'ആരും പാൻ-അമേരിക്ക എന്ന് പറയുന്നില്ല, പിന്നെ എന്തിനാണ് പാൻ ഇന്ത്യ എന്ന് പറയുന്നത്, എനിക്കത് ഇഷ്ടമല്ല'; ദുൽഖർ

വരനെ ആവശ്യമുണ്ട് എന്ന സിനിമയിലൂടെ നിർമ്മാണ മേഖലയിലും ദുൽഖർ ചുവടുവെച്ചു. വേഫറർ ഫിലിംസ് എന്ന പേരിലാണ് ദുൽഖർ നിർമാണ കമ്പനി ആരംഭിച്ചത്. ഓരോ ദിവസവും ഉയർച്ചയിലേക്ക് കുതിക്കുന്ന ദുൽഖർ ഇന്ന് മലയാളത്തിൽ മാത്രമല്ല തമിഴിലും തെലുങ്കിലും ബോളിവുഡിലും വരെ തിരക്കുള്ള താരമാണ്. ദുൽഖർ ഇപ്പോൾ പാൻ-ഇന്ത്യൻ എന്ന പ്രയോ​ഗത്തെ കുറിച്ച് പറഞ്ഞ വാക്കുകളാണ് വൈറലാകുന്നത്. സൗത്ത് ഇന്ത്യയിൽ പാൻ-ഇന്ത്യൻ എന്ന വാക്കിന് ഏറ്റവും കൂടുതൽ പ്രചാരം ലഭിച്ചത് രാജമൗലി ചിത്രം ബാഹുബലി സീരിസിന്റെ ആദ്യ ഭാ​ഗം റിലീസിനെത്തിയ സമയത്താണ്. വിവിധ ഭാഷകളിൽ തിയേറ്ററുകളിൽ പ്രദർശനത്തിന് എത്തിയ ശേഷം ബാഹുബലി സീരിസിലെ ചിത്രങ്ങൾ പാൻ-ഇന്ത്യൻ ​ഗണത്തിൽപ്പെടുത്തി. സിനിമകൾ മാത്രമല്ല വിവിധ ഭാഷകളിൽ അഭിനയിക്കുന്ന നടന്മാരും നടിമാരുമെല്ലാം ഇന്ന് പാൻ ഇന്ത്യൻ താരം എന്നാണ് വിശേഷിപ്പിക്കപ്പെടുന്നത്.

എന്നാൽ പാൻ-ഇന്ത്യൻ എന്ന പ്രയോ​ഗത്തോട് തനിക്ക് യോജിപ്പില്ലെന്നാണ് ദുൽഖർ സൽമാൻ പറയുന്നത്. 'പാൻ-ഇന്ത്യ എന്ന വാക്ക് എന്നെ ശരിക്കും അലോസരപ്പെടുത്തുന്നു. അത് കേൾക്കുന്നത് എനിക്ക് ഇഷ്ടമല്ല. സിനിമയിൽ പ്രതിഭകളുടെ കൈമാറ്റം നടക്കുന്നത് എനിക്ക് ഇഷ്ടമാണ്. അത് മഹത്തരമാണ്. പക്ഷേ നമ്മൾ ഒരു രാജ്യമാണ്. പാൻ-അമേരിക്ക എന്ന് ആരും പറയുമെന്ന് ഞാൻ കരുതുന്നില്ല. എത്ര മധുരമായി പറഞ്ഞാലും പാൻ-ഇന്ത്യ എന്ന വാക്ക് ഉൾക്കൊള്ളാൻ എനിക്ക് ബുദ്ധിമുട്ടാണ്' ദുൽഖർ സൽമാൻ പിടിഐക്ക് നൽകിയ അഭിമുഖത്തിൽ പറയുന്നു. ദുൽഖറിനേയും ഇപ്പോൾ ആളുകൾ പറയുന്നത് പാൻ-ഇന്ത്യൻ താരം എന്ന പേരിലാണ്. ബാഹുബലിക്ക് ശേഷം പുഷ്പ, മാസ്റ്റർ‍‍, കെജിഎഫ് തുടങ്ങി നിരവധി സിനിമകൾ പാൻ-ഇന്ത്യൻ വിഭാ​ഗത്തിൽ ഉൾപ്പെടുത്തി തിയേറ്ററിൽ പ്രദർശിപ്പിച്ചിരുന്നു.

ദുൽഖറിന്റെ ഏറ്റവും പുതിയ റിലീസ് സല്യൂട്ട് എന്ന സിനിമയാണ്. റോഷൻ ആൻഡ്രൂസ് സംവിധാനം ചെയ്‍ത സിനിമയാണ് സല്യൂട്ട്. പ്രമുഖ പ്ലാറ്റ്ഫോം ആയ സോണി ലിവിലൂടെ നാല് ഭാഷകളിലാണ് ചിത്രം എത്തിയിരിക്കുന്നത്. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം കാണാനാവും. ഡയറക്ട് ഒടിടി റിലീസുകളിൽ സാധാരണയായി പ്രഖ്യാപിച്ച റിലീസ് തീയതിയുടെ തലേന്ന് രാത്രിയാണ് ചിത്രങ്ങൾ എത്താറ്. എന്നാൽ സല്യൂട്ടിൻറെ കാര്യത്തിൽ പതിവിലും നേരത്തെയാണ് സോണി ലിവ് റിലീസ് നടത്തിയത്. ഒരു റോഷൻ ആൻഡ്രൂസ് ചിത്രത്തിൽ ദുൽഖർ ആദ്യമായാണ് നായകനാവുന്നത്. ഇൻവെസ്റ്റിഗേറ്റീവ് ത്രില്ലർ വിഭാഗത്തിൽ പെടുന്ന സിനിമയാണിത്. അരവിന്ദ് കരുണാകരൻ ഐപിഎസ് എന്ന പൊലീസ് ഓഫീസറായാണ് ദുൽഖർ സ്ക്രീനിലെത്തിയത്.