ഐശ്വര്യ റായിയുടെ മകളും ഗ്ലാമർ ലോകത്ത് എത്തുമോ? മകളെ കുറിച്ചുള്ള ചോദ്യത്തിന് മാസ് മറുപടി പറഞ്ഞ് ഐശ്വര്യ

മകള്‍ ആരാധ്യയുമായിട്ടുള്ള ആത്മബന്ധത്തെ കുറിച്ച് ഐശ്വര്യ റായി പലപ്പോഴും പറഞ്ഞിട്ടുണ്ട്. അമ്മയുടെ പാതയിലൂടെ മകളും ഗ്ലാമറിന്റെ ലോകത്തേക്ക് എത്തുമോന്നാണ് ആരാധകര്‍ക്ക് അറിയേണ്ടത്. എന്നാല്‍ അവള്‍ക്ക് ചുറ്റുമുള്ള സിനിമാ ലോകത്തെ ആരാധ്യ കാണുന്നതെങ്ങനെയാണെന്നാണ് ഐശ്വര്യ മുന്‍പൊരിക്കല്‍ പറഞ്ഞത്. നടിയുടെ ഈ വാക്കുകള്‍ വീണ്ടും സോഷ്യല്‍ മീഡിയയിലൂടെ വൈറലാവുകയാണ്.

'ആരാധ്യയോട് കല്‍പ്പിക്കാനോ അവള്‍ക്കൊരു ജീവിതം തിരഞ്ഞെടുത്ത് കൊടുക്കാനോ അല്ല ഞാന്‍ ഇവിടെ വന്നത്. ഒരു വിധത്തില്‍ അവളുടെ അമ്മയായി ഞാനിവിടെ ഉണ്ട്. അനുദിനം ഞാനത് കാത്തുസൂക്ഷിക്കും. അവള്‍ സന്തോഷവതിയും ആരോഗ്യമുള്ളവളും സുരക്ഷിതയുമായിട്ടുള്ള വ്യക്തിയായി വളരുന്നത് കാണാനാണ് ഞാന്‍ ആഗ്രഹിക്കുന്നത്. അവള്‍ ഇപ്പോള്‍ ലോകത്തെ കാണുന്ന രീതിയിലാണ് ഉട്ടോപ്യയെ കാണുന്നതും.

അവളുടെ കണ്ണുകളിലൂടെ ഞാനും അത് അനുഭവിക്കുന്നു. അത് വളരെ പരിശുദ്ധമാണ്. ദൈവത്തിന് തുല്യമായതും. നിങ്ങള്‍ ഓരോരുത്തരും നിങ്ങളുടെ കുട്ടികളിലൂടെ ദൈവത്തെ കാണുന്നുണ്ടാവും. അതാണ് അവളിലൂടെ ഞാന്‍ കാണുന്നതും അനുഭവിക്കാന്‍ ആഗ്രഹിക്കുന്നതും' എന്നുമാണ് ഐശ്വര്യ റായി പറയുന്നത്.

നിലവില്‍ തമിഴിലേക്ക് തിരിച്ച് വന്നിരിക്കുകയാണ് ഐശ്വര്യ റായി. മണിരത്‌നം സംവിധാനം ചെയ്യുന്ന പൊന്നിയന്‍ സെല്‍വന്‍ എന്ന സിനിമയില്‍ ശക്തമായൊരു കഥാപാത്രത്തെ അവതരിപ്പിക്കുന്നത് ഐശ്വര്യയാണ്. പ്രഖ്യാപനം മുതല്‍ വലിയ പ്രതീക്ഷകള്‍ നല്‍കിയ ചിത്രമാണിത്. വൈകാതെ റിലീസിനൊരുങ്ങുന്ന ചിത്രത്തിന്റെ പ്രൊമോഷന്‍ തിരക്കുകളിലേക്ക് കടന്നിരിക്കുകയാണ് താരങ്ങള്‍.

2007 ല്‍ അഭിഷേക് ബച്ചനുമായിട്ടുള്ള വിവാഹം കഴിഞ്ഞതോടെയാണ് ഐശ്വര്യ റായി അഭിനയത്തില്‍ നിന്നും ചെറിയ ഇടവേള എടുത്തത്. 2011 ല്‍ മകള്‍ ആരാധ്യ കൂടി ജനിച്ചതോടെ അഭിനയത്തില്‍ നിന്നും വലിയ ഇടവേളകളെടുത്തു. എന്തായാലും മകളെ പെട്ടെന്ന് അഭിനയിപ്പിക്കാനുള്ള താല്‍പര്യം ഐശ്വര്യയ്‌ക്കോ അഭിഷേകിനോ ഉണ്ടാവില്ലെന്നാണ് താരങ്ങളുടെ വാക്കുകളില്‍ നിന്നും വ്യക്തമാവുന്നത്.