'ഒരു രാജ്യത്ത് നിന്ന് മറ്റൊരു രാജ്യത്തേക്ക് നടക്കുകയാണിപ്പോൾ, പ്രണവിന്റെ പേഴ്സണൽ പ്രൊഫൈലിൽ കാണാം'; വിനീത്!

അച്ഛന്റേതായുള്ള ആഢംബരങ്ങളൊന്നും ഉപയോ​ഗിക്കാതെ സാധാരണക്കാരിൽ സാധാരണക്കാരനായി ജീവിതം കൊണ്ടുപോകുന്ന താരം കൂടിയാണ് പ്രണവ് മോഹൻലാൽ‌. സിനിമയിൽ ചാർളിയായി വിലസി കൈയ്യടി നേടിയത് ദുൽഖറാണെങ്കിൽ യഥാർഥ ജീവിതത്തിൽ ചാർളിയായി ജീവിക്കുന്ന ഏക താരം പ്രണവ് മോഹൻലാൽ മാത്രമാണ്.

യാത്രകളോടാണ് പ്രണവിന് ഏറെയും കമ്പം. അതിന് ശേഷം മാത്രമാണ് സിനിമയ്ക്കും അഭിനയത്തിനും പ്രണവിന്റെ ജീവിതത്തിൽ സ്ഥാനം. മുപ്പത്തിരണ്ടുകാരനായ പ്രണവ് സിനിമയൽ സജീവമായി കാണാനാണ് ആരാധകർക്കും ആ​ഗ്രഹം.

പക്ഷെ സെലിബ്രിറ്റി സ്റ്റാറ്റസിനും അപ്പുറം ഒരു ലൈഫുള്ളത് താൻ ആ​ഗ്രഹിച്ചത് പോലും ജീവിക്കും എന്നുള്ളതാണ് പ്രണവിന്റെ നിലപാട്. വല്ലപ്പോഴും സിനിമാക്കാരുടെ ഫാമിലി ഫം​ഗ്ഷനുകളിൽ പ്രണവിനെ കാണാൻ സാധിക്കാറുണ്ട്. സോഷ്യൽമീഡിയയിൽ പേജുകളുണ്ടെങ്കിലും വല്ലപ്പോഴും മാത്രമാണ് പോസ്റ്റുകൾ താരം പങ്കുവെക്കാറുള്ളത്.

വിനീത് ശ്രീനിവാസൻ സിനിമ ഹൃദയത്തിലാണ് പ്രണവ് ഏറ്റവും അവസാനം അഭിനയിച്ചത്. ചിത്രത്തിന്റെ നിർമാതാവ് വിശാഖ് സുബ്രഹ്മണ്യത്തിന്റെ വിവാഹ നിശ്ചയത്തിൽ പങ്കെടുക്കാൻ പ്രണവ് എത്തിയിരുന്നു. എന്നാൽ വിവാഹത്തിന് വന്നിരുന്നില്ല.

ഇപ്പോഴിത പ്രണവുമായി അടുത്ത സൗഹൃദമുള്ള വിനീത് ശ്രീനിവാസൻ പ്രണവിനെ കുറിച്ച് പറഞ്ഞ കാര്യങ്ങളാണ് സോഷ്യൽമീഡിയയിൽ വൈറലാകുന്നത്. 'പ്രണവും ഞാനും ഇടയ്ക്ക് കാണാറുണ്ട്. ഇപ്പോൾ പ്രണവ് ഒരു തീർഥയാത്രയിലാണ്.'

'യൂറോപ്പിലാണുള്ളത്. 800 മൈൽ കാൽനടയായി യാത്ര ചെയ്യുകയാണ്. ഒരു രാജ്യത്ത് നിന്ന് മറ്റൊരു രാജ്യത്തേക്ക് നടന്നാണ് പ്രണവ് പോകുന്നത്. ഇപ്പോൾ ശരിക്കും എവിടെയാണെന്ന് അറിയില്ല.'

'നടക്കുകയാണെന്ന് മാത്രം അറിയാം. പ്രണവിനൊരു പേഴ്സൺ സോഷ്യൽമീഡിയ പ്രൊഫൈലുണ്ട്. അതിൽ അവന്റെ യാത്രയുടെ വിശേഷങ്ങളുടെ ചിത്രങ്ങൾ ഉണ്ടാകും. അതിലൂടെയാണ് അവന്റെ കാര്യങ്ങൾ കൂടുതലായും അറിയുന്നത്' വിനീത് ശ്രീനിവാസൻ പറഞ്ഞു.

2023ൽ പ്രണവ് വീണ്ടും സിനിമയിൽ സജീവമാകുമെന്നാണ് കഴിഞ്ഞ ദിവസം നിർമാതാവ് വിശാഖ് സുബ്രഹ്മണ്യം പറഞ്ഞത്. ഹൃദയത്തിലെ പ്രണവിന്റെ പ്രകടനത്തിന് ഏറെ പ്രശംസ കിട്ടിയിരുന്നു. ദർശന രാജേന്ദ്രൻ, കല്യാണി പ്രിയദർശൻ തുടങ്ങിയവരായിരുന്നു ചിത്രത്തിൽ നായികമാരായത്.

വിനീതിന്റെ റിലീസിനൊരുങ്ങുന്ന ഏറ്റവും പുതിയ സിനിമ മുകുന്ദനുണ്ണി അസോസിയേറ്റ്സ് ആണ്. വിനീത് ശ്രീനിവാസനെ നായകനാക്കി എഡിറ്റര്‍ അഭിനവ് സുന്ദര്‍ നായക് ആദ്യമായി സംവിധാനം ചെയ്യുന്ന സിനിമയാണ് മുകുന്ദനുണ്ണി അസോസിയേറ്റ്സ്.

ഏറെ രസകരമായ വക്കീല്‍ കഥാപാത്രത്തെയാണ് ചിത്രത്തില്‍ വിനീത് ശ്രീനിവാസന്‍ അവതരിപ്പിക്കുന്നത് എന്നാണ് ട്രെയ്ലര്‍ നല്‍കുന്ന സൂചന. വിനീത് ശ്രീനിവാസന് പുറമെ സുരാജ് വെഞ്ഞാറമ്മൂട്, സുധി കോപ്പ, തന്‍വിറാം, ജഗദീഷ് , മണികണ്ഠന്‍ പട്ടാമ്പി, ബിജു സോപാനം, ജോര്‍ജ്ജ് കോര,ആര്‍ഷ ചാന്ദിനി ബൈജു എന്നിവരും ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നുണ്ട്.