'അനുവാദമൊന്നും ചോദിക്കേണ്ട, ഞാൻ പറയുമ്പോലെ കെട്ടിപിടിച്ച് ഉമ്മവെച്ചാൽ മതി'; സൽമാൻ‌ഖാനെ കുറിച്ച് ഭാ​ഗ്യശ്രീ!

അൽവിറ, അർപ്പിത എന്നിങ്ങനെ രണ്ട് സഹോദരിമാരും സൽമാനുണ്ട്. അഭിനേതാവെന്ന രീതിയിൽ മാത്രമല്ല നിർമ്മാണരംഗത്തും സജീവമാണ് സൽമാൻ ഖാൻ. ഏറ്റവും ജനപ്രീതിയാർന്ന റിയാലിറ്റിഷോയായ ഹിന്ദി ബിഗ് ബോസിന്റെ അവതാരകനും സൽമാൻ ഖാനാണ്.

അമ്പത്തിയാറുകാരനായ സൽമാൻ ഖാനൊപ്പമുള്ള ഒരു അനുഭവം നടി ഭാ​ഗ്യശ്രീ പങ്കുവെച്ചതാണ് ഇപ്പോൾ വൈറലാകുന്നത്. സൽമാൻ സ്വഭാവം എങ്ങനെയുള്ളതാണെന്ന് വ്യക്തമാക്കുന്നതാണ് ഭാ​ഗ്യശ്രീയുടെ അനുഭവം.

തൊണ്ണൂറുകളിൽ ബോളിവുഡിൽ സൂപ്പർഹിറ്റായി നിന്ന ജോഡിയായിരുന്നു സൽമാൻ ഖാനും ഭാ​ഗ്യശ്രീയും. മേനെ പ്യാർ കിയയ്ക്കുവേണ്ടി ഇരുവരും ഒന്നിച്ച് അഭിനയിച്ചിട്ടുണ്ട്. ആ സിനിമയിലെ ഇരുവരുടേയും കെമിസ്ട്രി ആരാധക ഹൃദയങ്ങൾ കീഴടക്കി.

ഇക്കാരണത്താൽ തുടർന്നും നിരവധി സിനിമകളിൽ ഇരുവരും ഒരുമിച്ച് പ്രവർത്തിച്ചു. എന്നാൽ സമ്മതമില്ലാതെ നടിയെ ചുംബിക്കാൻ സൂപ്പർതാരത്തോട് ഒരു ഫോട്ടോ​ഗ്രാഫർ ആവശ്യപ്പെട്ടപ്പോൾ സൽമാൻ തിരിച്ച് പ്രതികരിച്ച രീതി തന്നെ അത്ഭുതപ്പെടുത്തിയെന്നാണ് ഭാ​ഗ്യശ്രീ വെളിപ്പെടുത്തിയിരിക്കുന്നത്.

'മേനെ പ്യാർ കിയയുടെ വിജയത്തിന് ശേഷം നിരവധി ഫോട്ടോ​ഗ്രാഫേഴ്സ് ഞങ്ങളെ സമീപിക്കുമായിരുന്നു കപ്പിൾ ഫോട്ടോസ് പകർത്തുന്നതിന് വേണ്ടി. അന്ന് വളരെ ജനപ്രിയനായ പ്രശസ്തനായ ഒരു ഫോട്ടോഗ്രാഫർ ഉണ്ടായിരുന്നു. അയാൾ ഇപ്പോൾ ഇല്ല... മരിച്ചു.'

'സൽമാന്റേയും എന്റേയും അത്ര കോംപ്ലിമെന്ററി അല്ലാത്ത ചില ഫോട്ടോഗ്രാഫുകൾ എടുക്കാൻ അയാൾ ആഗ്രഹിച്ചു. ചിലതരം ഹോട്ട് ഫോട്ടോഗ്രാഫുകൾ പകർത്തുകയായിരുന്നു അയാളുടെ ഉദ്ദേശം.'

'അതിനാൽ അയാൾ സൽമാനെ മാറ്റിനിർത്തി പറഞ്ഞു... ഞാൻ ക്യാമറ സജ്ജീകരിച്ച ശേഷം സി​ഗ്നൽ തരാം നിങ്ങൾ അവളെ പിടിച്ച് ഉമ്മവെക്കണം.... അനുവാദമൊന്നും ചോദിക്കേണ്ട. ഞങ്ങൾ എല്ലാവരും പുതുമുഖങ്ങളായിരുന്നു. ഈ ഫോട്ടോഗ്രാഫർ കരുതിയത് എന്തും ഇവരെകൊണ്ട് തനിക്ക് ചെയ്യിപ്പിക്കാൻ കഴിയുമെന്നാണ്.'

'അക്കാലത്ത് അയാൾ ഉ​ദ്ദേശിച്ച തരത്തിലുള്ള ചുംബന രംഗങ്ങൾ പ്രചാരത്തിലില്ല. ഞാൻ വളരെ അടുത്ത് നിൽക്കുന്നുണ്ടെന്നും ഓരോ വാക്കും കേൾക്കുന്നുണ്ടെന്നും അയാളോ സൽമാനോ അപ്പോൾ അറിഞ്ഞില്ല.'

'അയാൾ സൽമാനോട് പറയുന്നത് കേട്ട് ഞാൻ ഒരു നിമിഷം ഞെട്ടിപ്പോയി. പക്ഷെ സൽമാൻ അയാൾക്ക് കൊടുത്ത മറുപടി ഞാൻ കേട്ടു... ഞാൻ അങ്ങനെയൊന്നും ചെയ്യാൻ പോകുന്നില്ല.'

'നിങ്ങൾക്ക് അത്തരത്തിലുള്ള പോസ് വേണമെങ്കിൽ ഭാഗ്യശ്രീയോട് ചോദിക്കണം... സൽമാന്റെ പ്രതികരണത്തിൽ ഞാൻ ശരിക്കും സൽമാനോട് ബഹുമാനമുള്ളവളായി മാറി. അപ്പോഴാണ് ഞാൻ സംരക്ഷിക്കുന്ന ആളുകളുടെ ഇടയിലാണെന്ന് നിൽക്കുന്നതെന്ന് മനസിലായത്', ഭാ​ഗ്യശ്രീ പറഞ്ഞു.