വസ്ത്രം മാറുമ്പോൾ റൂമിൽ തട്ടും, ഇയാൾ തുറക്കുമോ എന്ന് പേടിച്ചിട്ടുണ്ട്; ഷൈനിന്റെ തമാശയെക്കുറിച്ച് ഐശ്വര്യ

മലയാളത്തിൽ ഏറെ നാളുകൾക്ക് ശേഷമാണ് മികച്ച ഒരു ഹൊറർ സിനിമ സംഭവിക്കുന്നതെന്ന് പ്രേക്ഷകർ പറയുന്നു. കാന്താര എന്ന കന്നഡ ചിത്രം മലയാളത്തിൽ വൻ ചർച്ചയായിരിക്കെ റിലീസ് ചെയ്തിട്ടും കുമാരി ശക്തമായ സാന്നിധ്യം തിയറ്ററിലും ബോക്സ് ഓഫീസിലും അറിയിക്കുന്നു.

നിർമൽ സഹദേവ് സംവിധാനം ചെയ്ത സിനിമയിൽ ഐശ്വര്യ ലക്ഷ്മിയെക്കൂടാടെ ഷെെൻ ടോം ചാക്കോ, സ്വാസിക, തൻവി, സുരഭി ലക്ഷ്മി തുടങ്ങിയവരും അഭിനയിക്കുന്നു. ഇപ്പോഴിതാ ഷെൻ ടോം ചാക്കോയെ പറ്റി സംസാരിച്ചിരിക്കുകയാണ് ഐശ്വര്യ. തനിക്ക് പ്രിയപ്പെട്ട കോ ആക്ടർ ആണ് ഷൈനെന്നും തങ്ങൾ നല്ല സുഹൃത്തുക്കൾ ആണെന്നും ഐശ്വര്യ ലക്ഷ്മി പറയുന്നു. മൂവി മാൻ‌ ബ്രോഡ്കാസ്റ്റിനോടാണ് പ്രതികരണം.

'ഷെെൻ നല്ല ചിന്താ​ഗതിയുള്ള വ്യക്തിയാണ്. സിനിമയെ സംബന്ധിച്ച് എപ്പോഴും സംശയം ഉണ്ടാവും. അവസാനം സ്ക്രീനിൽ വരുമ്പോഴാണ് എന്തിനാണ് ഈ സംശയങ്ങൾ ചോദിച്ചതെന്ന് മനസ്സിലാവുക. കോആക്ടർ എന്ന നിലയിൽ ഭയങ്കര കെയറിം​ഗ് ആണ്. ക്ലെെമാക്സ് ഷൂട്ട് ചെയ്യുന്ന സമയത്ത് ഞങ്ങൾ അടി ഉണ്ടാക്കിയിട്ടുണ്ട്. വെറുതെ സംശയങ്ങൾ ചോദിച്ച് സമയം കളയുന്നതിനാണ് അടി ഉണ്ടാക്കിയത്. എനിക്ക് ദേഷ്യം പിടിക്കുന്നുണ്ട് മിണ്ടാതിരി എന്ന് പറഞ്ഞാലും കുറച്ച് കഴിഞ്ഞ് അദ്ദേഹം വളരെ കൂളായി വന്ന് മിണ്ടും'

'എന്നോട് ഭയങ്കര സ്നേഹമുണ്ട്. അതുപോലെ എന്നെ നല്ല പേടിയുണ്ടെന്ന് ഇടയ്ക്ക് തോന്നിയിട്ടുണ്ട്. കാണിക്കുന്ന എല്ലാമൊന്നും ഞാൻ വകവെച്ച് കൊടുക്കില്ല. തിരിച്ച് നല്ലോണം പറയും. ആ ഫ്രീഡം എനിക്ക് തന്നിട്ടുണ്ട്. എന്നെ ഇടയ്ക്ക് പേടിപ്പിച്ചിട്ടുണ്ട്. വലിയാെരു വീട്ടിലാണ് ഷൂട്ട്. കോസ്റ്റ്യൂം മാറുമ്പോൾ എന്റെ സ്റ്റാഫ് പുറത്ത് നിൽക്കാറാണ് പതിവ്. നമുക്ക് ലോക്ക് ഒന്നും ഇല്ലാത്ത റൂം ആയിരുന്നു. ആരെങ്കിലും അറിയാതെ വന്നാലോ എന്ന് കരുതി സ്റ്റാഫ് പുറത്ത് നിൽക്കും'

'ഷൈൻ പോകുന്ന വഴിക്ക് പേടിപ്പിച്ചിട്ടാണ് പോവുക. കുമാരിയെന്നൊക്കെ വിളിച്ച് രണ്ട് തട്ടൊക്കെ തട്ടും. ​ദൈവമേ ഇനി ഇയാൾ തുറക്കുമോ എന്നൊക്കെ തോന്നിപ്പോവും. പക്ഷെ ആൾ അങ്ങനെ അല്ല,' ഐശ്വര്യ ലക്ഷ്മി പറഞ്ഞു. ഐശ്വര്യ ലക്ഷ്മിയുടെ ഭർത്താവ് ആയാണ് ഷൈൻ ടോം ചാക്കോ സിനിമയിൽ അഭിനയിക്കുന്നത്. അഭിമുഖങ്ങളിൽ കാണുന്ന ഷെെനല്ല ഷൂട്ടിം​ഗിലെന്നും ഐശ്വര്യ വ്യക്തമാക്കി. കുമാരിക്ക് ശേഷം ക്രിസ്റ്റഫർ, കിം​ഗ് ഓഫ് കോത്ത എന്നിവയാണ് ഐശ്വര്യയുടെ അടുത്ത മലയാള സിനിമകൾ.