ആദ്യ ബന്ധം വേർപ്പെടുത്തി 6 മാസത്തിനുള്ളിൽ രണ്ടാം വിവാഹം; നടൻ ആര്യൻ്റെയും സൗമ്യയുടെയും വിവാഹക്കഥ വൈറലാവുന്നു

'വിവാഹ ബന്ധം വേര്‍പ്പെടുത്തി അധികം താമസിക്കാതെ തന്നെ ആര്യനെ വിവാഹം കഴിച്ചു. വിവാഹമോചനത്തിന് പിന്നാലെ ആര്യനെ കുറിച്ച് വീട്ടില്‍ പറഞ്ഞപ്പോള്‍ അവര്‍ക്കൊരു ഞെട്ടലായിരുന്നെന്ന് സൗമ്യ പറയുന്നു. രണ്ടാം വിവാഹത്തിന് തയ്യാറെടുക്കുന്ന ഞാന്‍ എന്നേക്കാള്‍ പ്രായവും വേറെ കുട്ടികളുമുള്ള ഒരു പെരുത്ത മനുഷ്യനെ ആയിരിക്കും പരിചയപ്പെടുത്തുന്നത് എന്ന് പ്രതീക്ഷിച്ച അച്ഛനും അമ്മയ്ക്കും വീണ്ടും തെറ്റി. സാധു മുഖമുള്ള ഇരുപതുകളില്‍ നില്‍ക്കുന്ന കൊച്ചു പയ്യനെയാണ് ഒരു കുട്ടിയുള്ള താന്‍ ജീവിത പങ്കാളിയാക്കുന്നതെന്ന് അവര്‍ അറിഞ്ഞു.

അഞ്ചു വയസ്സുള്ള ഒരു മകളുള്ള സ്വന്തം ഇഷ്ടത്തിന് ഡിവോഴ്‌സ് വാങ്ങി ആറ് മാസം തികയും മുന്‍പ് മറ്റൊരു വിവാഹം കഴിച്ചു. അതും തന്നേക്കാള്‍ അഞ്ച് വയസ്സിന് ഇളയ പുരുഷനെ. അങ്ങനെ ബന്ധുക്കള്‍ക്കും നാട്ടുകാര്‍ക്കും പൊതുസമൂഹത്തിനും തന്നെ തേജോവധം ചെയ്യാന്‍ കാരണങ്ങള്‍ ഏറെ ആയിരുന്നു. അവിടെയും അച്ഛനും അമ്മയും എനിക്കൊപ്പം തന്നെ നിന്നു. എന്നെ വിവാഹം കഴിക്കാനെടുത്ത തീരുമാനത്തില്‍ ആര്യനും ഏറെ പഴി കേള്‍ക്കേണ്ടി വന്നു. വിവാഹം കഴിഞ്ഞ് ആദ്യ നാളുകളില്‍ മോളെ ഒപ്പം കൂട്ടിയിരുന്നില്ല. ഇതോടെ ക്രൂരയായ ഒരമ്മയുടെ ചിത്രം എനിക്ക് നല്‍കാന്‍ പലര്‍ക്കും കാരണമായി.

അച്ഛനും അമ്മയും പറഞ്ഞത് കേള്‍ക്കാതെ പ്രണയവിവാഹം ചെയ്തിട്ട് ഇപ്പോള്‍ ബന്ധം വേര്‍പ്പെടുത്തുന്നു. ദാമ്പത്യം വെറും കുട്ടിക്കളിയാണോ എന്ന് ചോദിച്ചവരുണ്ട്. ഒത്തുപോവാന്‍ ഒരിക്കലും സാധിക്കില്ലെന്ന് തോന്നിയ ഘട്ടത്തിലാണ് താന്‍ ആദ്യ വിവാഹബന്ധത്തില്‍ നിന്ന് പുറത്തു കടക്കുന്നതെന്ന് സൗമ്യ പറയുന്നു. ഒരു സ്ത്രീ ഒരു ബന്ധത്തില്‍ നിന്ന് പുറത്തുകടക്കുമ്പോള്‍ ഉണ്ടാകുവാന്‍ സാധ്യതയുള്ള എല്ലാത്തരത്തിലുള്ള വ്യക്തിഹത്യകളും അന്ന് നടന്നിരുന്നു. ചെറുപ്പക്കാരനായ ഒരാളെ വിവാഹം കഴിക്കുന്നത് മകളുടെ സുരക്ഷയ്ക്ക് ഭീഷണിയാവും എന്ന തരത്തിലുള്ള ഭീഷണികളും മുന്നറിയിപ്പുകളും പലരില്‍ നിന്നും ഉണ്ടായിരുന്നു. അവര്‍ അറിയുന്നുണ്ടോ, ഇന്ന് 14 വയസ്സുള്ള തന്റെ മകളുടെ ഏറ്റവും നല്ല സുഹൃത്ത് ആര്യനാണ്. ഞങ്ങളുടെ കുടുംബത്തിലിന്ന് അഞ്ച് പേരുണ്ട്. മകള്‍ക്ക് രണ്ട് കുഞ്ഞനുജത്തിമാര്‍ പിറന്നു. സകലമാന ഭ്രഷ്ടുകളെയും തകര്‍ത്തെറിഞ്ഞു കൊണ്ടുള്ള ഞങ്ങളുടെ ദാമ്പത്യം ഏഴ് വര്‍ഷങ്ങളായെന്നും സൗമ്യ വ്യക്തമാക്കുന്നു.

