'ദുൽഖർ എനിക്ക് ആശാൻ, എനിക്കൊരു പ്രശ്നം വന്നാൽ ദുൽഖർ സഹായിക്കും'; അനുപമ പരമേശ്വരൻ

തനിക്കൊരു പ്രശ്നം വന്നാൽ‌ സഹായം ചോദിക്കാവുന്ന തരത്തിൽ ദുൽഖറുമായി സൗഹൃദമുണ്ടെനനാണ് ഓൺലൈൻ മീഡിയയ്ക്ക് നൽകിയ അഭിമുഖത്തിൽ അനുപമ പറഞ്ഞത്. 'മലയാളത്തിൽ എന്താണ് സിനിമകൾ ചെയ്യാത്തതെന്ന ചോദ്യം നിരവധി വരാറുണ്ട്.'

'നല്ല പ്രോജക്ടുകൾ വരാത്തതുകൊണ്ടാണ് ചെയ്യാത്തത്. ചില സമയത്ത് നല്ല സ്ക്രിപ്റ്റുകൾ വന്നപ്പോൾ എനിക്കത് ചെയ്യാനും പറ്റിയില്ല. എല്ലാത്തിനും അതിന്റേതായ സമയമുണ്ട്. ദുൽഖറൊരു ജെമ്മാണ്. ഞാൻ ആശാനെയെന്നാണ് ദുൽഖറിനെ വിളിക്കാറുള്ളത്. ജോമോന്റെ സുവിശേഷങ്ങൾ വേണ്ടി വളരെ കുറച്ച് ദിവസങ്ങളെ ഒരുമിച്ച് അഭിനയിച്ചിട്ടുള്ളു.'

'എന്നിട്ടും എപ്പോഴും അദ്ദേഹം സൗഹൃദം സൂക്ഷിക്കുന്നുണ്ട്. അത്ര വലിയൊരു സ്റ്റാറായിട്ട് കൂടി. ഞാൻ എന്തെങ്കിലും പൊട്ടത്തരം ചെയ്താൽ അത് അങ്ങനെ ചെയ്യരുതെന്ന് പറഞ്ഞ് തരാനും നല്ലത് ചെയ്താൽ അഭിനന്ദിക്കാനും അദ്ദേഹം ശ്രമിക്കാറുണ്ട്.'

'പിന്നെ മണിയറയിൽ അശോകൻ ചെയ്തപ്പോൾ അദ്ദേഹം എന്റെ നിർമാതാവായി. അങ്ങനെയാണ് സൗഹൃദം ആരംഭിച്ചത്. ഞങ്ങൾ എപ്പോഴും സംസാരിക്കുന്നവരൊന്നുമല്ല. പക്ഷെ എനിക്കൊരു പ്രശ്നം വന്നാൽ പോയി പറഞ്ഞാൽ അദ്ദേഹം തീർച്ചയായും പരിഹാരം കണ്ടെത്തി തരും' അനുപമ പരമേശ്വരൻ പറഞ്ഞു. 2017ലാണ് അനുപമ ജോമോന്റെ സുവിശേഷങ്ങളിൽ അഭിനയിച്ചത്.

ദുൽഖറിന്റെ നായികയായിരുന്നു ചിത്രത്തിൽ അനുപമ. സത്യൻ അന്തിക്കാട് സംവിധാനം ചെയ്ത പ്രേക്ഷക പ്രീതി നേടിയ ഒന്നായിരുന്നു. കുറുപ്പിലും ഒരു ചെറിയ കാമിയോ റോളിൽ അനുപമ അഭിനയിച്ചിരുന്നു.

ടൊവിനോയുടെ കഥാപാത്രത്തിന്റെ ഭാര്യ വേഷമാണ് അനുപമ ചെയ്തത്. ദുൽഖർ തന്നെ നേരിട്ടാണ് കുറുപ്പിലേക്ക് കഥാപാത്രം ചെയ്യാൻ ക്ഷണിച്ചതെന്ന് നേരത്തെ അനുപമ പറഞ്ഞിട്ടുണ്ട്.

അനുപമയുടെ ഏറ്റവും പുതിയ റിലീസ് കാർത്തികേയ 2വാണ്. തെലുങ്കിൽ ഒരുക്കിയ സിനിമ മലയാളത്തിലും ഡബ്ബ് ചെയ്ത് പ്രദർശനത്തിന് എത്തിച്ചിട്ടുണ്ട്.

ചന്ദു മൊണ്ടെട്ടി സംവിധാനം ചെയ്ത കാര്‍ത്തികേയ 2 ഇതിനോടകം സിനിമാ മേഖലയിൽ വലിയ ശ്രദ്ധ പിടിച്ചുപറ്റിക്കഴിഞ്ഞു. ഓഗസ്റ്റ് 13ന് റിലീസ് ചെയ്‍ത ചിത്രം 120 കോടിയിലധികം തിയറ്റര്‍ കലക്ഷൻ നേടി. 30 കോടിയിലധികമാണ് കാർത്തികേയ 2 ഹിന്ദി പതിപ്പിൽ നിന്ന് മാത്രം നേടിയത്.

കൂടാതെ വിദേശത്ത് 2 ദശലക്ഷം ഡോളറും സിനിമ സ്വന്തമാക്കി. പീപ്പിള്‍സ് മീഡിയ ഫാക്ടറിയും അഭിഷേക് അഗര്‍വാള്‍ ആര്‍ട്ട് ബാനറും ചേര്‍ന്നാണ് ചിത്രം നിർമിച്ചത്. കുറഞ്ഞ ബജറ്റിൽ അനുപം ഖേർ, നിഖിൽ സിദ്ധാർഥ്, അനുപമ പരമേശ്വരൻ എന്നിവരെ കേന്ദ്ര കഥാപാത്രമാക്കി നിർമിച്ച ചിത്രം ഇ 4 എന്റർടൈൻമെന്റ്സാണ് കേരളത്തിൽ വിതരണത്തിന് എത്തിച്ചിരിക്കുന്നത്.