വളരെ മോശം അവസ്ഥയിലൂടെയാണ് കടന്നുപോവുന്നത്! നിങ്ങളുടെ സപ്പോര്‍ട്ട് കൂടിയേ തീരൂ: അഭിരാമി

സോഷ്യല്‍മീഡിയയിലൂടെയായി ജീവിത വിശേഷങ്ങളെല്ലാം പങ്കുവെക്കാറുണ്ട് അഭിരാമി സുരേഷ്. വിമര്‍ശനങ്ങള്‍ക്കിടയിലും, തന്നെ പിന്തുണയ്ക്കുന്നവര്‍ക്ക് നന്ദി പറഞ്ഞെത്തിയിരിക്കുകയാണ് അഭിരാമി. മാൽദീവ്സ് യാത്രയുടെ ചിത്രങ്ങൾ ഓരോന്നായി ഫോണിൽ എടുത്തു നോക്കുകയായിരുന്നു. വ്ലോഗുകളോ വീഡിയോകളോ ചെയ്യണമെന്നതിനേക്കാൾ, ആ നിമിഷങ്ങളെ ചിത്രങ്ങളാക്കി മാറ്റാനായിരുന്നു എനിക്കിഷ്ടം. ആ ഫോട്ടോകൾ സോഷ്യൽ മീഡിയയിൽ പങ്കുവെക്കാൻ ഒരുങ്ങിയപ്പോഴാണ് പെട്ടെന്ന് ഞാനൊന്ന് തങ്ങിനിന്നത്. മനസ്സ് എങ്ങോട്ടൊക്കെയോ സഞ്ചരിക്കാൻ തുടങ്ങി. ശരിക്കും, നമ്മുടെ ജീവിതം എന്ന യാത്ര എത്ര വിചിത്രമാണ്, അല്ലേ? ചിലപ്പോൾ വളരെ വലുതെന്നും, മറ്റു ചിലപ്പോൾ എത്രയോ ചെറുതെന്നും തോന്നിക്കുന്ന ഒന്നല്ലേ ഇത്? എത്രയോ നേട്ടങ്ങളും, അതിലേറെ നഷ്ടങ്ങളും നിറഞ്ഞ ഒരു വലിയ പ്രയാണം.

ആ ഫോട്ടോകൾ പോസ്റ്റ് ചെയ്യുന്നതിന് തൊട്ടുമുമ്പ് ഞാൻ എന്റെ പ്രൊഫൈലിലേക്ക് ചുമ്മാതൊന്ന് നോക്കി. 1.1 മില്യൺ (11 ലക്ഷം) ആളുകൾ. എനിക്ക് വിശ്വസിക്കാൻ പോലും ആകുന്നില്ല. ഇതിൽ എന്നെ ഇഷ്ടപ്പെടാത്തതുകൊണ്ടും, ശകാരിക്കാനും തരംതാഴ്ത്താനും വേണ്ടി മാത്രം ഫോളോ ചെയ്യുന്നവർ കുറച്ചുണ്ടെന്നത് ഒരു യാഥാർത്ഥ്യമാണ്. പക്ഷേ, ബാക്കി വരുന്ന ആ വലിയൊരു ശതമാനം മനുഷ്യരില്ലേ. അവരുടെ സ്നേഹമാണ് എന്നെ ഇവിടെവരെ എത്തിച്ചത്.

Photo Credit: Abhirami Suresh / Facebook

ഓർത്തുപോവുകയാണ്, വർഷങ്ങൾക്ക് മുൻപ് വെറുമൊരു സാധാരണ ഫേസ്ബുക്ക് അക്കൗണ്ടുമായി തുടങ്ങിയതാണ് ഞാൻ. അന്ന് ഇന്നത്തെപ്പോലെ ഇത്രയും തിരക്കോ ആളുകളോ ഒന്നും ഇവിടെ ഇല്ലായിരുന്നു. ആ തുടക്കകാലം മുതൽ ഇന്നുവരെ, എല്ലാ തിരക്കുകൾക്കിടയിലും എന്നെ പിന്തുടരുന്ന ചില പേരുകൾ ഞാൻ ഇപ്പോഴും ശ്രദ്ധിക്കാറുണ്ട്. ഇടയ്ക്കൊക്കെ ഞാൻ സോഷ്യൽ മീഡിയയിൽ നിന്നും ജീവിതത്തിൽ നിന്നും ഒരു വലിയ ബ്രേക്ക് എടുക്കാറുള്ള ഒരാളാണ്. അങ്ങനെയുള്ള ഇടവേളകൾ കഴിഞ്ഞ് ഞാൻ തിരികെ വരുമ്പോഴേക്കും ഇൻബോക്സിലും കമന്റുകളിലും നിറയുന്ന ചില ചോദ്യങ്ങളുണ്ട്: "മോളേ എവിടെയായിരുന്നു?", "അയ്യോ, എന്റെ ആമിക്കുട്ടി എവിടെപ്പോയി?"

