മമ്മൂട്ടി പെട്ടെന്ന് ദേഷ്യപ്പെടും; സോറി പറയില്ല, പക്ഷെ പ്രകടിപ്പിക്കും; നടനെക്കുറിച്ച് സംവിധായകൻ

'വീട്ടിൽ ചെന്നപ്പോഴെല്ലാം നല്ല രീതിയിലാണ് പെരുമാറിയത്. മ​ദ്രാസിൽ അന്ന് സുൽത്താൻ എന്നായിരുന്നു മമ്മൂക്കയുടെ പേര്. സുൽത്താൻ വരുന്നു എന്നായിരുന്നു പറയാറ്. സെറ്റിൽ ജോയിൻ ചെയ്താൽ നമ്മളുടെ ഒരു ഭാ​ഗമാവും. പിന്നെ ഒരു കാരണവരെ പോലെ ജേഷ്ഠനെ പോലെ പെരുമാറും. സെറ്റിൽ ഇടയ്ക്ക് അദ്ദേഹത്തിന് ദേഷ്യം വരാറുണ്ട്. ദേഷ്യം വന്നാൽ ചിന്തിക്കാതെ ആയിരിക്കും പറയുന്നത്'

'പക്ഷെ അടുത്ത നിമിഷം തന്നെ മാറും. ഒരാളോട് ദേഷ്യപ്പെട്ടാൽ പോലും അയാളോട് സോറി പറയാതെ സോറി പ്രകടിപ്പിച്ച് സമാധാനപ്പെടുത്തിയേ സെറ്റിൽ നിന്ന് പോവാറുള്ളൂ. പിന്നെ മനുഷ്യനല്ലേ, ഒരിക്കൽ സെറ്റിൽ ഒരാൾ പുള്ളിയെ അനാവശ്യം പറഞ്ഞപ്പോൾ തിരിച്ച് അതുപോലെ പറഞ്ഞു. ​ എത്ര കോട്ടിട്ടാലും ആ പഴയ ​ഗ്രാമീണന്റെ മനസ്സാണ് മമ്മൂക്കയ്ക്ക് ഇപ്പോഴും. അത് നേരിട്ടറിഞ്ഞാലേ അറിയത്തുള്ളൂ'

'മമ്മൂക്കയും ലാലേട്ടനും തമ്മിൽ ആനയും ആടും പോലെ വ്യത്യാസമുണ്ട്. ലാലേട്ടൻ എപ്പോഴും സൗഹൃദത്തോടെ നമ്മളുടെ കൂടെ നിൽക്കും. മമ്മൂക്കയും കൂടെ നിൽക്കും. പക്ഷെ നമുക്ക് തിരിച്ചറിയാൻ ബുദ്ധിമുട്ടാണ്. കൂടെ നിൽക്കുകയാണെന്ന്'

'കാരണം അച്ഛന്റെയും മൂത്ത ജേഷ്ഠന്റെയും അടുത്ത് ചെല്ലുമ്പോഴുള്ള പേടി മമ്മൂക്കയോട് ഉണ്ടാവും. പക്ഷെ അവർ ഏറ്റവും പാവങ്ങളായിരിക്കും. ആ ഒരു പേടി മമ്മൂക്കയോട് ഉണ്ടാവും. ലാലേട്ടൻ ഒരു പത്ത് മിനുട്ട് കിട്ടിയാൽ 11 കോമഡി പറഞ്ഞ് നമ്മളെ ഇഷ്ടപ്പെടുത്തും,' സംവിധായകൻ ഇബ്രാഹിം ഹസ്സൻ പറഞ്ഞു.

റോഷാക്കാണ് മമ്മൂട്ടിയുടെ ഏറ്റവും ഒടുവിൽ റിലീസ് ചെയ്ത സിനിമ. സൈക്കോ ത്രില്ലർ വിഭാ​ഗത്തിൽ പെടുന്ന സിനിമയ്ക്ക് മികച്ച പ്രതികരണം ആയിരുന്നു ലഭിച്ചത്. ​ഗ്രേസ് ആന്റണി, ബിന്ദു പണിക്കർ, ജ​ഗദീഷ്, ഷറഫുദ്ദീൻ തുടങ്ങി വൻതാരനിരയാണ് സിനിമയിൽ അണിനിരന്നത്. കാതൽ, ബി​ഗ് ബി 2, നൻപകൽ നേരത്ത് മയക്കം തുടങ്ങിയവ ആണ് ആരാധകർ കാത്തിരിക്കുന്ന മമ്മൂട്ടി ചിത്രങ്ങൾ.

പഴയ സൂപ്പർ സ്റ്റാർ ലേബലുള്ള സിനിമകളിൽ നിന്ന് മാറി പുതുമുഖ ഫിലിം മേക്കർസിന്റെ വ്യത്യസ്തമായ സിനിമകൾക്കാണ് മമ്മൂട്ടി ഇപ്പോൾ കൈ കൊടുക്കുന്നതെന്ന് ആരാധകർ പറയുന്നു. കരിയറിലെ സുവർണ കാലഘട്ടത്തിലൂടെ ആണ് 71ാം വയസ്സിൽ മമ്മൂട്ടി കടന്ന് പോവുന്നതെന്നും സിനിമാ ലോകം ചൂണ്ടിക്കാട്ടുന്നു.

റോഷാക്കിന് മുമ്പ് ഇറങ്ങിയ പുഴുവും ഏറെ ശ്രദ്ധ നേടിയിരുന്നു. സോണി ലിവിലൂടെയാണ് സിനിമ പുറത്തിറങ്ങിയത്. വരും സിനിമകളിൽ മമ്മൂട്ടിയുടെ പ്രകടനം കാണാൻ കാത്തിരിക്കുകയാണ് ആരാധകർ.