'എന്റെ മനസ് കൈവിട്ട് പോയിട്ടുണ്ട്, ആര്‍ക്കും പങ്കാളിയെ നഷ്ടമാകരുത്'; ഭാര്യയെ കുറിച്ച് രാഹുല്‍ ദേവ്!

2009 ലാണ് രാഹുലിന്റെ ഭാര്യ റീന ദേവി കാന്‍സര്‍ രോഗത്തെ തുടര്‍ന്ന് മരിച്ചത്. ദീര്‍ഘനാളത്തെ പ്രണയത്തിനൊടുവിലാണ് രാഹുല്‍ ദേവ് 1998ല്‍ റീന ദേവിയെ വിവാഹം ചെയ്തത്. 2009 ലായിരുന്നു റീനയുടെ മരണം. അതിനുശേഷം മകനെ വളര്‍ത്തുന്നതില്‍ താന്‍ ഒരുപാട് കഷ്ടപ്പെട്ടുവെന്ന് വെളിപ്പെടുത്തിയിരിക്കുകാണ് രാഹുല്‍.

അച്ഛന്റേയും അമ്മയുടേയും വേഷം ഒറ്റയ്ക്ക് ചെയ്യേണ്ടി വരുന്നത് വല്ലാത്ത അവസ്ഥയാണെന്നാണ് രാഹുല്‍ പറയുന്നത്. 'പാരന്റിങ് അത്ര എളുപ്പമുള്ള കാര്യമല്ല. ഒരു കുട്ടി വളര്‍ന്ന് വരുമ്പോള്‍ അമ്മയ്ക്കുള്ള പങ്ക് വലുതാണ്.'

'സ്ത്രീകള്‍ക്ക് കുട്ടികളെ കുറച്ച് കൂടി മനസിലാക്കാന്‍ സാധിക്കും. പലപ്പോഴും എന്റെ മനസ് കൈവിട്ട് പോയിട്ടുണ്ട്. അച്ഛനും അമ്മയുമാകാന്‍ ഞാന്‍ ഒറ്റയ്ക്ക് ശ്രമിച്ചുകൊണ്ടേയിരുന്നു. രക്ഷിതാക്കളുടെ യോഗത്തിന് സ്‌കൂളിലേക്ക് പോകുമ്പോള്‍ അവിടെ ഭൂരിഭാഗവും സ്ത്രീകളെയാണ് കണ്ടിട്ടുള്ളത്.'

'ആ സമയത്തെല്ലാം എനിക്ക് എന്തോ അരക്ഷിതാവസ്ഥ തോന്നും. വളരെ ദുഖകരമായ സംഗതിയാണ്. ആര്‍ക്കും പങ്കാളിയെ നഷ്ടമാകരുതെന്ന് ഞാന്‍ ആഗ്രഹിക്കുന്നു. സിനിമയില്‍ കാണുമ്പോള്‍ വളരെ എളുപ്പമാണെന്ന് തോന്നും. എന്നാല്‍ പങ്കാളി നഷ്ടപ്പെട്ട് കുട്ടികളെ വളര്‍ത്തേണ്ടി വരുന്നത് വലിയ പ്രതിസന്ധിയാണ്' രാഹുല്‍ ദേവ് പറഞ്ഞു.

ഭാര്യയുടെ മരണശേഷം വളരെ നാളുകളായി സിം​ഗിളായി ജീവിക്കുകയായിരുന്ന രാഹുൽ ദേവ് ഇപ്പോൾ നടി മുഗ്ധ ഗോഡ്‌സെയുമായി പ്രണയത്തിലാണ്. ഇരുവരും തമ്മില്‍ പതിനാല് വര്‍ഷത്തെ പ്രായ വ്യത്യാസമുണ്ട്.

പ്രായ വ്യത്യാസം മുഗ്ധയെ സംബന്ധിച്ച് ന്യയമല്ലെന്ന് പലപ്പോഴും തോന്നിയിട്ടുണ്ടെന്നും എന്നാല്‍ ഈ പ്രണയബന്ധത്തില്‍ തങ്ങൾ സംതൃപ്തരാണെന്നും രാഹുല്‍ ദേവ് പറഞ്ഞു.

ഹിന്ദി ബി​ഗ് ബോസ് സീസൺ 10ലും രാഹുൽ ദേവ് മത്സരാർഥിയായി പങ്കെടുത്തിരുന്നു. അറുപത്തി മൂന്നാം ദിവസമാണ് രാഹുൽ ദേവ് എവിക്ടായത്. ചില വെബ് സീരിസുകളും സീരിയലുകളും രാഹുൽ ദേവ് ചെയ്തിട്ടുണ്ട്.

ദി ലെജന്റാണ് രാഹുൽ ദേവ് അഭിനയിച്ച് റിലീസ് ചെയ്ത ഏറ്റവും പുതിയ തെന്നിന്ത്യൻ സിനിമ. തമിഴ്നാട്ടിലെ ഏറ്റവും വലിയ റീട്ടെയിൽ ശൃംഖലകളിലൊന്നായ ശരവണൻ സ്റ്റോറിന്റെ ഉടമയായ ലെജൻഡ് ശരവണ‌നായിരുന്നു ചിത്രത്തിൽ നായകനായക്.

അദ്ദേഹം തന്നെയായിരുന്നു സിനിമ നിർമിച്ചതും. മെഡിക്കൽ മാഫിയ പശ്ചാത്തലത്തിൽ വന്ന ചിത്രത്തിൽ ശാസ്ത്രജ്ഞനായാണ് 50 കാരൻ ലെജൻഡ് ശരവണ‌ൻ അഭിനയിച്ചത്. ഉര്‍വശി റൗട്ടേല, ഗീതിക തിവാരി, ലക്ഷ്മി റായ് എന്നിവരാണ് ചിത്രത്തിലെ നായികമാരായത്.