സ്വന്തം കുടുംബത്തിലുള്ളവർ ചോദിക്കുന്നതിനേക്കാൾ വലിയ കരുതലും സ്നേഹവും തന്ന്, നമ്മളിലേക്ക് അടുക്കാൻ ആഗ്രഹിക്കുന്ന എത്രയോ നല്ല മനുഷ്യർ ഈ ലോകത്തുണ്ടെന്ന വലിയ തിരിച്ചറിവാണ് ആ വാക്കുകൾ എനിക്ക് തരുന്നത്. ജീവിതത്തിൽ എന്തെങ്കിലും ദുരനുഭവങ്ങൾ ഉണ്ടാകുമ്പോൾ, അതൊരു ആശ്വാസത്തിന് വേണ്ടി ഞാൻ ഇവിടെ പങ്കുവെക്കാറുണ്ട്. അപ്പോഴൊക്കെ, "നീ എന്തിനാ ഇതൊക്കെ ഞങ്ങളോട് വന്നു പറയുന്നത്?" എന്ന് ചോദിച്ച് അധിക്ഷേപിക്കുന്നവരും മോശം വാക്കുകൾ പറയുന്നവരും ഉണ്ട്. എന്നാൽ, അതിനെയെല്ലാം മായ്ച്ചുകളയുന്നത് മറ്റു ചിലരുടെ സ്നേഹമാണ്. "മോള് ഓക്കെ അല്ലേ?", "അമ്മയൊക്കെ സുഖമായിരിക്കുന്നോ?" എന്ന് ചോദിക്കുന്ന നിങ്ങളുടെ ആ സ്നേഹത്തിനു മുന്നിൽ മറ്റെല്ലാം ചെറുതായിപ്പോകും.

മാൽദീവ്സ് യാത്രയുടെ ഒരുപാട് ഓർമ്മകൾ ഒരു വലിയ ഫോട്ടോ ആൽബം പോലെ എന്റെ കൈയിലുണ്ട്, അവയെല്ലാം എനിക്ക് നിങ്ങളുമായി പങ്കുവെക്കണം. പക്ഷേ, അതിനേക്കാളൊക്കെ ഉപരി, എന്നെ വെറുക്കുന്നവരാണെങ്കിലും സ്നേഹിക്കുന്നവരാണെങ്കിലും, ഈ 1.1 മില്യൺ ആളുകളോടും ഒരു നിമിഷം മനസ്സ് തുറന്ന് നന്ദി പറയാൻ ഞാൻ ആഗ്രഹിക്കുന്നു.

സത്യം പറഞ്ഞാൽ, ഞാൻ ഇപ്പോൾ ജീവിതത്തിലെ വളരെ മോശമായൊരു സാഹചര്യത്തിലൂടെയാണ് കടന്നുപോകുന്നത്. അറിഞ്ഞോ അറിയാതെയോ ചില പ്രതിസന്ധികളിൽ ഞാൻ പെട്ടുപോയിട്ടുണ്ട്. ഈ ഇരുണ്ട കാലത്തെ എനിക്ക് മറികടക്കാൻ (തരണം ചെയ്യാൻ) കഴിയുമോ, അതിനുള്ള ശക്തി എനിക്കുണ്ടോ എന്ന് പോലും എനിക്കറിയില്ല. അതുകൊണ്ടുതന്നെ, നിങ്ങളുടെ ഓരോരുത്തരുടെയും പ്രാർത്ഥനകളും പിന്തുണയും എനിക്കിപ്പോൾ അത്രമേൽ ആവശ്യമാണ്.

എന്റെ കൂടെയുണ്ടാകണം കേട്ടോ, കാരണം, എന്നെ സ്നേഹിക്കുന്ന നിങ്ങൾ ഓരോരുത്തരും എന്റെ ജീവിതത്തിന്റെ ഏറ്റവും വലിയ ഭാഗങ്ങളാണ്. എന്റെ ജീവിതത്തിന്റെ പകുതിയിലധികവും നിങ്ങളുടെ മുന്നിൽ തുറന്നു കാണിച്ച ഒരാളാണ് ഞാൻ. ചിലപ്പോഴൊക്കെ, ഒട്ടും ഫേക്ക് ആകാതെ ഉള്ളിലുള്ളത് അതേപടി തുറന്നു പറയുന്ന സത്യസന്ധത പലർക്കും ഇഷ്ടപ്പെടാറില്ലായിരിക്കാം, എങ്കിലും ഞാൻ അങ്ങനെയാണ്.

ആ ഫോട്ടോകൾ പോസ്റ്റ് ചെയ്യാൻ തുടങ്ങിയ ഞാൻ എവിടെയോ വെച്ച് പെട്ടെന്ന് സ്റ്റക്കായിപ്പോയതാണ്. കാരണം, നിങ്ങളോടുള്ള നന്ദിയും സ്നേഹവും വാക്കുകളിലൂടെ ആദ്യം എഴുതി അറിയിക്കണമെന്ന് എന്റെ മനസ്സ് എന്നോട് പറഞ്ഞു. വിശേഷങ്ങൾ ഇനിയും വരുന്നുണ്ട്. തൽക്കാലം ഇവിടെ നിർത്തുന്നു എന്നുമായിരുന്നു അഭിരാമിയുടെ കുറിപ്പ്.