'ഞാൻ തനിച്ചല്ലെന്നും ബലഹീനയല്ലെന്നും ഇതെന്നെ ഓർമിപ്പിക്കുന്നു'; വീഡിയോയുമായി അമൃത സുരേഷ്!

നേരത്തെ ചില ചിത്രങ്ങളിൽ ഗാനാലാപനം നടത്തിയെങ്കിലും വിവാഹ മോചനത്തിന് ശേഷമാണ് അമൃത പിന്നണി ഗാന രംഗത്ത് സജീവമായത്. കരിയർ കെട്ടിപ്പടുത്ത് തുടങ്ങിയ അമൃത നിരവധി ആൽബങ്ങളിലൂടെയും ശ്രദ്ധനേടി. വിവാഹ മോചനത്തിന് ശേഷമുള്ള തൻറെ കാൽവെയ്പ്പുകളെ കുറിച്ച് ഒരു യൂട്യൂബ് ചാനൽ പ്രോഗ്രാമിൽ അമൃത നടത്തിയ തുറന്നുപറച്ചിൽ ചലച്ചിത്ര മേഖലയിൽ വലിയ ചലനങ്ങൾ സൃഷ്ടിച്ചിരുന്നു. കരുത്തുറ്റ തൻറെ പോരാട്ടത്തിൽ കൂടെ നിന്നവർ എന്ന് പരിചയപ്പെടുത്തി,അമൃത തന്നെയാണ് സഹോദരി അഭിരാമി സുരേഷിനെയും മുഖ്യധാരയിലേക്ക് കൈപിടിച്ച് കയറ്റിയത്. ഇതിൻറെ തുടർച്ചയായിരുന്നു അമൃതംഗമയ എന്ന മ്യൂസിക്കൽ ബാൻഡ്. സംഗീത രംഗത്തെ മാറ്റങ്ങളറിഞ്ഞുള്ള അവതരണം കൊണ്ട് പ്രേക്ഷകർക്കിടയിൽ പെട്ടെന്ന് സ്ഥാനം പിടിക്കാൻ അമൃതംഗമയയ്ക്ക് കഴിഞ്ഞു.

സോഷ്യൽ മീഡിയയിലും സജീവമായ അമൃത ഇപ്പോൾ ജീവിക്കുന്നത് മകളുടെ സന്തോഷത്തിന് വേണ്ടിയാണ്. മകൾക്ക് ചുറ്റുമാണ് അമൃതയുടെ ലോകവും. പാപ്പുവെന്നാണ് മകളെ അമൃതയും വീട്ടുകാരും ഓമനിച്ച് വിളിക്കുന്നത്. ലൈഫ് എന്ന് പറയുന്നത് വലിയ അവസരമാണെന്നും ശരിയായ രീതിയിൽ ഉപയോഗിക്കുക എന്നും പലപ്പോഴും അമൃത സോഷ്യൽമീഡിയ വഴി തന്റെ ആരാധകരോട് പറയാറുണ്ട്. അടുത്തിടെയാണ് അമൃത സ്വന്തമായി ഒരു വീട് വാങ്ങിയത്. വീട് വാങ്ങിയതിന്റെ വിശേഷങ്ങൾ സോഷ്യൽമീഡിയ വഴി അമ‍ൃത പങ്കുവെച്ചിരുന്നു. ഇപ്പോൾ അമൃത സോഷ്യൽമീഡിയയിൽ പങ്കുവെച്ച വീഡിയോയാണ് വൈറലാകുന്നത്. കാലിൽ ടാറ്റൂ ചെയ്യുന്നതിന്റെ വീഡിയോ പങ്കിട്ട് അമൃത സുരേഷ് കുറിച്ച വാക്കുകളും വൈറലായി.

Recommended Video

കുറ്റം പറയുന്നവര്‍ക്ക് സന്തോഷമായാല്‍ അവര്‍ പറഞ്ഞോട്ടെ, അമൃത സുരേഷ് പറയുന്നു

വലതുകാലിലാണ് അമൃതയുടെ പുതിയ ടാറ്റൂ. ഫീനിക്സ് പക്ഷിയെ ഓർമിപ്പിക്കും വിധത്തിലുള്ള ഡിസൈനാണ് അമൃത പച്ചകുത്തിയത്. ടാറ്റൂ സ്റ്റുഡിയോയിൽ നിന്നുള്ള വീഡിയോ പങ്കിട്ട് ഗായിക കുറിച്ച വാക്കുകൾ ഇങ്ങനെയാണ്. 'ഒരു ഫീനിക്സ് പക്ഷിയെപ്പോലെ ചാരത്തിൽ നിന്നും ഉയർത്തെഴുന്നേൽക്കുക. ഞാൻ തനിച്ചല്ലെന്നും ബലഹീനയല്ലെന്നും ഈ ടാറ്റൂ എന്നെ ഓർമിപ്പിക്കുന്നു. എപ്പോഴും എന്റെ ജീവിത യാത്രയിൽ ഫീനിക്സ് എന്നെ പിന്തുടരുകയാണ്. അന്ധകാരത്തിൽ നിന്നും സകല തിന്മകളിൽ നിന്നും അതെന്നെ സംരക്ഷിക്കുന്നു' എന്നാണ് അമൃത സുരേഷ് കുറിച്ചത്. അമൃത സുരേഷിന്റെ ടാറ്റൂ സ്പെഷൽ വീഡിയോ ചുരുങ്ങിയ സമയത്തിനകം വൈറലായി. സുഹൃത്തുക്കളും സഹപ്രവർത്തകരുമുൾപ്പെടെ നിരവധി പേരാണ് താരത്തിന്റെ വീഡിയോയ്ക്ക് പ്രതികരണങ്ങളുമായി എത്തിയത്. അമൃതയെ പുതിയ രീതിയിൽ രൂപാന്തരപ്പെടുത്തിയതിൽ വലിയൊരു പങ്ക് സോഷ്യൽ മീഡിയയ്ക്കും ഉണ്ടെന്ന് പലപ്പോഴും അമൃത പറഞ്ഞിട്ടുണ്ട്.