'പ്രവചനം നൂറ് ശതമാനം ഫലിച്ചു'; കുട്ടിയായിരുന്ന കരിഷ്മയെ കണ്ടമാത്രയിൽ തന്നെ അവളുടെ ഭാവി ഗോവിന്ദ പ്രവചിച്ചു!

ഇപ്പോൾ കരിഷ്മയുടെ പുതിയ വീഡിയോയാണ് സോഷ്യൽമീഡിയയിൽ ശ്രദ്ധനേടുന്നത്. കരിഷ്മ കപൂറിനൊപ്പം ബോളിവുഡിലെ സൂപ്പർ സ്റ്റാർ ഗോവിന്ദയും വീഡിയോയിൽ ഉണ്ട്. ഇരുവരും ഒരുമിച്ച് അഭിനയിച്ച ഹീറോ നമ്പർ 1 എന്ന ചിത്രത്തിന്റെ 15 വർഷം ആഘോഷിക്കാൻ ഇന്ത്യാസ് ഗോട്ട് ടാലന്റ് സീസൺ 9ൽ അതിഥികളായി എത്തിയതായിരുന്നു. പഴയ ഓർമകൾ പങ്കുവെക്കുന്നതും ഇരുവരും ഒരുമിച്ച് നൃത്തം ചെയ്യുന്നതും പുതിയ വീഡിയോയിൽ കാണാം. ഹിന്ദി സിനിമയിൽ ഒരു കാലത്ത് തിളങ്ങി നിന്നിരുന്ന നടനാണ് ​ഗോവിന്ദ. 120ൽ അധികം സിനിമകളിൽ അദ്ദേഹം നായകനായി അഭിനയിച്ചിട്ടുണ്ട്. കരിഷ്മയും ​ഗോവിന്ദയും വരുന്ന എപ്പിസോഡിന്റെ പ്രമോ വീഡിയോയാണ് സോഷ്യൽമീ‍ഡിയയിൽ ശ്രദ്ധ നേടുന്നത്. സിനിമയിൽ എത്തും മുമ്പ് തന്നെ കരിഷ്മ ​ഗോവിന്ദയുടെ വലിയ ആരാധികയായിരുന്നു. നായികയായപ്പോൾ ​ഗോവിന്ദയ്ക്കൊപ്പം അഭിനയിക്കാനും കരിഷ്മയ്ക്ക് സാധിച്ചു.

സോണി എന്റർടെയ്ൻമെന്റ്സിലാണ് കരിഷ്മയും ​ഗോവിന്ദയും ഒരുമിച്ച് പങ്കെടുത്ത ഇന്ത്യാസ് ഗോട്ട് ടാലന്റ് സീസൺ 9 എപ്പിസോഡുകൾ സംപ്രേഷണം ചെയ്യാൻ പോകുന്നത്. കരിഷ്മയും ഗോവിന്ദയും റാപ്പർ ബാദ്ഷായും ചേർന്ന് പരിപാടിയിൽ ഹുസ്ൻ ഹേ സുഹാന എന്ന ഗാനത്തിന് നൃത്തം ചെയ്യുകയും ചെയ്തു. പരിപാടിയിൽ പങ്കെടുത്ത് ​ഗോവിന്ദയെ കുറിച്ച് കരിഷ്മ പറഞ്ഞത് ഇങ്ങനെയാണ്. 'ഞാൻ ചെറുപ്പം മുതൽ ചിച്ചി ജിയുടെ (ഗോവിന്ദയുടെ) ഒരു വലിയ ആരാധികനായിരുന്നു. ഖുദ്ഗർസ് റിലീസ് ചെയ്തത് ഞാൻ ഓർക്കുന്നു. എനിക്ക് ആ പാട്ടെന്നാൽ ഭ്രാന്തായിരുന്നു. എനിക്ക് ഗോവിന്ദ ജിയെ കാണാൻ ആഗ്രഹമുണ്ടെന്ന് ഞാൻ എന്റെ അമ്മയോടും അച്ഛനോടും പറഞ്ഞു. അങ്ങനെയിരിക്കെ ചിച്ചിജിയെ ഞാൻ ഒരിക്കൽ കണ്ടു. കണ്ടമാത്രയിൽ അദ്ദേഹം എന്നോട് ചോദിച്ചത് നിനക്ക് നടിയാകാൻ ആഗ്രഹമുണ്ടോ? എന്നായിരുന്നു. ഞാൻ താൽപര്യമുണ്ടെന്ന് പറഞ്ഞു. ആ​ഗ്രഹമുള്ളതിനാൽ‌ നീ തീർച്ചയായും നടിയാകുമെന്ന് അദ്ദേഹം പറയുകയും ചെയ്തു' കരിഷ്മ പറയുന്നു.

അന്ന് മുതൽ അദ്ദേഹത്തിന്റെ അനുഗ്രഹം എനിക്കുണ്ട്. ഞങ്ങൾ ഒരുമിച്ച് പ്രവർത്തിക്കുമെന്നും ഒരുമിച്ച് നൃത്തം ചെയ്യുമെന്നും ഞാൻ ഒരിക്കലും കരുതിയിരുന്നില്ല. എല്ലാ സ്നേഹത്തിനും പ്രേക്ഷകർക്ക് വളരെ നന്ദി. ഹീറോ നമ്പർ 1 എന്ന കോമഡി ഡ്രാമ 1997ൽ പുറത്തിറങ്ങിയ സിനിമയാണ്. ചിത്രത്തിന്റെ ബോക്‌സ് ഓഫീസ് വിജയത്തിന് ശേഷം ഇത് തെലുങ്കിൽ ഗോപ്പിണ്ടി അല്ലുഡു എന്ന പേരിൽ റീമേക്ക് ചെയ്തിരുന്നു. സോഷ്യൽമീഡിയയിൽ സജീവമാണ് കരിഷ്മ കപൂർ. സീറോയാണ് അവസാനം റിലീസ് ചെയ്ത കരിഷ്മയുടെ സിനിമ.