'ജ​ഗതി വന്നില്ല, മമ്മൂട്ടി പിണങ്ങി പോകുമെന്നായപ്പോൾ എന്നെ പിടിച്ച് മിന്നൽ പ്രതാപനാക്കി'; സുരേഷ് ​ഗോപി

ഷിബു ചക്രവർത്തി തിരക്കഥയെഴുതി 1988ൽ ഡെന്നീസ് ജോസഫിന്റെ സംവിധാനനത്തിൽ തിയേറ്ററുകളിലെത്തിയ സിനിമയായിരുന്നു മനു അങ്കിൾ. മമ്മൂട്ടി, എം.ജി സോമൻ, പ്രതാപ് ചന്ദ്രൻ, ലിസി തുടങ്ങിയവരാണ് ചിത്രത്തിൽ പ്രധാന വേഷങ്ങൾ ചെയ്തത്.

മോഹൻലാലും സിനിമയിൽ ഒരു ഘട്ടത്തിൽ ​ഗസ്റ്റ് റോളിൽ പ്രത്യക്ഷപ്പെടുന്നുണ്ട്. ഇപ്പോഴിത താൻ എങ്ങനെയാണ് മിന്നൽ പ്രതാപൻ എന്ന വേഷം ചെയ്യാൻ തെരഞ്ഞെടുക്കപ്പെട്ടതെന്ന് വ്യക്തമാക്കിയിരിക്കുകയാണ് സുരേഷ് ​ഗോപി. റിലീസിനൊരുങ്ങുന്ന തന്റെ ഏറ്റവും പുതിയ സിനിമ മേ ഹൂം മൂസയുടെ പ്രമോഷനെത്തിയപ്പോഴാണ് പിന്നാമ്പുറ കഥകൾ സുരേഷ് ​ഗോപി പറഞ്ഞത്.

'മനു അങ്കിൾ ഞാൻ ചെയ്യേണ്ട സിനിമയായിരുന്നില്ല. മിന്നൽ പ്രതാപൻ അമ്പിളി ചേട്ടന് വേണ്ടി വെച്ച കഥാപാത്രമായിരുന്നു. ഇവർ മൂന്ന്, നാല് ദിവസം അദ്ദേഹം വരാനായി കാത്തിരുന്നു. പക്ഷെ അദ്ദേഹം വന്നില്ല. അവസാനം മമ്മൂക്ക പിണങ്ങിപോകുമെന്ന സ്ഥിതിയായി.'

'ഞാൻ ഷൂട്ടിങ് കാണാൻ ചെന്നതായിരുന്നു. നീ ഈ വേഷം ചെയ്താ മതി. അവന്റെ പോലീസ് യൂണിഫോണിന്റെ അളവെടുക്കൂവെന്നൊക്കെ പറഞ്ഞ് പെട്ടന്ന് ചെയ്യാൻ തീരുമാനിച്ചതാണ്. ഞാൻ ചെയ്യില്ല... എനിക്ക് കോമഡി പറ്റില്ല എന്നൊക്കെ ഞാൻ പലവട്ടം പറഞ്ഞ് നോക്കി. അപ്പോൾ ജോഷിയേട്ടൻ‌ പറഞ്ഞു ധൈര്യമായി ചെയ്യാൻ.'

'ഇത് നിന്റെ തലയിൽ എഴുതിയിരിക്കുന്നതാണ്. അല്ലെങ്കിൽ നീ എന്തിനാ ഇപ്പോൾ ഇങ്ങോട്ട് വന്നത് ഇവരെയൊക്കെ വിളിച്ച് കൊണ്ടുപോയി ഊണ് കൊടുക്കാനല്ലേ?. നിന്റെ അച്ഛനല്ലേ നിന്നെ ഇങ്ങോട്ട് പറഞ്ഞുവിട്ടത്. എന്നൊക്കെ അവരെല്ലാം ചോദിച്ചപ്പോഴാണ് ഞാൻ ആ കഥപാത്രം ചെയ്തത്. എന്നിലെ സ്റ്റാർ പോസിബിലിറ്റിയെ അവിടെ വെച്ചാണ് കാണുന്നത്' സുരേഷ് ​ഗോപി പറഞ്ഞു.

സുരേഷ് ഗോപി നായകനാകുന്ന പുതിയ ചിത്രം മേ ഹൂം മൂസ ജിബു ജേക്കബാണ് സംവിധാനം ചെയ്തിരിക്കുന്നത്. മൂസ എന്ന വ്യക്തിയെ തേടി സുരേഷ് ഗോപിയുടെ മൂസ നടത്തുന്ന അന്വേഷണമാണ് സിനിമ.

സൈജു കുറുപ്പ്, സലിംകുമാര്‍, സുധീർ കരമന,ഹരീഷ് കണാരന്‍, മേജര്‍ രവി, മിഥുന്‍ രമേഷ്, വീണ നായർ, അശ്വനി, സാവിത്രി, ജിജിന, തുടങ്ങിയവരാണ് മറ്റ് പ്രമുഖ താരങ്ങള്‍.

കാര്‍ഗില്‍, വാഗാ ബോര്‍ഡര്‍, പുഞ്ച്, ഡല്‍ഹി, ജയ്പ്പൂര്‍, പൊന്നാനി, മലപ്പുറം എന്നീ പ്രദേശങ്ങളിലായാണ് സിനിമയുടെ ചിത്രീകരണം നടന്നത്. വലിയ ക്യാൻവാസിൽ ഒരുക്കിയിരിക്കുന്ന മേ ഹൂം മൂസ ഒരു പാന്‍ ഇന്ത്യന്‍ സിനിമയാണ്.