അതേ സമയം സൗമ്യയുടെ വാര്‍ത്ത ഷെയര്‍ ചെയ്ത് കൊണ്ട് ആര്യനും രംഗത്ത് എത്തി. ഫേസ്ബുക്കിലൂടെ പങ്കുവെച്ച കുറിപ്പിലൂടെ ഇതേ കുറിച്ച് താരവും തുറന്ന് സംസാരിക്കുകയാണ്. ''ആദ്യം ഞാന്‍ ഈ ന്യൂസ് ഷെയര്‍ ചെയ്യണ്ട എന്ന് കരുതിയതാണ്. ഞാന്‍ ഈ ന്യൂസ് ഷെയര്‍ ചെയ്യുമ്പോള്‍ എന്തോ ഒരു വലിയ കാര്യം ചെയ്തൂ ഞാന്‍ എന്ന തോന്നല്‍ മറ്റുള്ളവരിലേക്ക് വരുമോ എന്ന് തോന്നി. (അങ്ങനെ ഒരു തോന്നല്‍ എന്റേയോ സൗ ടെയോ മനസ്സില്‍ അന്നും ഇല്ല ഇന്നും ഇല്ല). എന്നാല്‍ മാതൃഭൂമിയുടെ ഫേസ്ബുക്ക് പേജില്‍ സൗമ്യക്ക് നേരെ വന്ന ടീസ്/അബ്യൂസീവ്/ഫ്രസ്‌ട്രേറ്റഡ് കമന്റുകള്‍ കണ്ടപ്പോള്‍, പിന്നെ ചില മനുഷ്യത്വം തൊട്ട് തീണ്ടിയിട്ടില്ലാത്ത pseudo ലെഫ്റ്റ് ലിബറല്‍ ചാപ്പയടി തൊഴിലാളിയുടെ ആവേശവും കണ്ടപ്പോള്‍ തോന്നി, ഇത് ഷെയര്‍ ചെയ്ത് കൊണ്ട് പറയണം എന്ന്.

എന്റെ ജീവിതത്തില്‍ ഞാന്‍ എടുത്ത ഏറ്റവും നല്ല തീരുമാനം സൗമ്യ എന്നതാണെന്ന്. ഇങ്ങനെ ഒരാള്‍ എന്റെ ജീവിത്തില്‍ വന്നത് എന്റെ ഭാഗ്യം ആണെന്ന്. ജീവിത മൂല്യങ്ങള്‍ പലതും ഞാന്‍ പഠിച്ചത് സൗമ്യയില്‍ നിന്നാണെന്ന്. നിങ്ങളുടെ ജീവിതത്തില്‍ ഒരു ഡിവോഴ്‌സ് കഴിഞ്ഞാല്‍ ജീവിതത്തിന് ഇനി നിറം പകരാന്‍ ഇനി ഒരു കൂട്ട് - പാര്‍ട്ട്ണര്‍ തന്നെ വേണം എന്നില്ലെന്ന് (if that's your decision). ഇനി അങ്ങനെ പാര്‍ട്ട്ണറേ കിട്ടിയാല്‍ തന്നെ - മാനസിക ഐക്യം, പരസ്പര ധാരണ, സ്‌നേഹം എന്നതിന് മാത്രമാണ് ആ ഒരു പാര്‍ട്ട്ണറില്‍ നോക്കേണ്ടതുള്ളൂ എന്ന്. ഒപ്പം ജീവിക്കാന്‍ - ജീവിതം പങ്കിടാന്‍ അവന്റെ / അവളുടെ - ലിംഗം, സെക്ഷ്വാലിറ്റി, നിറം, കുലം, ജാതി, മതം, വയസ്സ്, ഫിസിക്കാലിറ്റി ഒന്നിനും ഒരു പ്രസക്തിയും ഇല്ലെന്ന്.

Recommended Video

ഡയമണ്ടെന്ന് പറഞ്ഞ് കല്ലുകൊടുത്ത് എംജി ശ്രീകുമാറിനെയും പറ്റിച്ചു | FilmiBeat Malayalam

പ്രിയപ്പെട്ടവരെ, ഡിവോഴ്‌സ് ഒന്നിന്റേയും ഒരു അവസാനമല്ല. ഒരു പക്ഷേ മനോഹരായ - ഒരുപാട് നിറങ്ങള്‍ ഉള്ള പുതിയ ജീവിതത്തിന്റെ ഒരു തുടക്കം മാത്രം ആണ്. ബോള്‍ഡ് ആയ തീരുമാനം എടുത്ത നിങ്ങളെ നോക്കി ആ കുരക്കുന്നവര്‍ കുരക്കട്ടെ അവര്‍ക്ക് ഇഷ്ടം ആത്മഹത്യകള്‍ ആണ് ജീവതങ്ങള്‍ ആല്ല, നിങ്ങള്‍ സധൈര്യം മുന്നോട്ട് പോകൂ.. സസ്‌നേഹം' എന്നും ആര്യനും പറയുന്നു.