭാര്യയും കാമുകിയും എല്ലാമാണ്. രണ്‍വീര്‍ പറയുന്നു.

തന്റെ ജീവിതത്തില്‍ സംഭവിച്ച ഏറ്റവും നല്ല കാര്യമാണ് ദീപികയുമായുള്ള വിവാഹം. പ്രണയത്തിലായി പത്ത് വര്‍ഷങ്ങള്‍ പിന്നിടുമ്പോഴും അവള്‍ എന്നെ ഇപ്പോഴും വിസ്മയിപ്പിച്ചുകൊണ്ടിരിക്കുകയാണ്. വിവാഹം കഴിഞ്ഞ് നാല് വര്‍ഷമായിട്ടും ഞങ്ങള്‍ തമ്മിലുള്ള ബന്ധം ഇപ്പോഴും പുതുമ നഷ്ടപ്പെടാതെ സൂക്ഷിക്കുന്നു. കുട്ടികളുടെ കാര്യത്തെക്കുറിച്ച് ചോദിച്ചപ്പോള്‍ കാനില്‍ നിന്നും നിന്ന് തിരിച്ചെത്തുമ്പോള്‍ നിങ്ങള്‍ അവളോട് ചോദിക്കൂ എന്നായിരുന്നു താരത്തിന്റെ മറുപടി.

ജയേഷ് ഭായ് ജോര്‍ദാറാണ് രണ്‍വീറിന്റെ ഏറ്റവും പുതിയ ചിത്രം. അടുത്തിടെ തീയറ്റര്‍ റിലീസായി പുറത്തിറങ്ങിയ ചിത്രം മികച്ച പ്രതികരണം സ്വന്തമാക്കിയിരുന്നു. ശാലിനി പാണ്ഡേ, ദീക്ഷ ജോഷി എന്നിവരാണ് ചിത്രത്തില്‍ രണ്‍വീറിന്റെ നായികമാരായി എത്തുന്നത്. കരണ്‍ ജോഹറിന്റെ പുതിയ ചിത്രമായ റോക്കി ഓര്‍ റാണി കി പ്രേം കഹാനി എന്ന ചിത്രത്തിലും രണ്‍വീര്‍ സിങ്ങാണ് നായകന്‍. സ്ത്രീ കേന്ദ്രിതമായി ഒരുക്കുന്ന ചിത്രത്തില്‍ ആലിയ ഭട്ടാണ് നായിക. ഈ ചിത്രത്തിന്റെ ഷൂട്ടിങ്ങ് മുംബൈയില്‍ പുരോഗമിക്കുകയാണ്.

2006-ല്‍ പുറത്തിറങ്ങിയ കന്നട ചിത്രമായ ഐശ്വര്യയിലൂടെയാണ് ദീപിക പദുക്കോണ്‍ സിനിമാരംഗത്ത് എത്തുന്നത്. എന്നാല്‍ നടി ശ്രദ്ധിക്കപ്പെടുന്നത് 2007ല്‍ പുറത്തിറങ്ങിയ ഓം ശാന്തി ഓം എന്ന ഷാരൂഖ് ഖാന്‍ ചിത്രത്തിലൂടെയാണ്. ദീപികയുടെ ആദ്യത്തെ ബോളിവുഡ് ചിത്രമായിരുന്നു ഇത്. ബോക്‌സ്ഓഫീസ് സൂപ്പര്‍ ഹിറ്റായിരുന്ന ചിത്രം മികച്ച പ്രതികരണമമാണ് ദീപികക്ക് നേടിക്കൊടുത്തത്. ഈ ചിത്രത്തിലൂടെ മികച്ച പുതുമുഖ നടിക്കുള്ള ഫിലിം ഫെയര്‍ പുരസ്‌കാരവും ദീപികയ്ക്ക് ലഭിച്ചിരുന്നു.

ഇത്തവണത്തെ കാന്‍ ഫിലിം ഫെസ്റ്റിവലില്‍ ഇന്ത്യയുടെ അഭിമാന താരമായിരുന്നു ദീപിക പദുക്കോണ്‍. ജൂറി അംഗമായി തിരഞ്ഞെടുക്കപ്പെട്ട ദീപികയ്ക്ക് റെഡ് കാര്‍പ്പറ്റില്‍ മികച്ച സ്വീകരണമാണ് ലഭിച്ചത്.

ആമസോണ്‍ പ്രൈമില്‍ അടുത്തിടെ പുറത്തിറങ്ങിയ ഗെഹ്‌രിയാന്‍ ആയിരുന്നു ദീപികയുടെ ഒടുവില്‍ പുറത്തിറങ്ങിയ ചിത്രം. ബിഗ് ബജറ്റില്‍ ഒരുക്കുന്ന ഷാരൂഖ് ഖാന്‍ ചിത്രം പത്താന്റെ റിലീസിനായി കാത്തിരിക്കുകയാണ് ഇപ്പോള്‍ താരം. യഷ് രാജ് ഫിലിംസിന്റെ ബാനറില്‍ ഹൃത്വിക് റോഷന്‍ നായകനാകുന്ന പുതിയ ചിത്രത്തിലും ദീപിക തന്നെയാണ് നായിക.