അസുഖം ഭേദമാക്കാന്‍ കഴിയില്ലെന്ന് ജഗദീഷ് പറയുമായിരുന്നു, ഡോ. രമയെ കുറിച്ച് മുകേഷ്

മുകേഷിന്റെ വാക്കുകള്‍ ഇങ്ങനെ...'ജഗദീഷിന്റെ ഭാര്യ ഡോക്ടര്‍ രമ വര്‍ഷങ്ങളായി സിനിമയിലുള്ള എല്ലാവര്‍ക്കും ചിരപരിചിതയായ പ്രഗത്ഭയായ ഡോക്ടര്‍ ആയിരുന്നു. പല സന്ദര്‍ഭങ്ങളിലും നേരിട്ട് കാണാതെ ഫോണിലൂടെ പോലും ഞാനുള്‍പ്പടെ സിനിമയിലുള്ള ഒരുപാടു പേര്‍ക്ക് ചികിത്സയും ഉപദേശങ്ങളും നല്‍കിയിട്ടുണ്ട്. ഡോക്ടര്‍ രമ രോഗബാധിതയായിരുന്നെങ്കിലും ഇത്രയും പെട്ടെന്ന് ഒരു വിയോഗം പ്രതീക്ഷിച്ചിരുന്നില്ല.

രോഗം ചികില്‍സിച്ചു ഭേദമാക്കാന്‍ കഴിയില്ല എന്നൊക്കെ ജഗദീഷ് പറയുമായിരുന്നു. എങ്കിലും കുറേക്കാലം കൂടി ജീവിക്കും എന്നൊരു പ്രതീക്ഷ ഉണ്ടായിരുന്നു. ജഗദീഷിന്റെ സുഹൃത്തുക്കള്‍ക്കെല്ലാം വളരെ സഹായവും ആശ്വാസവുമായി നിന്ന ഒരു ഡോക്ടര്‍ ആയിരുന്നു. വളരെയധികം സങ്കടമുണ്ട്. കുടുംബത്തിന് ഈ വേര്‍പാട് സഹിക്കാനുള്ള കഴിവുണ്ടാകട്ടെ.'മുകേഷ് പറഞ്ഞു.

നടി മേനക സുരേഷും രമയുമായിട്ടുള്ള അടുപ്പത്തെ കുറിച്ച് പറഞ്ഞിരുന്നു.'ഞങ്ങള്‍ താമസിക്കുന്ന ഫ്ലാറ്റില്‍ ജഗദീഷേട്ടനും ഒരു ഫ്ലാറ്റുണ്ട്. അവിടെ അദ്ദേഹത്തിന്റെ ഇളയ മകള്‍ താമസിക്കുകയാണ്. ജഗദീഷേട്ടനും ഡോക്ടര്‍ രമയും അവിടെ ഇടയ്ക്കിടെ വരുമ്പോള്‍ ഞങ്ങള്‍ കാണുകയും സംസാരിക്കുകയും ചെയ്യാറുണ്ടായിരുന്നു. സുഖമില്ലാതെ ആയതിനു ശേഷം ജഗദീഷേട്ടനും മക്കളും രമയെ താങ്ങിപ്പിടിച്ചു കൊണ്ടുവരുമായിരുന്നു. പൊന്നുപോലെയാണ് ജഗദീഷേട്ടനും മക്കളും രമയെ കൊണ്ടുനടന്നത്. അടുത്തിടെ വരുമ്പോള്‍ ഞാന്‍ അധികം സംസാരിക്കാന്‍ നില്‍ക്കാറില്ല കാരണം സുഖമില്ലാതെ ഇരിക്കുകയല്ലേ. ജഗദീഷേട്ടനാണെങ്കിലും പെട്ടന്നു വന്ന്, 'ഓക്കേ മേനക ശരി പോകട്ടെ' എന്നുപറഞ്ഞു പോകും.

Recommended Video

ബിഗ് ബോസിൽ വരുന്നതിനു മുൻപ് അഖിലിനോട് നോബി പറഞ്ഞത്

കഴിഞ്ഞ വര്‍ഷം വരെ രമ പതുക്കെ കുറച്ചു നടക്കുമായിരുന്നു. അതിനു ശേഷം അവസ്ഥ കുറച്ചു മോശമായി കിടപ്പായിപ്പോയിരുന്നു. എങ്കിലും ഇത്രപെട്ടെന്നൊരു വിയോഗം പ്രതീക്ഷിച്ചിരുന്നില്ല. പെട്ടന്നാണ് രമ കടന്നുപോകുന്നത്. അതില്‍ വലിയ ദുഃഖമുണ്ട്. ജഗദീഷേട്ടന്‍ വളരെ പ്രാക്ടിക്കലായ ഒരു മനുഷ്യനാണ്. ജഗദീഷേട്ടനും മക്കള്‍ സൗമ്യക്കും രമ്യക്കും ഈ വിയോഗം താങ്ങാനുള്ള ശക്തി ലഭിക്കട്ടെ' എന്നായിരുന്നു പറഞ്ഞത്.
ഇടവേള ബാബുവും ഡോ. രമയെ കുറിച്ചുളള ഓര്‍മ പങ്കുവെച്ച് എത്തിയിരുന്നു. ജഗദീഷും കുടുംബവുമായി അടുത്ത ബന്ധമുണ്ടെന്നും ചേച്ചിയെ പോലെയാണ രമയെന്നും നടന്‍ പറഞ്ഞിരുന്നു

പൊതുവേദിയില്‍ ജഗദീഷിനോടൊപ്പം എത്താറില്ലെങ്കിലും നടന്റെ കലാജീവിതത്തിന് മികച്ച പിന്തുണയായിരുന്നു രമ നല്‍കിയിരുന്നത്. സ്വകാര്യത ഇഷ്ടപ്പെടുന്ന ആളാണ് രമ എന്നും അതുകൊണ്ടാണ് മാധ്യമങ്ങള്‍ക്ക് മുന്നിലും പൊതുവേദികളിലും വരാത്തതെന്ന് ജഗദീഷ് ടെലിവിഷന്‍ ഷോയ്ക്കിടെ പറഞ്ഞിരുന്നു. ഭാര്യയെ കുറിച്ച് നടന്‍ പറഞ്ഞ വാക്കുകള്‍ വൈറല്‍ ആയിരുന്നു.